ཟླ་དང་པོའི་ཚེས་བཅུ་དགུ་ཉིན་གྱི་ཕྱི་དྲོར། མཚོ་སྔོན་ཞིང་ཆེན་སྐབས་བཅུ་བཞི་བའི་མི་དམངས་འཐུས་མིའི་ཚོགས་ཆེན་གྱི་གྲོས་ཚོགས་ཐེངས་དང་པོས་གྲོས་རིམ་སྣ་ཚོགས་བདེ་བླག་སྒོས་ཡོངས་འགྲུབ་བྱས་རྗེས་མཚོ་སྔོན་གྲོས་ཚོགས་ལྟེ་གནས་ནས་རྒྱལ་ཁའི་ངང་གྲོལ།
ཟླ་དང་པོའི་ཚེས་བཅུ་དགུ་ཉིན་གྱི་ཕྱི་དྲོར། མཚོ་སྔོན་ཞིང་ཆེན་སྐབས་བཅུ་བཞི་བའི་མི་དམངས་འཐུས་མིའི་ཚོགས་ཆེན་གྱི་གྲོས་ཚོགས་ཐེངས་དང་པོས་གྲོས་རིམ་སྣ་ཚོགས་བདེ་བླག་སྒོས་ཡོངས་འགྲུབ་བྱས་རྗེས་མཚོ་སྔོན་གྲོས་ཚོགས་ལྟེ་གནས་ནས་རྒྱལ་ཁའི་ངང་གྲོལ།
ཚོགས་ཆེན་ལ་ཞུགས་དགོས་པའི་འཐུས་མི་སུམ་བརྒྱ་དང་དགུ་བཅུ་ཡོད་པ་དང་འཐུས་མི་སུམ་བརྒྱ་དང་དོན་གཅིག་གྲོས་ཚོགས་ལ་ཞུགས་པས། ཁྲིམས་བཀོད་མི་གྲངས་དང་མཐུན།
ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན། ཚོགས་ཆེན་གྱི་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞི་ཁྲིན་ཀང་གིས་གྲོས་ཚོགས་ལ་མགོ་འཛིན་བྱས་པར་མ་ཟད་གཏམ་བཤད།
ཚོགས་ཆེན་གྱི་ལག་བསྟར་ཀྲུའུ་ཞི། ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞི་ཁྲིན་རོས་ཧྥིན་དང་ཝང་དབྱང་། ཀྲའོ་ཡོ་ཞ། ཝང་ལིན་ཧུའུ། ཝུའུ་ལ་ཙི་པེ་ཁི་རེ་སུའུ་ལེ་ཧན། པད་ཁོ། ཀྲུའུ་ཞང་ཧྥིན། དབྱི་ཧྲུའུ་ཆང་། ཝང་ལིས་མེན། ཉི་མ་སྒྲོལ་མ། ལིའུ་ཐུང་ཏི། ཀྲང་ཧོང་ཡོན་བཅས་ཀྲུའུ་ཞི་སྟེགས་བུའི་མདུན་གྲལ་དུ་བསྡད་ཡོད།
ཝུའུ་ཞོ་ཅུན་དང་རྡོ་རྗེ་རབ་བརྟན། མགོན་པོ་བཀྲ་ཤིས། ཡུས་ཚོང་ལི། ཝང་ཝེ་ཏུང་། ཚེ་རིང་ཐར་སོགས་ཀྲུའུ་ཞི་སྟེགས་བུའི་སྟེང་བསྡད་ཡོད།
ཚོགས་ཆེན་སྟེང་མཚོ་སྔོན་ཞིང་ཆེན་གྱི་སྐབས་བཅུ་བཞི་བའི་རྒྱལ་ཡོངས་མི་དམངས་འཐུས་མིའི་ཚོགས་ཆེན་ལ་ཞུགས་པའི་འཐུས་མི་ཉེར་བཞི་བདམས་ཐོན་བྱུང་བ་དང་། ཀྲུང་དབྱང་གིས་མིང་བཏོན་པའི་འདེམ་སྒུག་པ་ཚེ་ཆི་སོགས་བློ་མཐུན་བདམས་ཐོན་བྱུང་།
