རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་དུས་བཅད་ལྟར་ཨ་ཧྥེ་རི་ཁ་ལྷོ་མའི་ཙུང་ཐུང་ལཱ་མཱ་ཧྥུའུ་སཱ་ལ་ཁ་པར་བཏང་སྟེ་གྲོས་མོལ་མཛད།

ཞི་ཅིན་ཕིང་གིས་བསྟན་དོན། ཀྲུང་གོ་དང་ཨ་ཧྥེ་རི་ཁ་ལྷོ་མ་ནི་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཆེན་མོ་གལ་ཆེན་ཡིན་ཞིང་། རྒྱལ་ཁབ་གཉིས་བར་སྤུན་ཟླ་ལྟ་བུའི་དམིགས་བསལ་གྱི་མཛའ་མཐུན་འབྲེལ་བ་ཡོད། ཀྲུང་གོ་དང་ཨ་ཧྥེ་རི་ཁ་ལྷོ་མའི་འབྲེལ་བ་དེ་རྒྱ་ཆེའི་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་ཐུན་མོང་ཁེ་ཕན་ལ་སྲུང་སྐྱོབ་བྱེད་པ་དང་། ཀྲུང་གོ་དང་ཨ་ཧྥེ་རི་ཁ་ལྷོ་མའི་མཐུན་སྒྲིལ་མཉམ་ལས་ལ་སྣེ་ཁྲིད་བྱེད་པར་འཐབ་ཇུས་དོན་སྙིང་གལ་ཆེན་ལྡན། ད་ལོ་ནི་གསེར་གྱོམ་རྒྱལ་ཁབ་ཀྱི་ཨ་ཧྥེ་རི་ཁ་ལྷོ་མའི་ལོ་ཡིན་པ་དང་། རྒྱལ་ཁབ་གཉིས་ཀྱི་འབྲེལ་བ་དེ་འཕེལ་རྒྱས་ཀྱི་གོ་སྐབས་གལ་ཆེན་ལ་འཕྲད་ཡོད། ཀྲུང་གོ་ཕྱོགས་ཀྱིས་ཨ་ཧྥེ་རི་ཁ་ལྷོ་མ་དང་མཉམ་དུ་རྒྱལ་ཁབ་གཉིས་ཀྱི་འབྲེལ་བའི་ཆུ་ཚད་མཐོར་འདེགས་དང་། ཆུ་ཚད་མཐོ་བའི་ཀྲུང་གོ་དང་ཨ་ཧྥེ་རི་ཁ་ལྷོ་མའི་ལས་སྐལ་ཐུན་མོང་ཚོགས་པ་འཛུགས་པ། མཉམ་དུ་ངེས་པ་དོན་གྱི་ཕྱོགས་མང་རིང་ལུགས་ལག་བསྟར་བྱེད་པ། ལག་རྡང་སྦྲེལ་ནས་རྒྱ་ཆེའི་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་ཐུན་མོང་ཁེ་ཕན་ལ་སྲུང་སྐྱོབ་བྱས་ནས། རྒྱལ་སྤྱིའི་སྒྲིག་ལམ་དེ་སྔར་ལས་དྲང་བདེན་ལུགས་མཐུན་གྱི་ཕྱོགས་སུ་འཕེལ་རྒྱས་སུ་འགྲོ་བར་སྐུལ་འདེད་གཏོང་དགོས། ཀྲུང་གོ་ཕྱོགས་ཀྱིས་ཨ་ཧྥེ་རི་ཁ་ལྷོ་མ་དེ་རེས་སྐོར་རྒྱལ་ཁབ་ཡིན་པའི་ཆ་ནས། ད་ལོའི་གསེར་གྱོམ་རྒྱལ་ཁབ་ཀྱི་མཉམ་ལས་བྱ་འགུལ་སྣ་ཚོགས་བཟང་བོར་སྤེལ་བར་རྒྱབ་སྐྱོར་བྱེད་འདོད་ཡོད་ཅེས་གསུངས།

