ཟླ་གཉིས་པའི་ཚེས་བཅུ་བཞི་ཉིན། ཞིང་ཆེན་ཡོངས་ཀྱི་དྲིལ་སྒྲོག་པུའུ་ཀྲང་གྲོས་ཚོགས་ཟི་ལིང་དུ་བསྡུས། ཞིང་ཆེན་ཏང་ཨུའི་རྒྱུན་ལས་ཨུ་ཡོན། དྲིལ་སྒྲོག་པུའུ་ཡི་པུའུ་ཀྲང་ཝང་ཏ་ནན་གྲོས་ཚོགས་ལ་ཞུགས་པར་མ་ཟད་གཏམ་བཤད།
གྲོས་ཚོགས་ནས་བསྟན་དོན། འདས་པའི་ལོ་གཅིག་གི་ནང་། ཞིང་ཆེན་ཡོངས་ཀྱི་དྲིལ་སྒྲོག་བསམ་བློ་འཐབ་ཕྱོགས་ཀྱིས་བརྗོད་དོན་དང་གཙོ་སྙིང་དང་དམ་པོར་སྦྲེལ་ཏེ། རང་འགུལ་སྒོས་འགན་འཁྲི་ཁག་ཁུར་བྱས་པ་དང་། རྨང་གཞི་སྲ་བརྟན་དང་ཞན་ཆ་ཁ་གསབ། བཟང་ཆ་རྒྱུན་འཁྱོངས་བྱས་ནས་བྱ་བ་སྣ་ཚོགས་ཐད་ལ་གསར་གཏོད་དང་སྲོལ་གསར་གྱིས་ཁེངས་པར་བྱས། ད་ལོར་ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་སློབ་སྦྱོང་དང་དྲིལ་སྒྲོག ལག་བསྟར་བཅས་བྱེད་པའི་གཙོ་སྙིང་ལ་དམ་པོར་དམིགས་པ་དང་། དུས་རབས་གསར་བའི་ཏང་གི་གསར་སྐྲུན་རིགས་གཞུང་གིས་བསམ་བློར་དྲག་ཆས་སྤྲས་པ་དང་མང་ཚོགས་ལ་སློབ་གསོ་གཏོང་བ། ལག་ལེན་ལ་མཛུབ་སྟོན་བྱེད་པའི་གཞི་རྩའི་ལས་འགན་ལ་དམ་པོར་དམིགས་ཏེ། རང་རྟོན་རང་བརྩོན་དང་གནད་ལ་འཕིགས་པ། དྲང་གཞག་བརྟན་བརླིང་སྒོས། གྲུབ་འབྲས་གསར་བ་ལེན་པ་རྒྱུན་འཁྱོངས་བྱེད་པ་དང་། གནད་ས་དམ་འཛིན་དང་དཀའ་གནད་ཁྱད་སེལ། བཟང་ཆ་གསར་སྐྲུན། ཚད་མཐའ་བརྟན་སྲུང་བྱེད་པ་འབུར་དུ་ཐོན་པར་བྱས་ནས། དྲིལ་སྒྲོག་བསམ་བློ་བྱ་བའི་སྤུས་ཚད་དང་མྱུར་ཚད་མཐོར་འདེགས་སུ་གཏོང་དགོས།
གྲོས་ཚོགས་ནས་བསྟན་དོན། རྒྱུན་འཁྱོངས་ལྷོད་མེད་སྒོས་ཏང་གི་གསར་སྐྲུན་རིགས་གཞུང་ལ་བརྟེན་ནས་སེམས་སྡུད་བློ་སྦྱོང་བྱེད་པ་དང་། ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་སློབ་སྦྱོང་དང་དྲིལ་སྒྲོག ལག་བསྟར་བཅས་བྱེད་དགོས་ལ། ཧུར་ཐག་སྒོས་དུས་རབས་གསར་བར་འབད་པས་བསྐྱོད་པའི་བསམ་བློའི་སྟོབས་ཤུགས་གཅིག་སྡུད་བྱེད་པ་དང་། ཤུགས་ཆེན་པོས་སྤྱི་ཚོགས་རིང་ལུགས་ཀྱི་སྲོག་ཤིང་རིན་ཐང་ལྟ་བ་གསོ་སྐྱོང་བྱེད་པ། ཏན་ཏིག་སྒོས་རིག་གནས་བཅོས་སྒྱུར་འཕེལ་རྒྱས་ལ་སྐུལ་འདེད་གཏོང་བར་མ་ཟད། གསོན་ཉམས་ལྡན་པའི་སྒོ་ནས་མཚོ་སྔོན་གྱི་གཏམ་རྒྱུད་ལེགས་པར་བརྗོད་པ་དང་། དྲིལ་སྒྲོག་རིག་གནས་གཡུལ་སའི་འཛུགས་སྐྲུན་ལ་ཤུགས་སྣོན་པ་དང་གྲངས་ཀ་ཅན་གྱི་ནུས་པས་བྱ་བའི་ཕན་འབྲས་འཕར་བར་སྐུལ་འདེད་གཏོང་བ་དང་། བློ་ཐག་རྦད་ཆོད་སྒོས་འདུ་ཤེས་འཛིན་སྟངས་ཀྱི་བདེ་འཇགས་འགོག་ར་སྲ་བརྟན་དུ་གཏོང་བ། ཕྱོགས་ཡོངས་ནས་བྱང་ཚད་མཐོ་བའི་དྲིལ་སྒྲོག་དཔུང་སྡེ་གསར་སྐྲུན་བྱས་ནས། དཀའ་སྤྱད་འབད་འཐབ་སྒོས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་བྱེད་པའི་མཚོ་སྔོན་གྱི་ལེའུ་འབྲི་བར་སྟོབས་དང་ལྡན་པའི་བསམ་བློའི་ཁག་ཐེག་དང་བསམ་བློའི་སྟོབས་ཤུགས་ཆེན་པོ་འདོན་སྤྲོད་བྱེད་དགོས།
གྲོས་ཚོགས་ནས་རང་ཞིང་དུ་རྒྱལ་ཡོངས་བསམ་པའི་དཔལ་ཡོན་འཛུགས་སྐྲུན་གྱི་གཅིག་ཅན་ལྔ་ཡི་བཟོ་སྐྲུན་བྱ་དགའ་དང་ཀྲུང་གོའི་གསར་འགྱུར་བྱ་དགའ། ཁྲང་ཅང་ཐའོ་ཧྥིན་བྱ་དགའ། ལུའུ་ཞུན་རིག་གཞུང་བྱ་དགའ། དེ་མིན་མཚོ་སྔོན་ཞིང་ཆེན་བསམ་པའི་དཔལ་ཡོན་འཛུགས་སྐྲུན་གྱི་གཅིག་ཅན་ལྔ་ཡི་བཟོ་སྐྲུན་བྱ་དགའ་དང་མཚོ་སྔོན་གསར་འགྱུར་བྱ་དགའ་བཅས་ཐོབ་པའི་བརྩམས་ཆོས་དང་མི་སྒེར་ཁྱབ་སྒྲོག་བྱས་པ་དང་། གྲོང་ཁྱེར་དང་ཁུལ་སོ་སོའི་ཏང་ཨུའི་དྲིལ་སྒྲོག་པུའུ་དང་ཞིང་ཆེན་ཐད་གཏོགས་དྲིལ་སྒྲོག་རིག་གནས་ཁོངས་གཏོགས་ཀྱི་ལས་ཁུངས་སོ་སོས་ལོ་ཧྲིལ་བོར་བྱ་བ་བསྒྲུབས་པའི་གནས་ཚུལ་ཡར་ཞུ་བྱས།
བཀྲ་ཤིས་འབུམ་གྱིས་བསྒྱུར།
