ཉེ་ལམ། ཀྲུང་གུང་ཀྲུང་དབྱང་གིས《ཀྲུང་གོ་གུང་ཁྲན་ཏང་གིས་སྒྲིག་འགལ་ཏང་ཡོན་ལ་ཆད་པ་གཅོད་པའི་ཆོག་མཆན་དབང་ཆ་དང་གོ་རིམ་གཏན་འབེབས》ཞེས་པ་པར་སྐྲུན་འགྲེམས་སྤེལ་བྱས་ཏེ། ཆེད་དུ་བརྡ་ཐོ་བཏང་ནས་ས་གནས་དང་སྡེ་ཁག་སོ་སོས་ལག་བསྟར་ནན་ཏན་བྱེད་དགོས་པའི་བླང་བྱ་བཏོན།
བརྡ་ཐོ་ལས་བསྟན་དོན། 《གཏན་འབེབས》ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་བཟུང་ནས། ཏང་གི་སྒྲིག་ཡིག་རྩ་བའི་གཞི་འཛིན་སར་བརྩིས་ཏེ། ཏང་གི་ཚོགས་ཆེན་བཅོ་བརྒྱད་པ་འཚོགས་པའི་ཚུན་གྱི། ཏང་གིས་ཏང་ལ་དོ་དམ་དང་ཏང་བཅོས་སྐྱོང་བྱས་པའི་ལག་ལེན་དང་ལམ་ལུགས་གསར་གཏོད་ཀྱི་གྲུབ་འབྲས་ལ་ཕྱོགས་བསྡོམས་དང་བསྡུ་ལེན་བྱས་ནས། ཏང་གི་རིམ་པ་སོ་སོ་དང་རིགས་སོ་སོའི་རྩ་འཛུགས་ཀྱིས་སྒྲིག་ཁྲིམས་ལ་འགལ་བའི་ཏང་ཡོན་ལ་ཆད་པ་གཅོད་པའི་ཆོག་མཆན་དབང་ཆ་དང་གོ་རིམ་ཐད་ལ་བརྒྱུད་རིམ་ལྡན་པའི་ངང་ནས་ཚད་ལྡན་ཅན་དང་གཏན་འབེབས་གསལ་པོ་བྱས་ཡོད་པས། དེས་རང་རེའི་ཏང་གིས་རང་ཉིད་གསར་བརྗེ་བྱེད་ཕོད་པའི་གཤིས་རྒྱུད་གསལ་པོ་གང་ལེགས་སྒོས་མཚོན་ཡོད་ཅིང་། ཕྱོགས་ཡོངས་ནས་ཏང་བཅོས་སྐྱོང་ནན་མོ་བྱེད་པའི་འཐབ་ཇུས་དང་བྱེད་ཕྱོགས་ལག་བསྟར་གཏིང་ཟབ་བྱེད་པ་དང་། སྒྲིག་སྲོལ་ལྟར་ཏང་སྐྱོང་བའི་ལས་དོན་ལ་སྐུལ་འདེད་གཏིང་ཟབ་གཏོང་རྒྱུའི་ཐད་ནས་བཤད་ན་དོན་སྙིང་གལ་ཆེན་ལྡན།
བརྡ་ཐོ་ལས་བླང་བྱ་བཏོན་དོན། རིམ་པ་སོ་སོའི་ཏང་ཨུ་དང་ཏང་ཙུའུ་ཡིས“སྲུང་སྐྱོབ་གཉིས”མཐའ་གཅིག་ཏུ་སྒྲུབ་ཐུབ་པར་བྱེད་རྒྱུ་དེ་ཆབ་སྲིད་ཀྱི་རྩ་དོན་ཆེ་ཤོས་དང་རྩ་བའི་ཆབ་སྲིད་ཀྱི་འགན་འཁྲི་ཞིག་ཏུ་བརྩིས་ནས། ཏང་གི་སྒྲིག་ཁྲིམས་འཛུགས་སྐྲུན་ལ་ཁྱོན་ཡོངས་ནས་ཤུགས་སྣོན་པ་དང་། ཏང་སྲོལ་