ཉེ་ལམ། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཀྲུང་གོ་རྡོ་སྣུམ་སློབ་ཆེན་གྱི་ཨེ་ཤེ་ཡ་དབུས་མའི་ཕྱི་འགྲིམ་སློབ་མར་ཡིག་ལན་བསྐུར་ཏེ། ཁོ་ཚོར་ཀྲུང་གོ་དང་ཨེ་ཤེ་ཡ་དབུས་མའི་རྒྱལ་ཁབ་བར་གྱི་འབྲེལ་བའི་འཕེལ་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་སྔར་ལས་ཆེན་པོ་འབུལ་དགོས་པའི་ཐད་ནས་སྐུལ་ལྕག་གནང་།
ཞི་ཅིན་ཕིང་གིས་ཀྲུང་གོ་དང་ཨེ་ཤེ་ཡ་དབུས་མའི་རྒྱལ་ཁབ་བར་རི་ཆུ་འདབས་འབྲེལ་བྱས་ཡོད་ཅིང་། ཕན་ཚུན་བར་མཛའ་བརྩེ་ཟབ་མོ་ལྡན་པ་དང་ལས་དབང་གཅིག་མཐུན་ཡིན། ཉིས་སྟོང་བཅུ་གསུམ་ལོར་ངས་ཨེ་ཤེ་ཡ་དབུས་མའི་རྒྱལ་ཁབ་ཏུ། “དར་གོས་ཚོང་ལམ་གྱི་དཔལ་འབྱོར་ཁུལ” མཉམ་དུ་བསྐྲུན་རྒྱུའི་གྲོས་འགོ་བཏོན་པ་ཡིན། ལོ་ངོ་བཅུའི་རིང་ལ། ཀྲུང་གོ་དང་ཨེ་ཤེ་ཡ་དབུས་མའི་འབྲེལ་བ་རྒྱུན་ཆད་མེད་པར་སྐས་རིམ་གསར་པ་ཞིག་ཏུ་འཕེལ་བ་དང་། ཁྱབ་ཁོངས་སོ་སོའི་མཉམ་ལས་མགྱོགས་མྱུར་ངང་འཕེལ་ཏེ། ཕྱོགས་གཉིས་ཀའི་མི་དམངས་ལ་བདེ་སྐྱིད་བསྐྲུན་ཡོད་ཅེས་གསུངས།
ཞི་ཅིན་ཕིང་གིས་ཀྲུང་གོ་དང་ཨེ་ཤེ་ཡ་དབུས་མའི་རྒྱལ་ཁབ་བར་གྱི་མཛའ་མཐུན་འབྲེལ་བ་ཇེ་དམ་དུ་གཏོང་བར་ཅིས་ཀྱང་མི་རབས་ནས་མི་རབས་བར་གྱི་བློ་སྟོབས་དགོས་ལ། ན་གཞོན་རྒྱུན་འཛིན་པ་དང་དར་སྤེལ་གཏོང་མཁན་ཡང་དགོས། ཁྱོད་ཚོ་ནི་ཀྲུང་གོ་དང་ཨེ་ཤེ་ཡ་དབུས་མའི་འབྲེལ་བའི་དཔང་པོ་དང་ཕན་འབྲས་དངོས་ཐོབ་མཁན་ཡིན་ལ། འཛུགས་སྐྲུན་པ་དང་བརྒྱུད་སྒྲོག་པའང་ཡིན། ཁྱོད་ཚོ་ཀྲུང་གོ་དང་ཨེ་ཤེ་ཡ་དབུས་མའི་རྒྱལ་ཁབ་ཀྱི་མཛའ་མཐུན་བྱ་གཞག་ནང་འབད་པས་ཞུགས་ནས། དར་གོས་ཚོང་ལམ་གྱི་སྙིང་སྟོབས་དར་སྤེལ་གཏོང་བ་དང་། ཀྲུང་གོའི་གཏམ་རྒྱུད་དང་ཨེ་ཤེ་ཡ་དབུས་མའི་གཏམ་རྒྱུད་ཡག་པོ་འཆད་པ། མཛའ་མཐུན་ཕོ་ཉ་བྱེད་པ་དང་མཉམ་ལས་ཀྱི་འབྲེལ་ཟམ་ཡག་པོ་འཛུགས་པ་བཅས་བྱས་ཏེ། སྔར་ལས་དམ་ཟབ་ཀྱི་ཀྲུང་གོ་དང་ཨེ་ཤེ་ཡ་དབུས་མའི་ལས་སྐལ་གཅིག་མཐུན་ཚོགས་པ་བསྐྲུན་ཆེད་རང་ཉིད་ཀྱི་ལེགས་སྐྱེས་འབུལ་རྒྱུའི་རེ་བ་ཡོད་ཅེས་གསུངས།
བན་དེ་སྐྱབས་ཀྱིས་བསྒྱུར།
