གསར་འགོད་པས་ཟླ་གཉིས་པའི་ཚེས་བཅུ་དྲུག་ཉིན་ནས་ཚེས་བཅུ་བདུན་ཉིན་བར་འཚོགས་པའི་ཉིས་སྟོང་ཉེར་གསུམ་ལོའི་རྒྱལ་ཡོངས་ཀྱི་སྐྱེ་ཁམས་ཁོར་ཡུག་སྲུང་སྐྱོབ་བྱ་བའི་ཚོགས་འདུའི་སྟེང་རྒྱུས་ལོན་བྱུང་བ་ལྟར་ན།

སྐྱེ་ཁམས་ཁོར་ཡུག་པུའུ་ཡི་འབྲེལ་ཡོད་འགན་འཁུར་པས་བསྟན་དོན། ཉིས་སྟོང་ཉེར་གཉིས་ལོར་རྒྱལ་ཡོངས་ཀྱི་འབག་བཙོག་དངོས་པོ་གཙོ་བོ་ཕྱིར་འབུད་བྱེད་ཚད་མུ་མཐུད་མར་ཆག་པ་དང་། སྐྱེ་ཁམས་ཁོར་ཡུག་གི་སྤུས་ཚད་ཇེ་ལེགས་སུ་གཏོང་བའི་དམིགས་འབེན་བདེ་བླག་ངང་ཡོངས་འགྲུབ་བྱས་ཡོད་ལ། སྐྱེ་ཁམས་ཁོར་ཡུག་སྲུང་སྐྱོབ་ལས་དོན་ལ་ཐོབ་དཀའ་བའི་གྲུབ་འབྲས་གསར་པ་ཐོབ་ཡོད་ཟེར།

ཉིས་སྟོང་ཉེར་གཉིས་ལོར་སྐྱེ་ཁམས་ཁོར་ཡུག་གི་སྤུས་ཚད་རྒྱུན་མཐུད་ངང་ཇེ་ལེགས་སུ་གཏོང་ཆེད། རྒྱལ་ཡོངས་ཀྱི་གྲོང་ཁྱེར་ཉེར་ལྔ་གསར་དུ་བསྣན་ནས་བྱང་ཕྱོགས་ས་ཁུལ་གྱི་དག་གཙང་དྲོད་ལེན་རྒྱབ་སྐྱོར་ཁྱབ་ཁོངས་ནང་བཅུག་སྟེ།  རིམ་རྩིས་བྱས་ན་ངར་ལྕགས་ཀྱི་ཐོན་ནུས་བསྡོམས་འབོར་ཏུན་དུང་ཕྱུར་གཉིས་དང་བྱེ་བ་གཅིག་ཟིན་པའི་བརྒྱུད་རིམ་ཧྲིལ་པོའི་བཙོག་འབུད་ཇེ་དམའ་རུ་གཏོང་བའི་སྒྱུར་བཀོད་དང་། ཡལ་སླའི་རང་བཞིན་གྱི་སྐྱེ་ལྡན་དངོས་པོ་ཁྲི་བཞི་དང་སྟོང་དྲུག་ལྷག་གི་མངོན་གསལ་དོད་པའི་གནད་དོན་བཅོས་སྒྲིག་བྱས།

དུས་མཚུངས་སུ། སྐྱེ་ཁམས་ཁོར་ཡུག་སྡེ་ཁག་གིས་འབྲི་ཆུ་དང་རྨ་ཆུ། པོ་ཧའེ་རྒྱ་མཚོ་བཅས་ཀྱི་གཙང་བོ་དང་རྒྱ་མཚོའི་ནང་བཙོག་འབུད་བྱེད་ཚད་ལ་རྩིས་བཤེར་དང་བཅོས་སྒྲིག་བྱེད་པར་མུ་མཐུད་སྐུལ་འདེད་བཏང་བ་དང་། རྨ་ཆུའི་འབབ་རྒྱུད་ཀྱི་ལོ་རྒྱུས་ཀྱིས་བཞག་པའི་གཏེར་རིའི་འབག་བཙོག་གནས་ཚུལ་ལ་བརྟག་དཔྱད་དང་དེར་དཔྱད་འཇོག་བྱེད་མགོ་བརྩམས་ལ། རྫོང་ཁོངས་དང་དེ་བཞིན་རྫོང་དང་གྲོང་ཁྱེར་རིམ་པའི་བཙོག་ཆུ་དང་ཆུ་རུལ་བཅོས་སྒྲིག་བྱ་རྒྱུར་སྐུལ་འདེད་བཏང་ཞིང་། ཡུལ་ཚོ་དང་གྲོང་རྡལ་རིམ་པའི་གཅིག་སྡུད་རྣམ་པ་ཡི་འཐུང་ཆུའི་ཆུ་འགོ་སྲུང་སྐྱོབ་ཁུལ་དབྱེ་འབྱེད་གསལ་བོ་བྱས་པ་དང་། མཚོ་ནང་དུ་བཞུར་བའི་ཆུའི་སྤུས་ཚད་ཇེ་ལེགས་སུ་བཏང་བ་བཅས་ཀྱི་བྱ་སྤྱོད་སྤེལ་བར་མ་ཟད། ད་དུང་ཞིང་བཀོལ་ས་ཞིང་གི་ཀལ་སོགས་ལྕི་བའི་ལྕགས་རིགས་ཀྱི་འབག་བཙོག་འབྱུང་རྩ་ནས་འགོག་བཅོས་བྱེད་པའི་བྱ་སྤྱོད་ཀྱང་སྤེལ། རྒྱལ་ཡོངས་སུ་སྲིད་འཛིན་གྲོང་ཚོ་ཁྲི་གཅིག་དང་སྟོང་དྲུག་གི་ཁོར་ཡུག་བཅོས་སྒྲིག་བྱས་པ་དང་། འབག་བཙོག་དངོས་པོ་གསར་པ་རིགས་བཅུ་བཞི་གཙོ་གནད་དོ་དམ་ཚོད་འཛིན་གྱི་གསལ་ཁྲའི་ནང་བཅུག་ཡོད།

བན་དེ་སྐྱབས་ཀྱིས་བསྒྱུར།