སྲིད་གཙང་འཛུགས་སྐྲུན་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལ་བློ་བརྟན་འགྱུར་མེད་ངང་སྐུལ་འདེད་བཏང་སྟེ། ཏང་གི་བྱ་གཞག་དང་ཏང་ཡོན། ལས་བྱེད་པ་བཅས་ལ་ཚད་མཐོའི་འགན་འཁུར་བའི་རྣམ་འགྱུར་བཟུང་ནས། ཏང་གི་སྒྲིག་ཁྲིམས་བརྩི་སྲུང་དང་སྲུང་སྐྱོབ། ལག་བསྟར་བཅས་བྱེད་དགོས། 《གཏན་འབེབས》ལ་སློབ་སྦྱོང་བྱེད་པ་དང་དེ་དྲིལ་སྒྲོག་བྱེད་པ། ལག་བསྟར་དོན་འཁྱོལ་བྱེད་པ་བཅས་ལ་དམ་འཛིན་ཡག་པོ་བྱས་ཏེ། 《གཏན་འབེབས》འདི་ཉིད་ཏང་ཨུ་དང་ཏང་ཙུའུ་ཡི་གཞུང་ལུགས་སློབ་སྦྱོང་ལྟེ་གནས་ཚན་ཁག་གི་སློབ་སྦྱོང་ལས་དོན་ཁྲོད་བཅུག་ནས། ཀུན་གྱི་སྣེ་ཁྲིད་དེ《གཏན་འབེབས》ལག་བསྟར་ནན་མོ་བྱེད་དགོས། རིམ་པ་སོ་སོའི་སྒྲིག་ཁྲིམས་ཞིབ་བཤེར་ལས་ཁུངས་ཀྱིས་ཏང་གི་སྒྲིག་ཡིག་དང《གཏན་འབེབས》ཁྲོད་གཏན་འཁེལ་བྱས་པའི་ལས་འགན་དང་འགན་འཁྲི་ནན་ཏན་ངང་བསྒྲུབས་ནས། 《གཏན་འབེབས》ལྟར་དུ་སྒྲིག་ཁྲིམས་ཀྱི་ཆད་གཅོད་དབང་ཆ་བཀོལ་དགོས། ཏང་གི་སྒྲིག་ཁྲིམས་ཀྱི་ཆད་པ་གཅོད་པར་ཆོག་མཆན་སྟེར་བའི་དབང་ཆ་དང་། ལས་བྱེད་པའི་མི་དོན་དོ་དམ་གྱི་དབང་ཆ་དང་གཞི་རྩའི་དོ་མཉམ་བཅས་ཀྱི་རྩ་དོན་ལྟར་དུ། ལྟ་ཞིབ་ལས་ཁུངས་ཀྱིས་སྲིད་དོན་ཆད་གཅོད་ལ་སྤྲོད་པའི་ཆོག་མཆན་འགོད་པའི་དབང་ཆ་དང་གོ་རིམ་སྔར་ལས་འཐུས་ཚང་དུ་བཏང་སྟེ། སྒྲིག་འཛིན་ཁྲིམས་བསྟར་འབྲེལ་མཐུད་ཡོང་བར་འགན་ལེན་ནན་མོ་བྱེད་པ་དང་། ལྟ་སྐུལ་འགན་སྲུང་ལག་བསྟར་དང་གོང་སྤེལ་གྱི་ནུས་པ་འདོན་སྤེལ་གང་ལེགས་བྱེད་དགོས། ས་གནས་དང་སྡེ་ཁག་སོ་སོས《གཏན་འབེབས》ལག་བསྟར་བྱེད་པའི་སྐབས་ཀྱི་གནས་ཚུལ་དང་གྲོས་འགོ་གལ་ཆེན་དུས་ཐོག་ཏུ་ཏང་ཀྲུང་དབྱང་ལ་སྙན་ཞུ་འབུལ་དགོས།
བན་དེ་སྐྱབས་ཀྱིས་བསྒྱུར།
