སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རིག་གནས་རྒྱུན་འཛིན་གོང་སྤེལ་བཞུགས་མོལ་ཚོགས་འདུའི་སྟེང་གསུང་བཤད་གལ་ཆེན་གནང་། ཁོང་གིས་མགོ་རྩོམ་ས་གསར་པའི་སྟེང་མུ་མཐུད་དུ་རིག་གནས་དར་རྒྱས་ལ་སྐུལ་འདེད་གཏོང་བ་དང་། རིག་གནས་ཀྱི་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པ། ཀྲུང་ཧྭ་མི་རིགས་ཀྱི་དེང་རབས་ཤེས་རིག་འཛུགས་སྐྱོང་བྱེད་པ་བཅས་ནི། ང་ཚོའི་དུས་རབས་གསར་པའི་རིག་གནས་ཀྱི་འགན་འཁྲི་གསར་པ་ཡིན་པས། རིག་གནས་རང་རྟོན་ཇེ་བརྟན་དུ་གཏོང་་བ་དང་། འགན་འཁྲི་ཁུར་དུ་ལེན་པ། ཧུར་ཐག་གིས་འབད་བརྩོན་བྱེད་པ་བཅས་བྱས་ཏེ། ཐུན་མོང་གི་འབད་བརྩོན་ལ་བརྟེན་ནས་ང་ཚོའི་དུས་རབས་འདིར་གཏོགས་པའི་རིག་གནས་གསར་པ་བསྐྲུན་ཏེ། ཀྲུང་ཧྭ་མི་རིགས་ཀྱི་དེང་རབས་ཤེས་རིག་འཛུགས་སྐྱོང་བྱེད་དགོས་ཞེས་ནན་གྱིས་བསྟན། སྤྱི་ཁྱབ་ཧྲུའུ་ཅིའི་གསུང་བཤད་གལ་ཆེན་ལ་ཚུར་སྣང་ཆེན་པོ་བྱུང་། ཚང་མས་བལྟས་ན། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཏང་དང་རྒྱལ་ཁབ་ཀྱི་ལས་དོན་འཕེལ་རྒྱས་ཀྱི་འཐབ་ཇུས་མཐོ་ཚད་ནས་ལངས་ཏེ། དགོངས་པ་གསར་བ་དང་ལྟ་ཚུལ་གསར་བ། ཆོད་གཏམ་གསར་བ་བཅས་བཏོན་པར། ཆབ་སྲིད་རང་བཞིན་དང་བསམ་བློའི་རང་བཞིན། འཐབ་ཇུས་རང་བཞིན། མཛུབ་སྟོན་རང་བཞིན་བཅས་དྲག་པོ་ལྡན་པས། ང་ཚོས་རིག་གནས་འཛུགས་སྐྱོང་གི་ཆོས་ཉིད་རང་བཞིན་གྱི་ངོས་འཛིན་ཇེ་ཟབ་ཏུ་བཏང་སྟེ། སྔར་ལས་ལྷག་པའི་སྒོ་ནས་རིག་གནས་འགན་འཁྲི་ཁུར་དུ་བླངས་ནས། སྟོབས་ལྡན་རྒྱལ་ཁབ་འཛུགས་སྐྲུན་དང་མི་རིགས་བསྐྱར་དར་ཐད་བསམ་པའི་སྒུལ་ཤུགས་སྣོན་དགོས་ཟེར།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་དོན། ཀྲུང་གོའི་རིག་གནས་ཀྱི་ལོ་རྒྱུས་རིང་བ་དང་ཀྲུང་ཧྭའི་ཤེས་རིག་རྒྱ་ཆེ་ཞིང་གཏིང་ཟབ། ཀྲུང་ཧྭའི་ལོ་རྒྱུས་ལ་ཆ་ཚང་ཞིང་གཏིང་ཟབ་པའི་སྒོ་ནས་རྒྱུས་ལོན་བྱས་ན། ད་གཟོད་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་སྔར་ལས་ནུས་ལྡན་སྒོས་གསར་གཏོད་རང་བཞིན་ལྡན་པར་གོང་འཕེལ་དུ་གཏོང་ཐུབ་ལ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་རིག་གནས་འཛུགས་སྐྱོང་ལ་སྔར་ལས་ནུས་ལྡན་སྒོས་སྐུལ་འདེད་གཏོང་ཐུབ་པ་དང་། ཀྲུང་ཧྭ་མི་རིགས་ཀྱི་དེང་རབས་ཤེས་རིག་འཛུགས་སྐྱོང་བྱེད་ཐུབ།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་དོན། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ལ་གྲུབ་ཆ་གལ་ཆེན་སྣ་མང་ཡོད་ལ། དེ་དག་གིས་མཉམ་དུ་ཀྲུང་ཧྭའི་ཤེས་རིག་གི་འབུར་དུ་ཐོན་པའི་ཁྱད་ཆོས་བསྐྲུན་ཡོད། ཁོང་གིས་རྒྱུན་མཐུད་རང་བཞིན་དང་། གསར་གཏོད་རང་བཞིན། གཅིག་གྱུར་རང་བཞིན། དཀྱེལ་ཡངས་རང་བཞིན། ཞི་བདེའི་རང་བཞིན་བཅས་ནི་ཀྲུང་ཧྭའི་ཤེས་རིག་ལ་འབུར་དུ་ཐོན་པའི་ཁྱད་ཆོས་ལྔ་ཡིན་པར་བསྟན། ཚང་མས་བལྟས་ན། སྤྱི་ཁྱབ་ཧྲུའུ་ཅི་ཡིས་བཏོན་པའི་འབུར་དུ་ཐོན་པའི་ཀྲུང་ཧྭའི་ཤེས་རིག་གི་མ་དཔེ་གསལ་བོར་བསྟན་པ་དེས། རྩ་བའི་ཐོག་ནས་ཀྲུང་ཧྭ་མི་རིགས་ངེས་པར་དུ་རང་ཉིད་ཀྱི་ལམ་དུ་བསྐྱོད་དགོས་པ་ཐག་གཅོད་བྱས་ཡོད་པར་འདོད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གྱིས་བསྟན་དོན། ལོ་ལྔ་སྟོང་ལྷག་གི་ཀྲུང་ཧྭའི་ཤེས་རིག་གི་ཟབ་ཅིང་མཐུག་པའི་རྨང་གཞིའི་སྟེང་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་གསར་དུ་བཏོད་པ་དང་གོང་དུ་སྤེལ་ནས། མར་ཁེ་སི་རིང་ལུགས་ཀྱི་རྩ་བའི་རིགས་པ་དེ་ཀྲུང་གོའི་དོན་དངོས་དང་ཟུང་སྦྲེལ་བྱེད་རྒྱུ་དང་། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དང་ཟུང་སྦྲེལ་བྱེད་རྒྱུ་ནི་ངེས་པར་དུ་བརྒྱུད་དགོས་པའི་བགྲོད་ལམ་ཡིན། འདི་ནི་ང་ཚོས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བགྲོད་ལམ་འཚོལ་ཞིབ་བྱེད་པའི་ཁྲོད་དུ་བྱུང་བའི་ཆོས་ཉིད་རང་བཞིན་གྱི་ངེས་ཤེས་ཡིན་ལ། ང་ཚོས་དོན་ཀུན་ལེགས་པར་སྒྲུབ་པའི་ཐབས་མཆོག་ཡིན།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་དོན། ལོ་རྒྱུས་ཀྱི་མགོ་རྩོམ་ས་གསར་པའི་སྟེང་མུ་མཐུད་དུ་རིག་གནས་དར་རྒྱས་ལ་སྐུལ་འདེད་གཏོང་བ་དང་། རིག་གནས་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པ། ཀྲུང་ཧྭ་མི་རིགས་ཀྱི་དེང་རབས་ཤེས་རིག་འཛུགས་སྐྱོང་བྱེད་པ་བཅས་བྱེད་ན། རིག་གནས་རང་རྟོན་ཇེ་བརྟན་དུ་གཏོང་བ་དང་། རང་གི་ལམ་དུ་བསྐྱོད་རྒྱུ་རྒྱུན་འཁྱོངས་བྱེད་པ། ཀྲུང་ཧྭ་མི་རིགས་ཀྱི་རླབས་ཆེན་ལོ་རྒྱུས་ཀྱི་ལག་ལེན་དང་དེང་རབས་ལག་ལེན་ལ་རྐང་འཛུགས་པ། ཀྲུང་གོའི་གནས་ལུགས་བཀོལ་ནས་ཀྲུང་གོའི་ཉམས་མྱོང་སྤྱི་སྡོམ་བཟང་བོ་བྱེད་པ། ཀྲུང་གོའི་ཉམས་མྱོང་གིས་ཀྲུང་གོའི་གཞུང་ལུགས་མཐོར་འདེགས་སུ་གཏོང་བ་བཅས་བྱས་ཏེ། བསམ་བློའི་སྟེང་གི་རང་ཚུགས་རང་བདག་མངོན་འགྱུར་བྱེད་དགོས། ཚང་མས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅི་ཕིང་གི་གསུང་བཤད་གལ་ཆེན་གྱི་དགོངས་དོན་མཛུབ་སྟོན་དུ་བྱས་ཤིང་། ཕྱོགས་ཡོངས་ནས་ཏང་གི་ཚོགས་ཆེན་ཐེངས་ཉི་ཤུ་པའི་དྲིལ་སྒྲོག་བསམ་བློའི་རིག་གནས་བྱ་བའི་འཐབ་ཇུས་བཀོད་སྒྲིག་སྣ་ཚོགས་དངོས་འབེབས་བྱེད་པ་དང་། རིག་གནས་ཡིད་རྟོན་དང་རང་སྟོབས་ཇེ་དྲག་ཏུ་བཏང་སྟེ། ཀྲུང་ཧྭ་མི་རིགས་ཀྱི་དེང་རབས་དཔལ་ཡོན་དང་སྤྱི་ཚོགས་རིང་ལུགས་ཀྱི་རིག་གནས་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པར་སྐུལ་འདེད་གཏོང་དགོས་ཟེར།
བསོད་ནམས་ཚེ་རིང་གིས་བསྒྱུར།