ཚོགས་ཆེན་སྟེང་མིང་མི་འགོད་པའི་འདེམ་ཤོག་འཕེན་ཐབས་སྤྱད་དེ་ཁྲིན་ཀང་མཚོ་སྔོན་ཞིང་ཆེན་སྐབས་བཅུ་བཞི་བའི་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ལ་བདམས་པ་དང་། ཝུའུ་ཞོ་ཅུན་མཚོ་སྔོན་ཞིང་ཆེན་མི་དམངས་སྲིད་གཞུང་གི་ཧྲིན་ཀྲང་ལ་བདམས། ཝང་ལིས་མེན་དང་དབྱང་ཧྥིན་ཁྲུན། ཉི་མ་སྒྲོལ་མ། ལིའུ་ཐུང་ཏི། ཀྲང་ཧོང་ཡོན། ལོས་ཀང་བཅས་མཚོ་སྔོན་ཞིང་ཆེན་སྐབས་བཅུ་བཞི་བའི་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་གཞོན་པར་བདམས་པ་དང་། ཝང་ཝེ་ཏུང་དང་ཚེ་རིང་ཐར། ལིའུ་ཐོ། དབྱང་ཀྲི་ཝུན། ལིའུ་ཁྲའོ། ལིས་ཧོང་ཡ། ཧི་ལུའུ་ཁྲུན། ཝང་ཧེ་ཧོང་བཅས་མཚོ་སྔོན་ཞིང་ཆེན་མི་དམངས་སྲིད་གཞུང་གི་ཧྲིན་ཀྲང་གཞོན་པར་བདམས་ལ། ཝང་དབྱང་མཚོ་སྔོན་ཞིང་ཆེན་ལྟ་ཞིབ་ཨུ་ཡོན་ལྷན་ཁང་གི་ཀྲུའུ་རིན་ལ་བདམས་པ་དང་། ཀྲང་ཙི་ཅུན་མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་གི་ཡོན་ཀྲང་ལ་བདམས། ཀྲ་ཆིན་ཅིག་མཚོ་སྔོན་ཞིང་ཆེན་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན་པོར་བདམས། ཐེངས་འདིའི་གྲོས་ཚོགས་ནས་བདམས་ཐོན་བྱུང་བའི་མཚོ་སྔོན་ཞིང་ཆེན་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན་པོ་ནི་ཆེས་མཐོ་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན་པོས་རྒྱལ་ཡོངས་མི་དམངས་འཐུས་མིའི་ཚོགས་ཆེན་ལ་ཆོག་མཆན་འགོད་པར་སྤྲོད་དགོས།
ཚོགས་ཆེན་སྟེང་། ཁྲིན་ཏུང་ཁྲང་མཚོ་སྔོན་ཞིང་ཆེན་སྐབས་བཅུ་བཞི་བའི་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་དྲུང་ཡིག་ཆེན་མོར་བདམས་པ་དང་། བློ་མཐུན་རེ་ལྔ་མཚོ་སྔོན་ཞིང་ཆེན་སྐབས་བཅུ་བཞི་བའི་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ལ་བདམས།
