རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཚེས་བཅུ་གསུམ་ཉིན་འགོ་འཛིན་བྱས་ཏེ་བཞུགས་མོལ་ཚོགས་འདུ་བསྡུས་ནས། དམངས་གཙོ་ཏང་ཁག་སོ་སོའི་ཀྲུང་དབྱང་དང་རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་འགན་ཁུར་བ། ཏང་ཁག་གང་ལའང་མི་གཏོགས་པའི་མི་སྣའི་འཐུས་མི་བཅས་ཀྱིས་སྲིད་གཞུང་བྱ་བའི་སྙན་ཞུའི་བསམ་འཆར་བསྡུ་ལེན་མ་ཡིག་ཐད་བཏོན་པའི་བསམ་འཆར་དང་གྲོས་གཞི་ལ་ཉན།
རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཧན་ཀྲིན་ཚོགས་འདུར་ཞུགས།
ཀྲུང་གོ་གོ་མིན་ཏང་གསར་བརྗེ་ཨུ་ཡོན་ལྷན་ཁང་ཀྲུང་དབྱང་གི་ཀྲུའུ་ཞི་ཀྲིན་ཅན་པང་དང་། ཀྲུང་གོ་དམངས་གཙོ་མནའ་མཐུན་ཀྲུང་དབྱང་གི་ཀྲུའུ་ཞི་ཏེན་ཀྲུང་ལིས། ཀྲུང་གོ་དམངས་གཙོ་རྒྱལ་འཛུགས་ལྷན་ཚོགས་ཀྲུང་དབྱང་གི་ཀྲུའུ་ཞི་ཧའོ་མེན་ཅིན། ཀྲུང་གོ་དམངས་གཙོ་ཡར་སྐུལ་ལྷན་ཚོགས་ཀྲུང་དབྱང་གི་ཀྲུའུ་ཞི་ཚའེ་ཏ་ཧྥིན། ཞིང་བཟོ་ཏང་ཀྲུང་དབྱང་གི་ཀྲུའུ་ཞི་ཧི་ཝེ། ཀྲི་གུང་ཏང་ཀྲུང་དབྱང་གི་ཀྲུའུ་ཞི་ཅང་ཙོ་ཅུན། དགུ་གསུམ་སློབ་ཚོགས་ཀྲུང་དབྱང་གི་ཀྲུའུ་ཞི་ཝུའུ་ཝེ་ཧྭ། ཐའེ་ཝན་དམངས་གཙོ་མནའ་མཐུན་ཀྲུང་དབྱང་གི་ཀྲུའུ་ཞི་སུའུ་ཧོས། རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་ཀའོ་ཡུན་ལུང་། ཏང་ཁག་གང་ལའང་མི་གཏོགས་པའི་མི་སྣའི་འཐུས་མི་ཏོན་ཝུན་ཧོས་བཅས་ཀྱིས་གཏམ་བཤད་དེ། ན་ནིང་དང་འདས་པའི་ལོ་ལྔའི་རིང་གི་འཕེལ་རྒྱས་ཀྱི་གྲུབ་འབྲས་ལ་ཁས་ལེན་གང་ལེགས་བྱས་པར་མ་ཟད། བསམ་འཆར་དང་གྲོས་གཞི་བཏོན།
ལིས་ཁི་ཆང་གིས་བཤད་རྒྱུར། ཚང་མས་དུས་རྒྱུན་དུ་བློ་འདོན་ཇུས་འབུལ་བྱས་ཏེ། ཚན་རིག་དམངས་གཙོའི་ཇུས་ཆོད་ལ་ཡར་སྐུལ་བྱས་ཡོད། ན་ནིང་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་འགོ་ཁྲིད་བརྟན་པོའི་འོག་ཏུ། རང་རྒྱལ་གྱི་འཕེལ་རྒྱས་ཐད་གྲུབ་འབྲས་གསར་པ་ཐོབ་ཡོད། དཔལ་འབྱོར་འཁོར་སྐྱོད་ལ་རིམས་ནད་སོགས་སྔོན་དཔག་ལས་བརྒལ་བའི་རྒྱུ་རྐྱེན་གྱི་བརྡབ་གསིག་ཐེབས་ནའང་། ང་ཚོས་གཏན་ཕབ་སྲིད་ཇུས་སྔོན་ཚུད་ཀྱིས་ལག་བསྟར་བྱས་པ་དང་། དཔལ་འབྱོར་སྲིད་ཇུས་དང་མུ་འབྲེལ་བྱེད་ཐབས་རབ་དང་རིམ་པ་བཏོན་ལ། རྒྱལ་ཡོངས་ཀྱི་དཔལ་འབྱོར་གཞི་རྐང་བརྟན་པར་བྱེད་པའི་གྲོས་ཚོགས་བསྡུས་ཏེ། ཆེ་ཕྱོགས་སྲིད་ཇུས་ཀྱི་རྨང་རྐང་མཉམ་དུ་བརྟན་པོ་ཡོང་བར་བྱས་པས། དཔལ་འབྱོར་ལུགས་མཐུན་སྒོས་འཕར་སྣོན་བྱུང་ནས། ལོ་ཧྲིལ་བོར་གསར་དུ་ལས་ཞུགས་བྱས་པའི་མི་བྱེ་བ་གཅིག་དང་ས་ཡ་གཉིས་ལྷག་ལ་བུད་པ་དང་། ལོ་མཇུག་གི་དངོས་གོང་འཕར་ཚད་བརྒྱ་ཆའི་གཅིག་དང་གྲངས་ཆུང་བརྒྱད་ཡིན་པ་འདི་ནི་སླ་མོ་ཞིག་གཏན་ནས་མ་རེད།
ལིས་ཁི་ཆང་གིས་བཤད་རྒྱུར། ལོ་ལྔའི་རིང་ལ་ས་ཁུལ་སོ་སོ་དང་སྡེ་ཁག་སོ་སོས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་བཟུང་ནས་དཀའ་སེལ་འབད་བརྩོན་བྱས་པས། རང་རྒྱལ་གྱི་འཕེལ་རྒྱས་ཐད་གྲུབ་འབྲས་ཆེན་པོ་ཐོབ་ཡོད། དཔལ་འབྱོར་འཁོར་སྐྱོད་དེ་རྒྱལ་སྤྱིའི་སྟེང་ཉོ་ཚོང་རིང་ལུགས་ཀྱི་མགོ་བོ་དགྱེ་བ་དང་ལོ་གསུམ་གྱི་རིམས་ནད་ཀྱི་བརྡབ་གསིག་ཐེབས་པ་སོགས་འགྲན་སློང་གལ་ཆེན་དང་འཕྲད་ནའང་། ང་ཚོས་གནས་བབ་ཀྱི་འགྱུར་ལྡོག་དང་བསྟུན་ནས། ཆེ་ཕྱོགས་སྙོམ་སྒྲིག་གསར་གཏོད་བྱས་པ་དང་། བཅོས་སྒྱུར་སྒོ་འབྱེད་ལ་སྐུལ་འདེད་བཏང་ཞིང་། སྲིད་བསྡུ་དབང་གཏོང་ཟབ་སྤེལ་དང་དབང་གཏོང་དང་དོ་དམ་ཟུང་སྦྲེལ། ཞབས་ཞུའི་བཅོས་སྒྱུར་ལེགས་སྒྱུར་བཅས་བྱས་ཏེ། དམངས་ཚིས་འགན་སྲུང་དང་ལེགས་བཅོས་བྱས་པས། དཔལ་འབྱོར་ལོ་རེར་ཆ་སྙོམ་བརྒྱ་ཆའི་ལྔ་དང་གྲངས་ཆུང་གཉིས་ཀྱི་མྱུར་ཚད་མཐོ་འབྲིང་གི་ཚད་ལྟར་འཕར་བ་དང་། མཁར་གྲོང་དུ་གསར་དུ་ལས་ཞུགས་བྱས་པའི་མི་བྱེ་བ་གཅིག་དང་ས་ཡ་གཉིས་འབུམ་བདུན་ལྷག་ལ་སླེབས། དེ་དང་མཉམ་དུ་དཔལ་འབྱོར་བརྟན་བརླིང་ངང་འཁོར་སྐྱོད་བྱེད་པར་ཉེན་ཁ་དང་འགྲན་སློང་མི་ཉུང་བར་འཕྲད་ཡོད་པ་ཡང་ཤེས་དགོས་ཟེར།
ལིས་ཁི་ཆང་གིས་རང་རྒྱལ་གྱི་དཔལ་འབྱོར་འཁོར་སྐྱོད་དེ་ན་ནིང་གི་ལོ་མཇུག་ཏུ་བརྟན་པོ་བྱུང་བ་དང་། ད་ལོའི་ལོ་སྟོད་ལ་བསྐྱར་འཕར་བྱུང་ཡོད་པས། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་བཀོད་སྒྲིག་ལག་བསྟར་མཐའ་འཁྱོལ་བྱས་ཏེ། དཔལ་འབྱོར་བསྐྱར་དར་གྱི་རྣམ་པ་མུ་མཐུད་དུ་རྒྱ་བསྐྱེད་དགོས་ཟེར།
ཧུའུ་ཁྲུན་ཧྭ་དང་ལིའུ་ཧི། ཧྲི་ཐའེ་ཧྥིན། ཧི་ལིས་ཧྥིན། ཝེ་ཧྥིན་ཧི། ཝང་ཡུང་། ཝང་དབྱི། ཞའོ་ཅེ། ཀྲའོ་ཁི་ཀྲི། ཧྲའོ་ཧུང་བཅས་ཚོགས་འདུར་ཞུགས།
ཕྱུག་ལོས་བསྒྱུར།
