ཟླ་དང་པོའི་ཚེས་དགུ་ཉིན། ཧྲིན་ཀྲང་གཞོན་པ་དབྱང་ཀྲི་ཝུན་གྱིས་ཟི་ལིང་གྲོང་ཁྱེར་དུ་གླ་ཕོགས་ཆད་པའི་སྣང་ཚུལ་རྩ་བཅོས་བྱེད་པར་ལྟ་སྐུལ་མཛུབ་སྟོན་བྱེད་སྐབས་བསྟན་དོན། ཏང་གི་ཚོགས་ཆེན་ཐེངས་ཉི་ཤུ་པ་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལ་སློབ་སྦྱོང་གཏིང་ཟབ་བྱས་ཏེ། ཆབ་སྲིད་ཀྱི་འགན་འཁྲི་བརྟན་པོར་ཁུར་བ་དང་། འགན་ཁུར་འདུ་ཤེས་ཇེ་དྲག་ཏུ་བཏང་ནས། ཞིང་བ་མང་ཚོགས་ཀྱི་གླ་ཕོགས་སྟེར་བའི་བྱ་བར་འགན་སྲུང་ལེགས་པོ་བྱས་ནས། དོན་དངོས་འགུལ་སྐྱོད་ཀྱིས་རྒྱ་ཆེའི་ཞིང་བ་མང་ཚོགས་ཀྱི་ཁྲིམས་མཐུན་ཁེ་དབང་ལ་སྲུང་སྐྱོབ་བྱེད་དགོས།
དབྱང་ཀྲི་ཝུན་སྔ་གཞུག་ཏུ་མཁར་ནུབ་ཁུལ་ཨེ་ཆིན་ཧེ་ཉོ་ཚོང་སྤྱི་གླིང་དང་། ཟི་ལིང་སློབ་ཆེན། མཁར་ཤར་ཁུལ་ཝུའུ་ཡུའེ་ཐང་ཆེན་སོགས་ཀྱི་ལས་གཞི་འཛུགས་སྐྲུན་གྱི་ཡུལ་དངོས་སུ་སོང་ནས། ངལ་རྩོལ་གན་རྒྱ་དང་གླ་ཕོགས་སྟེར་བའི་ཡིག་ཚགས་སོགས་ལ་ལྟ་ཀློག་བྱས་ནས། ཞིང་བ་མང་ཚོགས་ལ་གླ་ཕོགས་སྟེར་བའི་བྱེད་ཐབས་དངོས་འབེབ་གནས་ཚུལ་ལ་རྒྱུས་ལོན་བྱས་པ་དང་། ཞོར་དུ་གྲོང་ཁྱེར་ནང་ཁུལ་གྱི་ས་ཁུལ་དག་གི་སྡེ་ཁག་དང་། ཨར་ལས་སྡེ་ཚན་གྱི་བློ་མཐུན། ལས་གཉེར་པ་བཅས་ལ་བརྗེ་རེས་གཏིང་ཟབ་བྱས།
དབྱང་ཀྲི་ཝུན་གྱིས་ནན་གྱིས་བསྟན་དོན། ངལ་རྩོལ་གླ་ཆ་སྤྲོད་པའི་ཁེ་དབང་ལ་ཁྲིམས་ལྟར་སྲུང་སྐྱོབ་བྱེད་པ་ནི། རྒྱ་ཆེའི་ལས་བཟོ་པ་དང་མང་ཚོགས་ཀྱི་ཆེས་སེམས་ཁུར་བྱེད་ས་དང་། ཆེས་ཐད་ཀར་དུ་ཁོ་ཚོར་འབྲེལ་བ་ཡོད་ཅིང་། ཆེས་དངོས་ཡོད་ཀྱི་ཁེ་ཕན་གནད་དོན་ཡིན། ས་ཁུལ་སོ་སོ་དང་། འབྲེལ་ཡོད་སྡེ་ཁག་སོ་སོས་མི་དམངས་ཀྱི་ལངས་ཕྱོགས་ནས་འགྲེང་སྟེ། ཆབ་སྲིད་དང་ཁྱོན་ཡོངས་ཀྱི་མཐོ་ཚད་ནས་གླ་ཕོགས་ཆད་པའི་སྣང་ཚུལ་རྩ་བཅོས་བྱེད་པའི་དོན་སྙིང་གལ་ཆེན་ལ་ངོས་འཛིན་ཟབ་མོ་བྱས་ཏེ། གནས་བབ་གསར་པའི་འོག་གི་ལས་འགན་གསར་པ་དང་རེ་བ་གསར་བར་ངོས་འཛིན་ཡང་དག་བྱས་ནས། ནམ་ཡང་ལྷོད་གཡེང་དུ་མི་གཏོང་བའི་འགན་འཁྲིའི་འདུ་ཤེས་ལ་བརྟེན་ནས། བྱ་བ་སོ་སོ་སྔར་ལས་དམ་འཛིན་དང་། སྔར་ལས་ཞིབ་ཚགས། སྔར་ལས་དངོས་གཉེར་བཅས་བྱེད་དགོས། ཞིང་བ་མང་ཚོགས་ཀྱི་གླ་ཕོགས་སྟེར་བར་འགན་སྲུང་བྱེད་པའི་ཐད་ཀྱི་རྐྱེན་སྲོལ་སོགས་ཁྲིམས་ལུགས་ཁྲིམས་སྲོལ་དངོས་འབེབ་གཏིང་ཟབ་བྱས་ནས། ལྷུ་ཚིགས་གཙོ་བོ་དང་གནད་འགག་གི་གནས་ཁུལ་གཙིགས་སུ་བཟུང་ནས། མངོན་མེད་ཉེན་ཁ་མང་པོར་གྲལ་བཤེར་བྱས་ཏེ། ཁེ་དབང་སྲུང་སྐྱོབ་ཀྱི་རྒྱུ་ལམ་ཡངས་པོར་ཕྱེ་ནས། རྒྱ་ཆེའི་ཞིང་བ་ལས་བཟོ་པ་ལ་དུས་ཚོད་ལྟར་གྱི་དཀའ་སྡུག་རིན་དངུལ་ལག་ལ་ཐོབ་ཏུ་འཇུག་དགོས། བསམ་ཇུས་གཅིག་གི་བསམ་བློ་བརྟན་པོར་བཙུགས་ནས། ཁོངས་གཏོགས་ས་གནས་ཀྱི་དོ་དམ་དང་སྡེ་ཁག་མཉམ་སྒུལ་ཤུགས་དྲག་ཏུ་བཏང་ནས། གླ་ཕོགས་ཆད་པའི་སྣང་ཚུལ་རྩ་བཅོས་བྱེད་པའི་མཉམ་ཤུགས་གྲུབ་ཏུ་བཅུག་སྟེ། ལས་ཞུགས་རྣམ་པ་བརྟན་འཇགས་དང་སྤྱི་ཚོགས་ཀྱི་ཆེ་ཕྱོགས་འཆམ་མཐུན་ཡོང་བར་འགན་སྲུང་བྱེད་དགོས།
སྐལ་བཟང་རྣམ་རྒྱལ་གྱིས་བསྒྱུར།
