ཟླ་དྲུག་པའི་ཚེས་ཉེར་དགུ་ཉིན།རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་མགོ་འཛིན་བྱས་ཏེ་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་བསྡུས་ཏེ་བདེ་འཇགས་ཐོན་སྐྱེད་ཐད་ཀྱི་ཉེན་ཁ་ཚབས་ཆེན་དང་དོན་རྐྱེན་གྱི་མི་མངོན་པའི་རྐྱེན་ངན་ཞིབ་བཤེར་བཅོས་སྐྱོང་ལ་སྔར་ལས་ཤུགས་སྣོན་པའི་སྐོར་གྱི་སྙན་ཞུ་ལ་ཉན་པ་དང་། ཁྱིམ་ཚང་འཛད་སྤྱོད་ལ་སྐུལ་འདེད་གཏོང་བའི་སྐོར་གྱི་བྱེད་ཐབས་འགའ་ཞེས་པ་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གཞུང་ཚབ་སྲུང་སྐྱོབ་དང་རོགས་འདེགས་བྱེད་རྒྱུའི་སྲོལ་ཡིག་འཆར་ཟིན་གཉིས་ལ་གྲོས་ཞིབ་བྱས་ཏེ་གྲོས་འཆམ་བྱུང་ལ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བདེ་འཇགས་དོ་དམ་ཆད་གཅོད་བཅའ་ཁྲིམས་བཟོ་བཅོས་འཆར་ཟིན་ལ་གྲོས་བསྡུར་བྱས།
གྲོས་ཚོགས་ནས་བསྟན་དོན། ཉིང་ཞ་དབྱིན་ཁྲོན་གྱི་དྲུག་པའི་ཉེར་གཅིག་ཉིན་གྱི་སོལ་རླངས་འགས་གཏོར་དོན་རྐྱེན་ཚབས་ཆེན་ལས་མི་སྣ་མང་པོར་ཤི་རྨས་ཐེབས་པ་དང་། སྤྱི་ཚོགས་ཀྱི་ཤུགས་རྐྱེན་ཆེ་ལ། བསླབ་བྱ་ཧ་ཅང་ཟབ་མོ་ཡིན་པས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བདེ་འཇགས་ཐོན་སྐྱེད་སྐོར་གྱི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་ནན་མོ་བྱེད་པ་དང་། བདེ་འཇགས་ཐོན་སྐྱེད་ཐད་ཀྱི་ཉེན་ཁ་ཚབས་ཆེན་དང་དོན་རྐྱེན་གྱི་མངོན་མེད་རྐྱེན་ངན་ཞིབ་བཤེར་བཅོས་སྐྱོང་ལ་སྔར་ལས་ཤུགས་སྣོན་པ། ནམ་ཡང་ལྷོད་གཡེང་མི་བྱེད་པའི་འགན་འཁྲིའི་བསམ་པས་བྱ་བ་སོ་སོ་དོན་འཁྱོལ་་བྱེད་དགོས་པ་དང་བདེ་འཇགས་ཐོན་སྐྱེད་དོན་རྐྱེན་ཚབས་ཆེན་འབྱུང་བར་ནུས་ཡོད་སྒོས་སྔོན་འགོག་བྱས་ཏེ་མི་དམངས་མང་ཚོགས་ཀྱི་ཚེ་སྲོག་རྒྱུ་ནོར་བདེ་འཇགས་ལ་འགན་སྲུང་བཟང་བོ་བྱེད་དགོས། འགལ་བ་གཙོ་བོ་དམ་འཛིན་བྱས་ཏེ་སྒྲིག་ཆས་ཁོར་ཡུག་སོགས་ཀྱི་མི་འདང་ས་བཙལ་ནས་སྤྱི་དམངས་ཀྱི་བདེ་འཇགས་འདུ་ཤེས་དང་ལས་གཉེར་མི་སྣའི་བདེ་འཇགས་འགན་འཁྲི་དང་བདེ་འཇགས་རྩལ་ནུས་མཐོར་འདེགས་གཏོང་བར་ཤུགས་ཆེན་པོས་སྐུལ་འདེད་གཏོང་དགོས། རྩ་ལག་མཉམ་བཅོས་ལ་ཤུགས་བསྣན་ནས་སོལ་རླངས་དང་ཨར་ལས་བཟོ་སྐྲུན། འགྲིམ་འགྲུལ་སྐྱེལ་འདྲེན་སོགས་ལས་རིགས་གཙོ་བོའི་ཁྱབ་ཁོངས་ལ་དམིགས་ཏེ་མིག་སྔའི་འབུར་ཐོན་གནད་དོན་ཐག་གཅོད་བཟང་བོ་བྱེད་པའི་ཞོར་དུ། འགོ་ཁུངས་ནས་བདེ་འཇགས་ཉེན་ཁ་ཇེ་ཆུང་དུ་གཏོང་དགོས་པ་དང་དོན་རྐྱེན་འབྱུང་བར་སྔོན་འགོག་བྱེད་དགོས། དོན་རྐྱེན་གཅིག་ལ་དམིགས་ཏེ་སྦྲེལ་ཐག་ཧྲིལ་བོའི་བདེ་འཇགས