ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་དང་། ཀྲུང་དབྱང་དཔལ་འབྱོར་བྱ་བའི་གྲོས་ཚོགས་ཀྱི་དགོངས་དོན། ཞིང་ཆེན་ཏང་གི་འཐུས་མིའི་ཚོགས་ཆེན་ཐེངས་བཅུ་བཞི་པའི་དགོངས་དོན་བཅས་ལ་སློབ་སྦྱོང་གཏིང་ཟབ་བྱེད་པ་དང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་ཁེ་ལས་ལ་རོགས་སྐྱོར་བྱས་ཏེ་དཀའ་ངལ་སེལ་རོགས་བྱེད་པའི་ཕྱོགས་སོ་སོའི་བྱ་བའི་རེ་བ་དངོས་འབེབ་དོན་འཁྱོལ་བྱེད་པའི་ཆེད་དུ། ཟླ་གསུམ་པའི་ཚེས་བཅུ་གསུམ་ཉིན་ནས་ཚེས་བཅུ་བཞི་ཉིན་བར་དུ། ཞིང་ཆེན་སྲིད་གྲོས་ཀྱི་ཀྲུའུ་ཞི་གཞོན་པ་ལིས་ཞའོ་ནན་མགོ་ལོག་བོད་རིགས་རང་སྐྱོང་ཁུལ་དུ་རྟོག་ཞིབ་ཏུ་སོང་ནས་ཁེ་ལས་ལ་དྲོད་ཁོལ་བསྐྱལ་བའི་དཔྱིད་རླུང་འགུལ་སྐྱོད་ཀྱི་བྱ་བར་རྟོག་ཞིབ་བྱས།
ལིས་ཞའོ་ནན་སྔ་རྗེས་སུ་དགའ་བདེ་རྫོང་གངས་རི་ཞིང་འབྲོག་ཚན་རྩལ་འཕེལ་རྒྱས་ཚད་ཡོད་ཀུང་ཟི་དང་། མཚོ་སྔོན་ཀྲུང་ལིས་སྐྱེ་དངོས་ཚན་རྩལ་ཚད་ཡོད་ཀུང་ཟི་སོགས་ལ་སོང་ནས། ཐོན་སྐྱེད་ཁེ་གཉེར་གྱི་གནས་ཚུལ་ལ་རྒྱུས་ལོན་བྱས་པར་མ་ཟད། མིག་སྔར་ཁེ་ལས་ལ་གནས་པའི་གནད་དོན་ཐད་ཡུལ་དངོས་ནས་མཐུན་སྦྱོར་བྱས། ཞིང་ཆེན་ནགས་རྩྭ་ཅུའུ་ཡིས་སྣེ་ཁྲིད་ཅིང་། འབྲེལ་ཡོད་སྡེ་ཁག་གཞན་དག་ལ་མཉམ་འབྲེལ་བྱས་ཏེ། ཁེ་ལས་ཀྱི་ལྗང་མདོག་འཕེལ་རྒྱས་དང་ཐོན་རྫས་སྤུས་ཚད་མཐོར་འདེགས་སུ་གཏོང་བ་སོགས་ཀྱི་ཐད་ཤུགས་ཆེན་པོས་རྒྱབ་སྐྱོར་བྱེད་རྒྱུའི་ཐག་བཅད། ལིས་ཞའོ་ནན་གྱིས་ནན་གྱིས་བསྟན་དོན། ས་གནས་ཀྱི་ཁྱད་ཆོས་ལྡན་པའི་ཚན་རྩལ་གྲུབ་འབྲས་ཁྱབ་གདལ་དུ་གཏོང་བ་དང་བཀོལ་སྤྱོད་བྱེད་པར་རྒྱབ་སྐྱོར་བྱེད་དགོས་ལ། ཞིབ་འཇུག་གསར་སྐྲུན་ལ་ཤུགས་སྣོན་དང་། ཐོན་རྫས་གསར་པ་གསར་སྤེལ་བྱེད་ཚད་ཇེ་མགྱོགས་སུ་བཏང་ནས། ཐོན་ཁུངས་དང་རྒྱུ་ནོར། མ་རྩ་བཅས་ཕན་མཐོའི་ཚན་རིག་གི་ཕྱོགས་སུ་བསྒྱུར་པ་མངོན་འགྱུར་བྱས་ནས། འགྲན་རྩོད་ནུས་ཤུགས་ཇེ་དྲག་ཏུ་གཏོང་དགོས། ཁེ་བཟང་སྲིད་ཇུས་སྣ་ཚོགས་བེད་སྤྱོད་གང་ལེགས་བྱས་ནས། ཐོན་སྐྱེད་དང་མངགས་ཉོ། ཉོ་ཚོང་བཅས་ཀྱི་བརྒྱུད་ལམ་གསལ་བོར་བཏོད་ནས། ཁྲོམ་ར་སྔར་མེད་རྒྱ་སྐྱེད་བཏང་སྟེ། འཕེལ་རྒྱས་ཀྱི་རྣམ་པ་གསར་བ་གྲུབ་ཏུ་འཇུག་དགོས། ཞིབ་འཇུག་གསར་སྐྲུན་དང་ཐོན་སྐྱེད་བཅས་ཀྱི་འཁོར་ཚིགས་དམ་འཛིན་བྱེད་པ་དང་། ཐོན་རྫས་ཀྱི་སྤུས་ཚད་དོ་དམ་ཇེ་དྲག་ཏུ་བཏང་ནས། ཕན་བདེ་ལེགས་བརྩོན་གྱིས་སྤུས་ཚད་མཐོར་འདེགས་སུ་གཏོང་དགོས། འཕེལ་རྒྱས་ཀྱི་དམིགས་འབེན་དང་ལས་འགན་གྱི་བྱེད་ཐབས། ལས་རྐང་གི་འགན་ནུས་སོགས་ཕན་ཡོད་མཉམ་འདྲེས་ཡོང་བར་བྱེད་པ་དང་ཁེ་ལས་རིག་གནས་འཛུགས་སྐྲུན་བྱེད་དགོས། འཇོན་ཐང་མི་སྣ་བསྡུ་ཤུགས་ཇེ་དྲག་ཏུ་བཏང་ནས། འཇོན་མིའི་འཕེལ་རྒྱས་ཁོར་ཡུག་ཇེ་ལེགས་སུ་གཏོང་དགོས་པ་དང་། ནུས་ཡོད་སྟོབས་ལྡན་གྱི་འཇོན་མིའི་འགན་སྲུང་འདོན་སྤྲོད་བྱེད་དགོས།
ཁེ་ལས་ཆུང་གྲས་ཀྱི་རིག་གནས་གསར་སྐྲུན་ཐོན་རྫས་ཀྱི་ཞིབ་འཇུག་གསར་སྤེལ་དང་ཐོན་སྐྱེད་སོགས་ལ་བཅར་སྐབས། ལིས་ཞའོ་ནན་གྱིས་ནན་གྱིས་བསྟན་དོན། ཁབ་མིག་ལས་འཇིག་རྟེན་མཐོང་བའི་རྣམ་པ་རྒྱུན་འཁྱོངས་བྱས་ཏེ། ཞིབ་ཚགས་ཡིན་ཞིང་ཁྱད་ཆོས་ལྡན་པ། ཆེད་སྤྱོད་རང་བཞིན་ལྡན་པ་བཅས་ཀྱི་འཕེལ་རྒྱས་བགྲོད་ལམ་དུ་སྙེག་ནས། མ་རྩོམ་རང་བཞིན་གྱི་གསར་སྤེལ་རྒྱུན་འཁྱོངས་དང་། མ་རྩོམ་རང་བཞིན་གྱི་བཟོ་ལས་སྒྱུ་རྩལ་རྒྱུན་འཛིན་བྱས་ཏེ། སྤུས་ལེགས་ཅན་དང་ཁྱད་ཆོས་ཅན་གྱི་ཕྱོགས་སུ་སྐུལ་འདེད་གཏོང་བ་དང་། ཁེ་ལས་ཆུང་གྲས་ཀྱི་སྤུས་ཚད་མཐོ་བའི་འཕེལ་རྒྱས་ལ་རོགས་འདེགས་བྱེད་དགོས་ཟེར།
སྐལ་བཟང་རྣམ་རྒྱལ་གྱིས་བསྒྱུར།
