མཚོ་སྔོན་རྒྱང་སྒྲོག་བརྙན་འཕྲིན་ཅུའུ་ཏང་ཙུའུ་ཡིས་དམངས་ཀྱི་ཆེད་དུ་དོན་དངོས་སྒྲུབ་པ་དེ་བརྗོད་དོན་སློབ་གསོར་ཚད་ལེན་བྱེད་པའི་ནང་དོན་དང་ཐབས་ལམ་དུ་གལ་ཆེན་དུ་བརྩིས་ནས།དམངས་ཀྱི་ཆེད་དུ་དོན་དངོས་སྒྲུབ་པ་དང་རྒྱང་སྒྲོག་བརྙན་འཕྲིན་བྱ་བའི་འགན་འཁུར་གཙོ་བོ་གཉིས་ཟུང་འབྲེལ་བྱས་ཏེ། བྱེད་ཐབས་དངོས་ལ་བརྟེན་ནས་དམངས་ཚིས་ཕྱོགས་ཀྱི་རྒྱུགས་ལན་བཟང་བོ་སྤྲད་ཡོད།
ཞིང་ཆེན་རྒྱང་སྒྲོག་བརྙན་འཕྲིན་ཅུའུ་ཡིས་ཞིང་ཆེན་ཡོངས་ཀྱི་རིམ་པ་སོ་སོའི་རྒྱང་སྒྲོག་བརྙན་འཕྲིན་གྱི་ལེ་ཚན་གཏོང་བའི་ལས་ཁུངས་དང་དྲ་ལམ་སྨྱན་སྦྱོར་གྱི་གཡུལ་ས་གཙོ་བོའི་བྱེད་ནུས་ཧུར་ཐག་གིས་འདོན་སྤེལ་གང་ལེགས་བྱས་ནས། ཞིང་ཆེན་ཡོངས་སུ་འཕྲལ་བསྟུན་རྒྱང་སྒྲོག་གི་སྐད་དུང་ཆེན་པོ་ཁྲི་བཞི་དང་སྟོང་དགུ་ལྷག་གི་མཐུན་རྐྱེན་བསྐྲུན་པ་དང་། དྲ་ལམ་དང་ཡུལ་དངོས་ཟུང་འབྲེལ་གྱིས་སྐུལ་སྤེལ་དང་ཤུགས་འདོན་བྱས་ཏེ། རིགས་སོ་སོའི་མང་ཚོགས་ལ་དུས་ཚོད་དང་པོའི་ནང་ཏང་གི་ལམ་ཕྱོགས་སྲིད་ཇུས་དང་ཏང་ཀྲུང་དབྱང་དང་ཞིང་ཆེན་ཏང་ཨུའི་ཇུས་ཆོད་བཀོད་སྒྲིག་གལ་ཆེན་རྒྱུས་ལོན་བྱུང་དུ་བཅུག་ཡོད། རྒྱང་སྒྲོག་བརྙན་འཕྲིན་གྱི་དམངས་ཕན་བཟོ་སྐྲུན་ཤུགས་ཚད་ཆེ་རུ་བཏང་ནས། ཞོན་ཧྭ་དང་ལི་ཏུའུ། ཕིན་ཨན་བཅས་རྫོང་དང་ཆུའུ་གསུམ་ལ་འཕྲལ་བསྟུན་རྒྱང་སྒྲོག་མ་ལག་འཛུགས་སྐྲུན་བྱེད་བཞིན་ཡོད་ལ། ལས་གཞི་ཡོངས་སུ་འགྲུབ་རྗེས། ཞིང་ཆེན་ཡོངས་ཀྱི་རྫོང་རིམ་པ་ཡན་ལ་འཕྲལ་བསྟུན་རྒྱང་སྒྲོག་མ་ལག་ཡོངས་སུ་ཁེབས་ཚར་པ་རེད། མི་རིགས་ས་ཁུལ་གྱི་དྭངས་གསལ་བརྙན་འཕྲིན་ཁྱབ་སྤེལ་གྱི་ལས་གཞི་ལག་བསྟར་བྱས་ཏེ། ཞིང་ཆེན་ཡོངས་སུ་ཁྱིམ་ཚང་འབུམ་གཅིག་གི་སྐུད་ཡོད་བརྙན་འཕྲིན་དྭངས་གསལ་གཞི་གྲངས་བརྗེ་རེས་ཀྱི་སྒྲིག་ཆས་བརྗེ་བ་དང་། སྲིད་གཞུང་གིས་མངགས་ཉོ་བྱས་ཏེ་ཐད་གཏོང་ལེ་ཚན་འཁོར་སྐར་གྱིས་བསྡུ་ལེན་བྱེད་ཐུབ་པའི་ཞབས་ཞུའི་རྣམ་གྲངས་ལག་བསྟར་བྱས་ནས། ཞིང་འབྲོག་མང་ཚོགས་ཀྱི་སྨྱན་སྦྱོར་ལྟ་ཉན་ཕན་ཁེ་ལ་འགན་སྲུང་བྱས།
མི་དམངས་དཀྱིལ་སྙིང་ཡིན་པའི་གསར་རྩོམ་གྱི་ཁྲིད་ཕྱོགས་རྒྱུན་འཁྱོངས་བྱས་ནས། རྒྱང་སྒྲོག་བརྙན་འཕྲིན་གྱི་ནང་དོན་སྣ་མང་ཕུན་ཚོགས་ཅན་དུ་བཏང་། སྐྱེ་ཁམས་ཕྱོགས་ཀྱི་དངོས་བྲིས་ལེ་ཚན་དང་མི་ཆོས་ཕྱོགས་ཀྱི་དངོས་བྲིས་ལེ་ཚན། དྲ་རྒྱའི་དངོས་བྲིས་ལེ་ཚན་བཅས་འཆར་འགོད་སྐུལ་སྤེལ་བྱས། ཏང་གི་ཚོགས་ཆེན་ཉི་ཤུ་པའི་དགོངས་དོན་མཐིལ་ཕྱིན་བྱེད། སྐྱོད་ལམ་གསར་བའི་སྟེང་དུ་འབད་པས་བསྐྱོད་ཅེས་པའི་བརྗོད་དོན་དང་བསྟུན་ནས། རྒྱང་སྒྲོག་བརྙན་འཕྲིན་གྱི་སྤྱི་ཕན་ཚོང་འཕྲིན་འགྲན་སྡུར་དང་རྒྱང་སྐྱོད་གསར་བ། མཚོ་སྔོན་གསར་བ་ཞེས་པའི་བརྙན་ཐུང་འགྲན་སྡུར་སྤེལ་ཏེ། ནུས་ཤུགས་ཡོད་རྒུས་མཚོ་སྔོན་གྱི་གཏམ་རྒྱུད་བཟང་བོར་བཤད་པ་དང་། མཚོ་སྔོན་གྱི་མཚན་སྙན་ཁྱབ་སྤེལ་བྱས་ནས། མཚོ་སྔོན་གསར་བའི་འཛུགས་སྐྲུན་ལ་རོགས་འདེགས་བྱས་ཡོད། བསྒྱུར་སྐྲུན་བྱས་པའི་བརྙན་འཕྲིན་ཟློས་གར་ལ《འབད་འཐབ་ཀྱི་དབྱངས་རྟ》སོགས་ལེའུ་ལྔ་བརྒྱ་དང་བརྒྱད་ཅུ་དང་། གློག་བརྙན《ཆན་ཞུའེ་སིན》སོགས་རིགས་སྣ་སུམ་ཅུ་ལྷག་ཡོད། སྤུས་ཚད་མཐོ་བའི་སྒྱུར་སྐྲུན་བརྩམས་ཆོས་ཀྱིས་རིགས་སོ་སོའི་མི་དམངས་མང་ཚོགས་ཀྱི་བསམ་པའི་འཚོ་བའི་ལོངས་སྤྱོད་ཕུན་སུམ་ཇེ་ཚོགས་སུ་བཏང་།
ཁེ་ལས་ཀྱི་དཀའ་ངལ་སེལ་བའི་བྱ་བའི་རྐྱེན་སྲོལ་བཙུགས་པ་དང་། རྒྱང་སྒྲོག་བརྙན་འཕྲིན་གྱི་སྤུས་ལེགས་ལེ་ཚན་གསར་སྐྲུན་གྱིས་ནུས་པ་འདོན་སྤེལ་གང་ལེགས་བྱས་ཏེ། ལས་རིགས་ཀྱི་སྤྱི་བའི་ཞབས་ཞུའི་ཁྱད་སྟོབས་ལ་བརྟེན་ནས། ཁེ་ལས་ལ་རོགས་སྐྱོར་བྱ་བའི་བྱེད་ཐབས་ཞིབ་ཚགས་སུ་བསྒྱུར་བ་དང་། ཧུར་ཐག་གིས་ཁེ་ལས་ལ་དོན་བཟང་དང་དོན་དངོས་བསྒྲུབས།
