ཟླ་གཉིས་པའི་ཚེས་ཉེར་བཞི་ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་ལྕམ་མོ་ཕིན་ལིས་ཡོན་གྱིས་ཏེའོ་ཡུས་ཐའེ་རྒྱལ་མགྲོན་ཁང་དབྱང་ཡོན་ཤག་ཏུ་ཁམ་ཕུ་ཁྲེའི་རྒྱལ་པོ་ཞི་ཧ་མོ་ཉི་དང་རྒྱལ་ཡུམ་མོ་ཉི་ལེ་ལ་བྱམས་བརྩེའི་ངང་མཇལ་འཕྲད་གནང་།
ཞི་ཅིན་ཕིང་གིས་རྒྱལ་པོ་ཞི་ཧ་མོ་ཉི་དང་རྒྱལ་ཡུམ་མོ་ཉི་ལེ་གཉིས་པེ་ཅིང་དུ་ལུས་ཕུང་བརྟག་དཔྱད་དང་ལུས་ཁམས་གསོ་བར་ཕེབས་པ་ལ་དགའ་བསུ་ཞུས། ཞི་ཅིན་ཕིང་གིས་ཀྲུང་གོ་དང་ཁམ་ཕུ་ཁྲེ་ཡི་བར་འབྲེལ་བ་བཙུགས་ནས་ལོ་རེ་ལྔ་འཁོར་བའི་རིང་ལ། རྒྱལ་སྤྱིའི་གནས་ཚུལ་ལ་འགྱུར་ལྡོག་ཇི་ལྟར་བྱུང་རུང་། ཀྲུང་གོ་དང་ཁམ་ཕུ་ཁྲེ་བར་གྱི་མཛའ་མཐུན་ཡུན་ནས་ཡུན་དུ་ཇེ་ཟབ་ཏུ་ཕྱིན་ནས། ཀྲུང་གོ་དང་ཁམ་ཕུ་ཁྲེ་བར་གྱི་འབྲེལ་བ་དེ་རྒྱལ་སྤྱིའི་འབྲེལ་བའི་དཔེ་མཚོན་ཞིག་ཏུ་གྱུར་ཡོད། ཆུ་འཐུང་དུས་ཆུ་འགོ་བརྗེད་མི་རུང་བ་ནང་བཞིན་གྲུབ་འབྲས་འདི་དག་ནི། ཀྲུང་གོའི་མགོ་ཁྲིད་རྒན་རབས་པ་དང་གོང་མ་ཞི་ཧ་ནུའུ་ཁི་རྣམ་གཉིས་ཀྱིས་མནའ་མཐུན་བསྒྲིགས་པ་དང་གསོ་སྐྱོང་བྱས་པའི་མཛའ་མཐུན་ཟབ་མོ་ལས་བྱུང་བ་ཞིག་ཡིན། རྒྱལ་པོ་དང་རྒྱལ་ཡུམ་མཆོག་ནི་ཀྲུང་གོའི་བཅོས་སྒྱུར་འཕེལ་རྒྱས་དངོས་སུ་བརྒྱུད་མྱོང་མཁན་དང་དེའི་དཔང་པོ་ལྟ་བུ་ཡིན་ལ། ཐོག་མཐའ་བར་གསུམ་དུ་ཀྲུང་གོའི་འཕེལ་རྒྱས་ལ་དོ་ཁུར་བྱས་དང་བྱེད་བཞིན་ཡོད་ལ། ཀྲུང་གོ་མི་དམངས་ཀྱི་གྲོགས་པོ་བཟང་པོ་ཡིན། ཉིས་སྟོང་ཉི་ཤུ་ལོར་ངས་རྒྱལ་ཡུམ་མཆོག་ལ“མཛའ་མཐུན་གྱི་གཟེངས་རྟགས”གནང་བ་དེ་ནི། བཙུན་མོ་མཆོག་གིས་རྒྱལ་ཁབ་གཉིས་ཀྱི་མཛའ་མཐུན་བྱ་གཞག་ལ་དམིགས་བསལ་གྱི་བྱས་རྗེས་བཞག་པར་ཐུགས་རྗེ་ཆེ་ཞུས་པ་ཞིག་ཡིན། ང་ཚོས་ཀྲུང་གོ་དང་ཁམ་ཕུ་ཁྲེ་ཡི་མཛའ་མཐུན་སྲོལ་བཟང་རྒྱུན་འཛིན་བྱས་ནས། ཀྲུང་གོ་དང་ཁམ་ཕུ་ཁྲེ་ཡི་ལས་སྐལ་གཅིག་མཐུན་ཚོགས་པའི་ལེའུ་གསར་པ་ཞིག་རྩོམ་དགོས་ཞེས་གསུངས།