ལཱ་མཱ་ཧྥུའུ་སཱ་ཡིས་བསྟན་དོན། ཨ་ཧྥེ་རི་ཁ་ལྷོ་མས་ཀྲུང་གོའི་བར་གྱི་སྟོབས་དང་ལྡན་ཞིང་ཆུ་ཚད་མཐོ་བའི་འཐབ་ཇུས་གྲོགས་པོའི་འབྲེལ་བར་མཐོང་ཆེན་བྱེད་པ་དང་། དེ་རང་གི་ང་རྒྱལ་དུ་རློམ་ཡོད། ཨ་ཧྥེ་རི་ཁ་ལྷོ་མ་དང་ཀྲུང་གོའི་མཉམ་ལས་ཀྱིས་ཨ་ཧྥེ་རི་ཁ་གླིང་ལ་ཁེ་ཕན་ཐོབ་ཡོད། ཨ་ཧྥེ་རི་ཁ་ལྷོ་མས་ཀྲུང་གོ་དང་མཉམ་དུ་འབད་བརྩོན་བྱས་ནས་ཨ་ཧྥེ་རི་ཁ་ལྷོ་མ་དང་ཀྲུང་གོའི་འབྲེལ་བའི་འཕེལ་རྒྱས་ལ་སྐུལ་འདེད་གཏོང་རྒྱུ་ཡིན། ཨ་ཧྥེ་རི་ཁ་ལྷོ་མས་ཀྲུང་གོ་སོགས་གསེར་གྱོམ་ཁོངས་གཏོགས་རྒྱལ་ཁབ་དག་དང་མཉམ་དུ་གསེར་གྱོམ་མཉམ་ལས་གཏིང་ཟབ་ཏུ་སྤེལ་བར་ཤུགས་སྣོན་པའི་ཆེད་དུ་འབྲེལ་འདྲིས་མཐུན་སྦྱོར་བྱེད་རྒྱུ་ཡིན་ཟེར།

ཕྱོགས་གཉིས་ཀྱིས་ད་རུང་ཝུའུ་ཁི་ལན་གྱི་ཉམས་ཉེན་ཐད་ནས་བསམ་འཆར་བརྗེ་རེས་བྱས། ལཱ་མཱ་ཧྥུའུ་སཱ་ཡིས་བསྟན་དོན། ཨ་ཧྥེ་རི་ཁ་ལྷོ་མས་ཀྲུང་གོ་ཕྱོགས་ཀྱིས་བཏོན་པའི་ཆབ་སྲིད་ལ་བརྟེན་ནས་ཝུའུ་ཁི་ལན་གྱི་ཉམས་ཉེན་ཐག་གཅོད་བྱེད་པའི་ལངས་ཕྱོགས་ཡིག་ཆར་རྒྱབ་སྐྱོར་བྱེད་པ་དང་། འབྲེལ་ཡོད་ཕྱོགས་སོ་སོས་མྱུར་མོར་གྲོས་མོལ་སླར་གསོ་བྱེད་དགོས་པའི་རེ་བ་བཏོན། ཨ་ཧྥེ་རི་ཁ་ལྷོ་མ་སོགས་ཨ་ཧྥེ་རི་ཁ་གླིང་གི་རྒྱལ་ཁབ་དྲུག་གི་མགོ་ཁྲིད་པས་གྲུབ་པའི་ཞི་བདེའི་འཐུས་ཚབ་ཚོགས་པས་ཨུ་རུ་སི་དང་ཝུའུ་ཁི་ལན་དུ་འཚམས་འདྲི་བྱས་ནས། འཁྲུག་རྩོད་དེ་མྱུར་མོར་མཇུག་སྒྲིལ་བར་སྐུལ་འདེད་གཏོང་རྒྱུ་ཡིན་ཟེར། ཞི་ཅིན་ཕིང་གིས་བསྟན་དོན། ཀྲུང་གོ་ཕྱོགས་ཀྱི་ཝུའུ་ཁི་ལན་ཉམས་ཉེན་ཐད་ཀྱི་ལངས་ཕྱོགས་འགྱུར་མེད་ཡིན་པ་དང་། ཕྱོགས་བསྡུས་བྱས་ན་ཞི་བའི་གྲོས་མོལ་ལ་སྐུལ་འདེད་གཏོང་རྒྱུ་དེ་ཡིན། ཕྱོགས་སོ་སོས་གྲོས་མོལ་ལ་བརྟེན་ནས་ཉམས་ཉེན་ཐག་གཅོད་བྱེད་པའི་ཐད་ཆ་རྐྱེན་བཟང་བོ་བསྐྲུན་དགོས། སྐུ་ཞབས་ཙུང་ཐུང་ཉིད་དང་ཨ་ཧྥེ་རི་ཁ་གླིང་གི་འབྲེལ་ཡོད་རྒྱལ་ཁབ་ཀྱི་མགོ་ཁྲིད་པས་གྲུབ་པའི་ཞི་བདེའི་འཐུས་ཚབ་ཚོགས་པས་ཨུ་རུ་སི་དང་ཝུའུ་ཁི་ལན་དུ་འཚམས་འདྲི་བྱེད་པ་ནི་དོན་བཟང་ཞིག་རེད། འཛམ་གླིང་ཡོངས་ཀྱི་ཞི་བདེ་ལ་དགའ་བ་དང་དྲང་བདེན་རྒྱུན་འཁྱོངས་བྱེད་པའི་རྒྱལ་ཁབ་ཚང་མས་ཞི་བའི་གྲོས་མོལ་ལ་སྐུལ་འདེད་གཏོང་བའི་འབོད་སྐུལ་གཏོང་དགོས་ཞེས་གསུངས།

བསོད་ནམས་ཚེ་རིང་གིས་བསྒྱུར།