ཟླ་དང་པོའི་ཚེས་བཅུ་གཉིས་ཉིན། ཞིང་ཆེན་ཏང་ཨུའི་ཧྲུའུ་ཅི་ཁྲིན་ཀང་དམངས་གཙོ་ཏང་ཁག་སོ་སོའི་ཞིང་ཆེན་ཨུ་ཡོན་ལྷན་ཁང་དང་ཞིང་ཆེན་བཟོ་ཚོང་མཉམ་འབྲེལ་ལྷན་ཚོགས་སུ་རྟོག་ཞིབ་བྱེད་པར་སོང་ནས། མགོ་ཁྲིད་ཚན་ཁག་གི་ཁོངས་མི་ལ་འཚམས་འདྲི་བྱས་པ་དང་། ཚང་མས་ཞིང་ཆེན་ཏང་ཨུའི་བྱ་བའི་ཐད་ཀྱི་བསམ་འཆར་ལ་ཉན་པར་མ་ཟད། ཚང་མར་ལུགས་རྙིང་ལོ་སར་གྱི་སྨོན་འདུན་བཟང་བོ་ཞུས། ཁོས་དེང་རབས་ཅན་གྱི་མཚོ་སྔོན་གསར་བ་འཛུགས་སྐྲུན་བྱེད་རྒྱུ་ནི། སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་མངགས་བཅོལ་དང་། མཚོ་སྔོན་གྱི་རིགས་སོ་སོའི་མི་དམངས་ཀྱི་རེ་སྒུག་ཡིན་པས། རྒྱུན་མཐུད་ངང་བཟང་བོར་བསྒྲུབ་པ་དང་། དག་སྲུང་གསར་གཏོད་བྱེད་པ། མཉམ་ཤུགས་གཅིག་ཏུ་བསྡུས་ནས། མཉམ་དུ་དེང་རབས་ཅན་གྱི་མཚོ་སྔོན་གསར་བ་འཛུགས་སྐྲུན་བྱེད་པའི་ཐད་ནས་གྲུབ་འབྲས་གསར་པ་ལེན་པར་སྐུལ་འདེད་གཏོང་དགོས་ཞེས་ནན་གྱིས་བསྟན། ཞིང་ཆེན་སྲིད་གྲོས་ཀྱི་ཀྲུའུ་ཞི་མགོན་པོ་བཀྲ་ཤིས་རྟོག་ཞིབ་ལ་ཞུགས།
ཀྲུང་གོ་གོ་མིན་ཏང་གསར་བརྗེ་ཨུ་ཡོན་ལྷན་ཁང་དང་ཀྲུང་གོ་དམངས་གཙོ་མནའ་མཐུན། ཀྲུང་གོ་དམངས་གཙོ་རྒྱལ་འཛུགས་ཨུ་ཡོན་ལྷན་ཁང་། ཞིང་བཟོ་ཏང་། དགུ་གསུམ་སློབ་ཚོགས་བཅས་ཀྱི་མཚོ་སྔོན་ཞིང་ཆེན་ཨུ་ཡོན་ལྷན་ཁང་དུ། ཁྲིན་ཀང་གིས་དམངས་གཙོ་ཏང་ཁག་སོ་སོའི་མཚོ་སྔོན་ཞིང་ཆེན་ཨུ་ཡོན་ལྷན་ཁང་གི་ལོ་རྒྱུས་ཀྱི་འགྱུར་ལྡོག་དང་བྱ་བ་གཙོ་བོ། འཕེལ་རྒྱས་ཀྱི་འཆར་གཞི་ཐད་ཀྱི་ངོ་སྤྲོད་ལ་ཉན་པ་དང་། ཚང་མས་རང་ཉིད་ཀྱི་དགེ་མཚན་འདོན་སྤེལ་བྱས་པ་དང་གསར་གཏོད་རང་བཞིན་སྒོས་བྱ་བ་བསྒྲུབས་ནས་བླངས་པའི་གྲུབ་འབྲས་ལ་ཁས་ལེན་གང་ལེགས་བྱས། ཁོས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རིགས་གསར་བའི་སྲིད་ཏང་ལམ་ལུགས་སྐོར་གྱི་རྣམ་བཤད་གལ་ཆེན་དང་མཚོ་སྔོན་གྱི་བྱ་བའི་ཐད་ཀྱི་བླང་བྱ་གལ་ཆེན་གཉིས་ཟུང་འབྲེལ་བྱས་ནས་ལག་བསྟར་བྱེད་པ་དང་། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཀྲུང་གུང་ཀྲུང་དབྱང་དང་བསམ་བློ་གཏོང་ཕྱོགས་གཅིག་བྱེད་པ་དང་དམིགས་འབེན་ཁ་ཕྱོགས་གཅིག་བྱེད་པ། བྱ་སྤྱོད་སྟེང་ནས་མཉམ་དུ་བསྐྱོད་པ། ཕྱོགས་སོ་སོའི་སྟོབས་ཤུགས་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་ཁྲོད་ཞུགས་པར་སྐུལ་སློང་གཏོང་བ། གོམ་སྟབས་རེ་རེ་བཞིན་ཞིང་ཆེན་ཏང་གི་འཐུས་མིའི་ཚོགས་ཆེན་ཐེངས་བཅུ་བཞི་པས་གཏན་ཁེལ་བྱས་པའི་དམིགས་འབེན་མངོན་འགྱུར་བྱས་ནས། མཚོ་སྔོན་མི་དམངས་ཀྱི་ཐོབ་ཚོར་སྔར་ལས་ཆེ་བ་དང་སྐྱིད་སྣང་རྒྱུན་བསྲིང་བ། བདེ་སྣང་སྔར་ལས་འགན་སྲུང་ཡོད་པར་བྱེད་དགོས།
ཞིང་ཆེན་བཟོ་ཚོང་མཉམ་འབྲེལ་ལྷན་ཚོགས་སུ། ཁྲིན་ཀང་གིས་མགོ་ཁྲིད་ཚན་ཁག་གི་ཁོངས་མི་དང་ལས་ཁུངས་ཀྱི་ལས་བྱེད་པ་སྐོར་ཞིག་དང་མཛའ་བརྩེའི་གླེང་མོལ་བྱས་པ་དང་། བྱ་བ་བསྒྲུབས་པའི་གནས་ཚུལ་ལ་རྒྱུས་ལོན་གསལ་བོ་བྱས་ལ། རིམས་ནད་ཀྱི་གནོད་པའི་འོག་དམངས་གཉེར་ཁེ་ལས་ཀྱི་མདུན་དུ་ལྷགས་པའི་དཀའ་ཁག་དང་གནད་དོན་གསལ་བོར་དྲིས། ཁོས་བསྟན་དོན། ཏང་གི་ཚོགས་ཆེན་ཐེངས་ཉི་ཤུ་པ་དང་ཀྲུང་དབྱང་དཔལ་འབྱོར་བྱ་བའི་གྲོས་ཚོགས་ཀྱི་དགོངས་དོན་ལག་བསྟར་ཟབ་མོ་བྱེད་པ་དང་། གཡོ་འགུལ་སྤུ་ཙམ་ཡང་མི་བྱེད་པ་གཉིས་མཐའ་གཅིག་ཏུ་ལག་བསྟར་བྱེད་པ། རྒྱལ་དབང་ཁེ་ལས་དང་དམངས་གཉེར་ཁེ་ལས་ལ་འདྲ་མཉམ་གྱི་ལྟ་སྟངས་འཛིན་པའི་རེ་བ་དོན་འཁྱོལ་བྱས་ནས། དམངས་གཉེར་དཔལ་འབྱོར་དང་དམངས་གཉེར་ཁེ་ལས་བདེ་ཐང་ངང་འཕེལ་རྒྱས་སུ་གཏོང་བར་སྐུལ་སློང་དང་རྒྱབ་སྐྱོར་བྱེད་དགོས། འཚམས་འདྲི་དང་རྟོག་ཞིབ་བརྒྱུད་དེ། ཁེ་ལས་ཀྱི་རེ་བར་རྒྱུས་ལོན་བྱེད་པ་དང་། གནད་ཕིགས་ཕན་ལྡན་སྒོས་ཐག་བཅད་དེ། ཚོང་གཉེར་གྱི་ཁོར་ཡུག་བཟང་བོ་བསྐྲུན་དགོས། ཁེ་ལས་པར་སེམས་ཁུར་དང་གཟིགས་སྐྱོང་བྱེད་པ་དང་། ཁོ་ཚོ་མཚོ་སྔོན་ནས་རྐང་འཛུགས་པ་དང་འཕེལ་རྒྱས་སུ་གཏོང་ཐུབ་པར་བྱས་ཏེ། མཚོ་སྔོན་སྤུས་ཚད་མཐོ་བའི་ངང་འཕེལ་རྒྱས་སུ་གཏོང་བའི་སྟོབས་ཤུགས་གལ་ཆེན་དུ་འགྱུར་བར་བྱེད་དགོས།
པད་ཁོ་དང་ཀྲུའུ་ཞང་ཧྥིན་གཉིས་རྟོག་ཞིབ་ལ་ཞུགས།
རིན་ཆེན་མཚོས་བསྒྱུར།