ཞི་ཅིན་ཕིང་གིས་ཀྲུང་གོ་གུང་ཁྲན་ཏང་གིས་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ལ་ཁྱོན་ཡོངས་ནས་སྐུལ་འདེད་གཏོང་བཞིན་ཡོད། དུས་རབས་གསར་པ་དང་སྐྱོད་ལམ་གསར་པའི་སྟེང་དུ། ང་ཚོས་ཞི་བདེ་འཕེལ་རྒྱས་དང་མཉམ་ལས་གཉིས་ཕན་རྒྱུན་འཁྱོངས་བྱེད་ཀྱིན་ཡོད། ཀྲུང་གོ་ཕྱོགས་ཀྱིས་ཁམ་ཕུ་ཁྲེ་ཕྱོགས་དང་མཉམ་དུ། “རྡོ་རྗེ་ཕ་ལམ་ལྟར་བརྟན་པའི”མཉམ་ལས་སྒྲོམ་གཞི་འབད་པས་བསྐྲུན་ནས། ཁམ་ཕུ་ཁྲེ་ཡིས“བཟོ་ལས་འཕེལ་རྒྱས་ཀྱི་བར་ཁྱམས”དང“ཉ་དང་བཟའ་འབྲས་ཀྱི་བར་ཁྱམས”བསྐྲུན་རྒྱུར་རྒྱབ་སྐྱོར་བྱས་ནས། ཀྲུང་གོ་དང་ཁམ་ཕུ་ཁྲེ་ཡི་ལས་སྐལ་གཅིག་མཐུན་ཚོགས་པ་མགྱོགས་མྱུར་ངང་བསྐྲུན་འདོད་ཡོད། ཀྲུང་གོ་ཕྱོགས་ཀྱིས་ཁམ་ཕུ་ཁྲེ་ཡིས“རྒྱལ་པོའི་ལས་དོན་རུ་ཁག”གི་བྱ་གཞག་སྤེལ་རྒྱུར་མུ་མཐུད་རྒྱབ་སྐྱོར་བྱས་ནས། ཁམ་ཕུ་ཁྲེ་ཡི་མང་ཚོགས་ལ་སྔར་ལས་ལྷག་པའི་བདེ་སྐྱིད་བསྐྲུན་རྒྱུ་ཡིན་ཞེས་ནན་གྱིས་གསུངས།
རྒྱལ་པོ་ཞི་ཧ་མོ་ཉི་དང་རྒྱལ་ཡུམ་མོ་ཉི་ལེ་ཡིས་བཤད་རྒྱུར། ཀྲུའུ་ཞི་ཞི་ཅིན་ཕིང་དང་དགེ་རྒན་ཆེན་མོ་ཕིན་ལིས་ཡོན་གྱིས་ང་ཚོས་ཀྲུང་གོ་རུ་ལུས་ཕུང་བརྟག་དཔྱད་དང་ཁམས་གསོའི་ལས་དོན་ལ་བཀོད་སྒྲིག་ཞིབ་ཚགས་དང་ལྟ་སྐྱོང་ཞིབ་ཚགས་གནང་བར་ཐུགས་རྗེ་ཆེ་ཞུས་པ་ཡིན། དུས་ཡུན་རིང་པོར་ཀྲུང་གོས་ཁམ་ཕུ་ཁྲེ་ལ་སྒེར་སེམས་མེད་པའི་སྒོ་ནས་རོགས་རམ་དང་རྒྱབ་སྐྱོར་གནང་བར་ཁམ་ཕུ་ཁྲེ་ཕྱོགས་ཀྱིས་སྙིང་ཁོང་ནས་ཐུགས་རྗེ་ཆེ་ཞུས་པ་ཡིན། ང་ཚོས་ཐོག་མཐའ་བར་གསུམ་དུ་ཀྲུང་གོའི་འཕེལ་རྒྱས་ལ་དོ་ཁུར་ཆེན་པོ་བྱས་ནས། ཀྲུང་གོས་བླངས་པའི་གྲུབ་འབྲས་ལ་སྙིང་ཁོང་ནས་དགའ་སྤྲོ་ཚད་མེད་སྐྱེས་ཡོད། ཁམ་ཕུ་ཁྲེ་ཕྱོགས་ཀྱིས་ཀྲུའུ་ཞི་ཞི་ཅིན་ཕིང་གིས་བཏོན་པའི“རྒྱུད་གཅིག་ལམ་གཅིག”གི་གྲོས་འགོ་དང་མིའི་རིགས་ཀྱི་ལས་སྐལ་གཅིག་མཐུན་ཚོགས་པའི་འདུ་ཤེས་ལ་བསྔགས་བརྗོད་བྱེད་ཀྱིན་ཡོད། ཀྲུང་གོ་ཕྱོགས་དང་མཉམ་དུ་རྒྱལ་ཁབ་གཉིས་བར་འབྲེལ་བ་བཙུགས་ནས་ལོ་རེ་ལྔ་འཁོར་བ་གོ་སྐབས་སུ་བྱས་ཏེ། ཁྱབ་ཁོངས་ཁག་གི་མཛའ་མཐུན་བརྗེ་རེས་དང་མཉམ་ལས་གཏིང་ཟབ་ཏུ་བཏང་ནས། རྒྱལ་ཁབ་གཉིས་ཀའི་སྲོལ་རྒྱུན་མཛའ་མཐུན་མི་རབས་ནས་མི་རབས་བར་རྒྱུན་འཛིན་བྱེད་འདོད་ཡོད་ཅེས་བསྟན།
ཝང་དབྱི་སོགས་མཇལ་འཕྲད་ལ་ཞུགས།