སྤྲོ་སེམས་བའི་ཐལ་མོ་རྡེབ་སྒྲའི་ཁྲོད་དུ་གསར་དུ་བདམས་པའི་མི་སྣས་དམངས་ཆེན་འཐུས་མི་ཡོངས་ལ་ཐུག་འཕྲད་བྱས། ཁྲིན་ཀང་གི་སྣེ་ཁྲིད་འོག གསར་དུ་བདམས་པའི་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་དང་དྲུང་ཡིག་ཆེན་མོ། ཞིང་ཆེན་མི་དམངས་སྲིད་གཞུང་གི་ཧྲིན་ཀྲང་དང་ཧྲིན་ཀྲང་གཞོན་པ། ཞིང་ཆེན་ལྟ་ཞིབ་ཨུ་ཡོན་ལྷན་ཁང་གི་ཀྲུའུ་རིན། ཞིང་ཆེན་མཐོ་རིམ་མི་དམངས་ཁྲིམས་ཁང་གི་ཡོན་ཀྲང་བཅས་ཀྱིས་རྩ་ཁྲིམས་མདུན་དུ་དམ་བཅའ་བཞག
ཚོགས་ཆེན་སྟེང་། མཚོ་སྔོན་ཞིང་ཆེན་སྐབས་བཅུ་བཞི་བའི་མི་དམངས་འཐུས་མིའི་ཚོགས་ཆེན་ཆེད་དོན་ཨུ་ཡོན་ལྷན་ཁང་སོ་སོའི་ཀྲུའུ་རིན་ཨུ་ཡོན་དང་ཀྲུའུ་རིན་ཨུ་ཡོན་གཞོན་པ། ཨུ་ཡོན་བཅས་འོས་མིའི་མིང་ཐོ་དང་སྲིད་གཞུང་བྱ་བའི་སྙན་ཞུ་སྐོར་གྱི་གྲོས་ཆོད། མཚོ་སྔོན་ཞིང་ཆེན་གྱི་ཉིས་སྟོང་ཉེར་གཉིས་ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་འགོད་ལག་བསྟར་གནས་ཚུལ་དང་ཉིས་སྟོང་ཉེར་གསུམ་ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་འགོད་སྐོར་གྱི་གྲོས་ཆོད། མཚོ་སྔོན་ཞིང་ཆེན་གྱི་ཉིས་སྟོང་ཉེར་གཉིས་ལོའི་སྔོན་རྩིས་ལག་བསྟར་གནས་ཚུལ་དང་ཉིས་སྟོང་ཉེར་གསུམ་ལོའི་སྔོན་རྩིས་སྐོར་གྱི་གྲོས་ཆོད། མཚོ་སྔོན་ཞིང་ཆེན་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུ་སྐོར་གྱི་གྲོས་ཆོད། མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་གི་བྱ་བའི་སྙན་ཞུ་སྐོར་གྱི་གྲོས་ཆོད། མཚོ་སྔོན་ཞིང་ཆེན་མི་དམངས་ཞིབ་དཔྱོད་ཁང་གི་བྱ་བའི་སྙན་ཞུ་སྐོར་གྱི་གྲོས་ཆོད་བཅས་ལ་རིམ་པ་བཞིན་གྲོས་འཆམ་བྱུང་།
ཁྲིན་ཀང་གིས་བསྟན་དོན། ཐེངས་འདིའི་ཚོགས་ཆེན་ནི་དར་ཆ་མཐོན་པོར་སྒྲེང་ཞིང་མངག་བཅོལ་ཡིད་ལ་དམ་པོར་བཅངས་པའི་ཚོགས་ཆེན་ཞིག་ཡིན་ལ། སེམས་ཤུགས་གཅིག་སྒྲིལ་དང་མཐུན་སྒྲིལ་འབད་འཐབ་བྱེད་པའི་ཚོགས་ཆེན་ཞིག་ཡིན་པ་དང་། བདེན་འཚོལ་དངོས་གཉེར་དང་སྤྱོད་གཙང་སྲོལ་བཟང་གི་ཚོགས་ཆེན་ཞིག་ཀྱང་ཡིན། ཚོགས་ཆེན་སྐབས་སུ། འཐུས་མི་ཡོངས་ཀྱིས་མི་དམངས་ཀྱི་མངག་བཅོལ་དང་དུ་བླངས་ཤིང་ཚད་མཐོན་པའི་ཆབ་སྲིད་རང་རྟོགས་