་ཐོན་སྐྱེད་ཀྱི་འབྲེལ་ཡོད་འགན་འཁྲི་གཏན་འཁེལ་གསལ་བོ་དང་དབྱེ་ཞིབ་ནན་མོ། དོན་འཁྱོལ་བཟང་བོ་བྱེད་དགོས་པ་དང་། ས་ཁུལ་སོ་སོ་དང་འབྲེལ་ཡོད་སྡེ་ཁག་སོ་སོས་ནན་མོ་དང་དངོས་གཉེར། ཞིབ་ཚགས་ཀྱི་བྱེད་ཐབས་སྤྱད་དེ་ལྟ་སྐུལ་དོ་དམ་ནན་མོ་བྱེད་པ། གཞི་རིམ་དུ་འགན་འཁྲི་དང་གནོན་ཤུགས་བྱིན་ནས་ཞིབ་བཤེར་བཅོས་སྐྱོང་གིས་གནད་དོན་རྙེད་པ་དང་གནད་དོན་ཐག་གཅོད་པ། གྲུབ་འབྲས་དངོས་ཐོབ་པར་འགན་སྲུང་བྱེད་དགོས།
གྲོས་ཚོགས་ནས་བསྟན་དོན། ཁྱིམ་ཆས་འཛད་སྤྱོད་དེ་ཁྱབ་ཁོངས་མང་པོར་འབྲེལ་ཞིང་གཞི་ཁྱོན་ཆེ་བས། དམིགས་སའི་རང་བཞིན་གྱི་བྱེད་ཐབས་སྤྱད་ནས་འཕེལ་རྒྱས་གཏོང་རྒྱུ་དེ་སྡོད་དམངས་ལ་སྐུལ་ཁྲིད་བྱས་ཏེ་འཛད་སྤྱོད་འཕར་སྣོན་དང་དཔལ་འབྱོར་སླར་གསོ་བྱེད་པར་ཕན་པ་ཡོད། ཁྱིམ་ཆས་འཛད་སྤྱོད་ཀྱི་སྲིད་ཇུས་དེ་སྡོད་ཁུལ་དང་སྡོད་ཁང་རྙིང་བ་བསྒྱུར་བཀོད་དང་དངོས་རྫས་རྙིང་བ་ཕྱིར་སྡུད་དྲ་རྒྱ་འཐུས་ཚང་དུ་གཏོང་བ་སོགས་སྲིད་ཇུས་དང་སྦྲེལ་མཐུད་བྱེད་པ་དང་མཉམ་དུ་ཤུགས་བཏོན་ནས་འཛད་སྤྱོད་ལ་སྐུལ་འདེད་གཏོང་བའི་མཉམ་ཤུགས་གྲུབ་པར་བྱེད་དགོས། འདོན་སྤྲོད་སྤུས་ཚད་དང་ཆུ་ཚད་མཐོར་འདེགས་བཏང་སྟེ་ཁེ་ལས་ཀྱིས་ཁྱད་གཤིས་ཅན་གྱི་ཁྱིམ་ཆས་ཚོང་རྫས་མང་པོ་འདོན་པར་སྐུལ་མ་གཏོང་བ་དང་སྡོད་དམངས་ཀྱི་འཛད་སྤྱོད་རེ་འདུན་ཇེ་དྲག་ཏུ་བཏང་སྟེ་འཚོ་བའི་སྤུས་ཚད་ལེགས་བཅོས་ལ་རོགས་འདེགས་བྱེད་དགོས།
གྲོས་ཚོགས་སྟེང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གཞུང་ཚབ་སྲུང་སྐྱོབ་དང་རོགས་འདེགས་བྱེད་རྒྱུའི་སྲོལ་ཡིག་འཆར་ཟིན་ལ་གྲོས་ཞིབ་བྱས་ཏེ་གྲོས་འཆམ་བྱུང་། གྲོས་ཚོགས་སྟེང་ནན་གྱིས་བསྟན་དོན། ཕྱི་རྒྱལ་གྱི་བདེ་འཇགས་འགན་སྲུང་བྱེད་ནུས་དང་ཆུ་ཚད་མཐོར་འདེགས་གཏོང་བ་དང་ཕྱི་རྒྱལ་གྱི་བདེ་འཇགས་མ་ལག་མགྱོགས་མྱུར་ངང་འཛུགས་སྐྲུན་བྱས་ཏེ་རང་རྒྱལ་ཀྱི་ཕྱི་རྒྱལ་དུ་ཡོད་པའི་སྡོད་དམངས་དང་ཁྲིམས་མི། ཁྲིམས་མི་མིན་པའི་རྩ་འཛུགས་ཀྱི་ཁྲིམས་མཐུན་ཁེ་དབང་ལ་འགན་སྲུང་བཟང་བོ་བྱེད་དགོས།
གྲོས་ཚོགས་སྟེང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བདེ་འཇགས་དོ་དམ་ཆད་གཅོད་བཅའ་ཁྲིམས་ཀྱི་བཟོ་བཅོས་འཆར་ཟིན་ལ་གྲོས་ཞིབ་བྱས་ཏེ་རྩ་དོན་སྟེང་གྲོས་འཆམ་བྱུང་བ་དང་། བཟོ་བཅོས་འཆར་ཟིན་དེ་རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གིས་གྲོས་ཞིབ་བྱེད་པར་རེ་ཞུ་བྱེད་རྒྱུའི་ཐག་བཅད།
གྲོས་ཚོགས་སྟེང་ད་རུང་དོན་དག་གཞན་དག་ལ་གྲོས་ཞིབ་བྱས།
ལྷ་མོ་ཚེ་རིང་གིས་བསྒྱུར།