དང་སྤོབས་པས་ཁེངས་པའི་ཆབ་སྲིད་སྤྲོ་སེམས། ཤུགས་དྲག་པའི་འགན་འཁྲིའི་ཁག་ཁུར་ལ་བརྟེན་ནས་ནན་ཏན་སྒོས་འགན་འཁྲི་ལག་བསྟར་བྱས་པས། དཀའ་སྤྱད་བརྩོན་ལེན་དང་སྤོབས་པ་ཆེར་བསྐྱེད་ཀྱི་བསམ་བློའི་རྣམ་པ་མངོན་པར་བྱས། ཁྲིན་ཀང་གིས་ཞིང་ཆེན་ཏང་ཨུ་དང་ཚོགས་ཆེན་གྱི་ཀྲུའུ་ཞི་ཚོགས་པའི་ཚབ་བྱས་ཏེ་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་དང་ཞིང་ཆེན་སྲིད་གཞུང་གི་མགོ་ཁྲིད་ལས་འགན་འཁུར་མཚམས་བཞག་པའི་བློ་མཐུན་ལ་བླ་མེད་གུས་འདུད་ཞུས་པ་དང་འཐུས་མི་ཡོངས་ལ་ལྷག་བསམ་རྣམ་དག་སྒོས་བཀའ་དྲིན་ཆེ་ཞུས།
ཁྲིན་ཀང་གིས་བསྟན་དོན། ཏང་གི་ཚོགས་ཆེན་ཐེངས་ཉི་ཤུ་པས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་བྱེད་པའི་རླབས་ཆེན་འབོད་སྐུལ་བསྒྲགས་ཤིང་། ཞིང་ཆེན་ཏང་གི་འཐུས་མིའི་ཚོགས་ཆེན་ཐེངས་བཅུ་བཞི་བས་དེང་རབས་ཅན་གྱི་མཚོ་སྔོན་གསར་བ་འཛུགས་སྐྲུན་བྱེད་པའི་འཆར་གཞི་བཟང་བོ་བཀོད་པ་དང་། ཞིང་ཆེན་དམངས་ཆེན་སྐབས་བཅུ་བཞི་བའི་གྲོས་ཚོགས་ཐེངས་དང་པོས་བསམ་བློ་སྔར་ལས་གཅིག་གྱུར་བྱས་པ་དང་སྟོབས་ཤུགས་སྔར་ལས་གཅིག་སྡུད་བྱས། མི་དམངས་ཀྱི་རེ་སྒུག་ནི་ང་ཚོས་འབད་འཐབ་བྱེད་པའི་དད་སེམས་ཡིན་པ་དང་། འགན་འཁྲིའི་འབོད་སྐུལ་ནི་ང་ཚོ་མདུན་དུ་བསྐྱོད་པའི་སྒུལ་ཤུགས་ཡིན་པས། ངེས་པར་དུ་འགྱུར་མེད་དམ་འཛིན་དང་སྤྱོད་ཚུལ་ལྷོད་གཡེང་དུ་མི་གཏོང་བར་ངར་ཤུགས་ཆེ་རུ་བསྐྱེད་དེ་སྐྱོད་ལམ་གསར་བར་བསྐྱོད་དགོས།
ཁྲིན་ཀང་གིས་ནན་གྱིས་བསྟན་དོན། བཞུད་ལམ་གསར་བར་འབད་པས་བསྐྱོད་དགོས་ན་དར་ཆ་གསལ་བོས་ཆབ་སྲིད་སྐྱོང་དགོས་ལ། ཐོག་མཐའ་བར་གསུམ་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཛུབ་སྟོན་མཛད་པའི་ཕྱོགས་སུ་མདུན་སྐྱོད་བྱེད་དགོས། གཏན་ཕབ་གཉིས་ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་ཟབ་མོ་ལེན་པ་དང་། འདུ་ཤེས་བཞི་ཟོལ་མེད་ཀྱིས་ཇེ་དྲག་ཏུ་གཏོང་བ། ཡིད་ཆེས་བཞི་ཇེ་བརྟན་དུ་གཏོང་པ། སྲུང་སྐྱོབ་གཉིས་ཀྱི་བྱ་བ་བཟང་བོར་བསྒྲུབས་ཏེ། བསམ་བློ་དང་ཆབ་སྲིད། བྱ་སྤྱོད་བཅས་ཀྱི་སྟེང་ནས་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་དང་ཚད་མཐོའི་གཅིག་གྱུར་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཚོ་སྔོན་བྱ་བའི་སྐོར་གྱི་གསུང་བཤད་གལ་ཆེན་དང་མཆན་བཀོད་མཛུབ་སྟོན་གལ་ཆེན་མཐའ་གཅིག་ཏུ་ལག་བསྟར་བྱེད་པ་དང་། རྒྱུགས་སྤྲོད་ལམ་བུ་གསར་བའི་སྟེང་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་སེམས་བདེ་ཡིད་ཚིམས་པའི་རྒྱུགས་གཞི་གསར་བ་ཞིག་སྤྲོད་དགོས། བཞུད་ལམ་གསར་བར་འབད་པས་བསྐྱོད་དགོས་ན་འགན་འཁྲི་ཡོད་ཚད་ཁུར་དུ་ལེན་དགོས་པ་དང་། དེང་རབས་ཅན་གྱི་མཚོ་སྔོན་གསར་བའི་འཛུགས་སྐྲུན་ཁྲོད་རང་རྟོན་རང་སྤེལ་དང་འབད་འབུངས་ལྷོད་མེད་བྱེད་དགོས། ཆེས་ཆེ་བ་གསུམ་གྱི་ཞིང་ཆེན་གནས་ཚུལ་གྱི་གཏན་གནས་དང་སྔར་ལས་གལ་ཆེ་བ་གསུམ་གྱི་འཐབ་ཇུས་གོ་གནས་ཀྱི་རྒྱུས་ལོན་ངོས་ཟིན་ཇེ་ཟབ་ཏུ་གཏོང་བ་དང་། སྤུས་ཚད་མཐོ་བའི་འཕེལ་རྒྱས་དེ་འགན་འཁྲི་གསར་བ་ཁུར་དུ་ལེན་པའི་ལས་འགན་གཙོ་བོར་བྱེད་པ། ཇུས་གཞི་གཅིག་ལག་བསྟར་མཐའ་འཁྱོལ་བྱེད་པ། བློ་བརྟན་འགྱུར་མེད་ཀྱིས་སྐྱེ་ཁམས་དཔལ་ཡོན་གྱི་མཐོ་ས་གསར་བསྐྲུན་དང་ཐོན་ལས་ཀྱི་གནས་བཞི་འཛུགས་སྐྲུན་བྱས་ནས། ཐུན་མོང་འབྱོར་ཕྱུག་ལ་གཏན་འཇགས་ཀྱིས་སྐུལ་འདེད་བཏང་ནས། ཤུགས་ཆེན་པོས་དེང་རབས་ཅན་གྱི་མཚོ་སྔོན་གསར་བའི་འཛུགས་སྐྲུན་གྱི་རྣམ་པ་གསར་བ་གསར་འབྱེད་བྱེད་པར་སྐུལ་འདེད་བཏང་སྟེ། ཧུར་ཐག་སྒོས་ལག་ལེན་དང་མི་དམངས། ལོ་རྒྱུས་བཅས་ཀྱི་ཉམས་སད་ཐེག་པའི་གྲུབ་འབྲས་གསར་བ་གསར་གཏོད་བྱེད་དགོས། བཞུད་ལམ་གསར་བར་འབད་པས་བསྐྱོད་དགོས་ན་བློ་སྤོབས་ཆེན་པོས་ལམ་དུ་ཆས་དགོས་པ་དང་། དཀའ་སྤྱད་དངོས་གཉེར་དེ་རང་རྟོགས་ཀྱི་བྱ་སྤྱོད་དུ་འགྱུར་བར་བྱེད་དགོས་ལ། འཐབ་རྩོད་བྱེད་ཕོད་པ་དང་འཐབ་རྩོད་བྱེད་མཁས་པ་དེ་གཤིས་སྤྱོད་གསལ་བོ་ཞིག་ཏུ་འགྱུར་བར་བྱས་ཏེ། འཐབ་རྩོད་སྙིང་སྟོབས་དར་སྤེལ་དང་འཐབ་རྩོད་ནུས་པ་ཇེ་དྲག་ཏུ་བཏང་ནས་ཚད་མཐའི་འདུ་ཤེས་ཆགས་པར་བྱེད་པ་དང་། ཤུགས་ཆེན་པོས་མདུན་བསྐྱོད་བགྲོད་ལམ་སྟེང་གི་དཀའ་ཁག་དང་འགྲན་རྩོད་སྣ་ཚོགས་ལས་རྣམ་པར་རྒྱལ་བར་བྱས་ནས། དམངས་སེམས་གཅིག་མཐུན་དང་ཡིད་ཆེས་ཆེན་པོས་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ལ་གྲུབ་འབྲས་གསར་བ་ཐོབ་པར་བྱེད་དགོས་ཟེར།
ཁྲིན་ཀང་གིས་ཞིང་ཆེན་ཡོངས་ཀྱི་རིམ་པ་སོ་སོའི་ཏང་ཨུས་སྔར་ལས་ལྷག་པའི་སྒོག་ནས་དམངས་ཆེན་བྱ་བའི་ཕྱོགས་ཡོངས་ཀྱི་མགོ་ཁྲིད་ལ་ཤུགས་སྣོན་དང་ལེགས་བཅོས་བྱས་ཏེ། དམངས་ཆེན་གྱིས་བྱ་བ་སྤེལ་བ་དང་དམངས་ཆེན་འཐུས་མིས་ཁྲིམས་ལྟར་ལས་འགན་ལག་བསྟར་བྱེད་པར་ཆབ་སྲིད་ཀྱི་འགན་སྲུང་བརྟན་པོ་འདོན་སྤྲོད་བྱེད་དགོས་པ་དང་། རིམ་པ་སོ་སོའི་དམངས་ཆེན་དང་དེའི་རྒྱུན་ལས་ཨུ་ཡོན་ལྷན་ཁང་གིས་ནན་ཏན་གྱིས་བརྒྱུད་རིམ་ཧྲིལ་བོའི་མི་དམངས་དམངས་གཙོ་ལག་ལེན་བྱེད་པ་དང་། ཟོལ་མེད་ཀྱིས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་ཞིང་ཆེན་ཏང་ཨུའི་རེ་བ་དེ་ཞིང་ཆེན་ཡོངས་ཀྱི་ལས་བྱེད་པ་དང་མང་ཚོགས་ཀྱི་གཅིག་གྱུར་བྱ་སྤྱོད་དུ་བསྒྱུར་དགོས་ལ། རིམ་པ་སོ་སོའི་སྲིད་གཞུང་དང་ཏང་ཨུ། ཁྲིམས་ཁང་དང་ཞིབ་དཔྱོད་ཁང་བཅས་ཀྱིས་རང་རྟོགས་སྒོས་དམངས་ཆེན་གྱི་ལྟ་རྟོག་དང་ལེན་བྱེད་པ་དང་། ཁྲིམས་ལྟར་སྲིད་སྐྱོང་བ་དང་ཁྲིམས་ལྟར་ལྟ་ཞིབ་བྱེད་པ། དྲང་བདེན་གྱི་ཁྲིམས་འཛིན་ཆུ་ཚད་བཅས་མཐོར་འདེགས་གཏོང་དགོས་པའི་རེ་བ་བཏོན།
ཚོགས་ཆེན་ནས་མཚོ་སྔོན་གྱི་འདས་སོང་ལོ་ཟླའི་ནང་ང་ཚོ་ཐུན་མོང་གི་གཟི་འོད་ཡོད་པ་དང་། མཚོ་སྔོན་གྱི་མཛེས་སྡུག་གི་མ་འོངས་པར་ད་རུང་ང་ཚོས་མུ་མཐུད་དུ་འབད་འཐབ་བྱེད་དགོས། ང་ཚོས་སྔར་ལས་ལྷག་པའི་སྒོ་ནས་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་ཉེ་འཁོར་དུ་མཐུན་སྒྲིལ་དམ་ཟབ་བྱས་ཏེ། སྔར་ལས་ཡིད་ཆེས་བརྟན་པོ་དང་འབད་འཐབ་ཀྱི་བློ་སྤོབས་ཆེན་པོ། དངོས་གཉེར་གྱི་བྱ་སྤྱོད་བཅས་ཀྱིས་མཐུན་སྒྲིལ་གཅིག་སེམས་དང་དཀའ་སྤྱད་དངོས་གཉེར་བྱས་ནས། ཤུགས་ཆེན་པོས་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་མཚོ་སྔོན་གྱི་ལེའུ་འབྲི་དགོས་པའི་འབོད་སྐུལ་བཏང་།
ཞིང་ཆེན་དམངས་ཆེན་སྐབས་བཅུ་གསུམ་པའི་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་དང་། ཞིང་ཆེན་མི་དམངས་སྲིད་གཞུང་གི་ཧྲིན་ཀྲང་གཞོན་པ། སྐབས་བཅུ་གསུམ་པའི་ཞིང་ཆེན་སྲིད་གྲོས་ཀྱི་ཀྲུའུ་ཞི་གཞོན་པ། མཚོ་སྔོན་དུ་སྡོད་པའི་འབྲེལ་ཡོད་འབུམ་དམག་རིམ་པའི་དམག་དཔུང་། ཞིང་ཆེན་མཐོ་རིམ་མི་དམངས་ཁྲིམས་ཁང་། ཞིང་ཆེན་མི་དམངས་ཞིབ་དཔྱོད་ཁང་། དྲག་ཆས་ཉེན་རྟོག་མཚོ་སྔོན་སྤྱི་ཁྱབ་རུ་ཁག་བཅས་ཀྱི་འགན་ཁུར་བློ་མཐུན་གཙོ་བོ། ཚོགས་ཆེན་གྱི་ཀྲུའུ་ཞི་ཚོགས་པའི་ཁོངས་མི་སོགས་ཚོགས་ཆེན་ལ་ཞུགས་པའམ་ཟུར་ཞུགས་བྱས་པར་མ་ཟད་ཀྲུའུ་ཞིའི་སྟེགས་བུའི་སྟེང་བསྡད་ཡོད།
ཞིང་ཆེན་དམངས་ཆེན་སྐབས་བཅུ་གསུམ་པའི་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་དང་། ཞིང་ཆེན་ཏང་ཨུའི་འབྲེལ་ཡོད་སྡེ་ཁག་གི་འགན་ཁུར་བློ་མཐུན། ཚོགས་ཆེན་གྱི་དྲུང་ཡིག་ཆེན་མོ་གཞོན་པ། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་དོན་གཅོད་ལས་ཁུངས། བྱ་བའི་ལས་ཁུངས་ཀྱི་འགན་ཁུར་བློ་མཐུན། ཞིང་ཆེན་སྲིད་གཞུང་གི་ཁོངས་གཏོགས་སྡེ་ཁག་གི་འགན་ཁུར་བློ་མཐུན། ཞིང་ཆེན་ལྟ་ཞིབ་ཨུ་ཡོན་ལྷན་ཁང་གི་ཀྲུའུ་རིན་གཞོན་པ། ཞིང་ཆེན་མཐོ་རིམ་མི་དམངས་ཁྲིམས་ཁང་གི་ཡོན་ཀྲང་གཞོན་པ། ཞིང་ཆེན་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན་པོ་གཞོན་པ་བཅས་ཚོགས་ཆེན་ལ་ཟུར་ཞུགས་བྱས།
ཚོགས་ཆེན་དེ་རྔམ་བརྗིད་ལྡན་པའི་རྒྱལ་གླུའི་ཁྲོད་གྲོལ་བ་རེད།
བཀྲ་ཤིས་འབུམ་དང་བསོད་ནམས་ཚེ་རིང་གིས་བསྒྱུར།
