དགའ་བསུ་ཞུ་བའི་མཛད་སྒོ་གྲོལ་རྗེས། རྒྱལ་ཁབ་གཉིས་ཀའི་གཙོ་འཛིན་གྱིས་གྲོས་མོལ་གནང་ནས། དུས་རབས་གསར་པའི་ཀྲུང་གོ་དང་ཨ་ཧྥེ་རི་ཁ་ལྷོ་མའི་བར་གྱི་འབྲེལ་བ་འཕེལ་རྒྱས་དང་དེ་བཞིན་ཐུན་མོང་ཐོག་དོ་ཁུར་བྱེད་པའི་རྒྱལ་སྤྱི་དང་ས་ཁུལ་གྱི་གནད་དོན་ཐད་བསམ་འཆར་བརྗེ་རེས་གཏིང་ཟབ་གནང་ནས། ཕན་ཚུན་བར་ཐུན་མོང་གི་ངོས་འཛིན་གལ་ཆེན་བྱུང་བ་དང་ཐུན་མོང་གི་མོས་མཐུན་གཅིག་མཐུན་བྱུང་བར་མ་ཟད། ལག་གདང་སྦྲེལ་ནས་ཀྲུང་གོ་དང་ཨ་ཧྥེ་རི་ཁ་ལྷོ་མའི་བར་གྱི་ཕྱོགས་ཡོངས་འཐབ་ཇུས་རོགས་རེས་འབྲེལ་བ་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་བཏང་སྟེ། ཆུ་ཚད་སྔར་ལས་མཐོ་བའི་ཀྲུང་གོ་དང་ཨ་ཧྥེ་རི་ཁ་ལྷོ་མའི་བར་གྱི་ལས་སྐལ་གཅིག་མཐུན་ཚོགས་པ་མཉམ་སྐྲུན་བྱེད་རྒྱུར་མོས་མཐུན་བྱུང་།
ཞི་ཅིན་ཕིང་གིས་འདི་ནི་ངས་ཀྲུང་གོ་རྒྱལ་ཁབ་ཀྱི་ཀྲུའུ་ཞིའི་མིང་ཐོག་ནས་ཨ་ཧྥེ་རི་ཁ་ལྷོ་མར་འཚམས་འདྲི་བྱེད་ཐེངས་བཞི་པ་ཡིན། ལོ་ངོ་བཅུ་ཡི་རིང་ལ། ངས་ཀྲུང་གོ་དང་ཨ་ཧྥེ་རི་ཁ་ལྷོ་མའི་བར་གྱི་འབྲེལ་བ་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་པའི་རྣམ་པ་དངོས་སུ་མྱངས། ཀྲུང་གོ་དང་ཨ་ཧྥེ་རི་ཁ་ལྷོ་མའི་བར་གྱི་འབྲེལ་བ་ཇེ་ཡག་ཏུ་ཕྱིན་པ་དང་། ཀྲུང་གོ་དང་ཨ་ཧྥེ་རི་ཁ་ལྷོ་མའི་བར་གྱི་མཛའ་མཐུན་ཇེ་ཟབ་ཏུ་སོང་བའི་འགག་རྩ་ནི། རྒྱལ་ཁབ་གཉིས་ཀའི་ཏང་གཉིས་ཀས་རང་རང་སོ་སོའི་འཕེལ་རྒྱས་ཀྱི་བགྲོད་ལམ་སྟེང་བསྐྱོད་དེ་བདེ་སྡུག་མཉམ་མྱོང་བྱས་པ་ལས་བྱུང་བ་ཡིན། མིག་སྔར་ཀྲུང་གོས་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ལ་ཁྱོན་ཡོངས་ནས་སྐུལ་འདེད་གཏོང་བཞིན་ཡོད་པ་དང་། ཨ་ཧྥེ་རི་ཁ་ལྷོ་མས་རང་རྒྱལ་ཁབ་ཀྱི་གནས་ཚུལ་དང་འཚམ་པའི་དེང་རབས་ཅན་གྱི་བགྲོད་ལམ་འཚོལ་ཞིབ་བྱེད་བཞིན་ཡོད། ཀྲུང་གོ་ཕྱོགས་ཀྱིས་ཨ་ཧྥེ་རི་ཁ་ལྷོ་མ་དང་མཉམ་དུ་མཛའ་མཐུན་རྒྱུན་འཛིན་དང་མཉམ་ལས་གཏིང་ཟབ་ཏུ་གཏོང་བ། མཉམ་ལས་ལ་ཤུགས་སྣོན་པ་བཅས་བྱས་ནས། ཀྲུང་གོ་དང་ཨ་ཧྥེ་རི་ཁ་ལྷོ་མའི་ཕྱོགས་ཡོངས་འཐབ་ཇུས་རོགས་རེས་འབྲེལ་བ་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་བཏང་སྟེ། ཆུ་ཚད་སྔར་ལས་མཐོ་བའི་ཀྲུང་གོ་དང་ཨ་ཧྥེ་རི་ཁ་ལྷོ་མའི་ལས་སྐལ་གཅིག་མཐུན་ཚོགས་པ་མཉམ་སྐྲུན་བྱེད་འདོད་ཡོད་ཅེས་གསུངས།
ཞི་ཅིན་ཕིང་གིས་དེའི་ཐད་གྲོས་འགོ་བཞི་བཏོན་པ་སྟེ། གཅིག་ནས་ཀྲུང་གོ་དང་ཨ་ཧྥེ་རི་ཁ་ལྷོ་མས་ཕན་ཚུན་ཡིད་ཆེས་ཆེན་པོ་བྱེད་པའི་འཐབ་ཇུས་ཀྱི་ཟླ་གྲོགས་བྱེད་དགོས། གཉིས་ནས་ཀྲུང་གོ་དང་ཨ་ཧྥེ་རི་ཁ་ལྷོ་མ་གཉིས་ཐུན་མོང་ཐོག་ཡར་རྒྱས་འགྲོ་བའི་འཕེལ་རྒྱས་ཀྱི་ཟླ་གྲོགས་བྱེད་དགོས། གསུམ་ནས་ཀྲུང་གོ་དང་ཨ་ཧྥེ་རི་ཁ་ལྷོ་མ་རྒྱལ་ཁབ་གཉིས་ཀས་ཕན་ཚུན་རྒྱུས་མངའ་ཆེན་པོ་ཡོད་པའི་མཛའ་མཐུན་ཟླ་གྲོགས་བྱེད་དགོས། བཞི་ནས་ཀྲུང་གོ་དང་ཨ་ཧྥེ་རི་ཁ་ལྷོ་མ་གཉིས་ཀས་དྲང་བདེན་ལ་སྲུང་སྐྱོབ་བྱེད་པའི་གོ་ལ་ཧྲིལ་པོའི་ཟླ་གྲོགས་བྱེད་དགོས།
ལཱ་མ་ཧྥུའུ་སཱ་ཡིས་ཨ་ཧྥེ་རི་ཁ་ལྷོ་མས་ཀྲུང་གོ་གུང་ཁྲན་ཏང་གིས་ཀྲུང་གོ་མི་དམངས་ཀྱི་སྣེ་ཁྲིད་དེ་འཕེལ་རྒྱས་ཀྱི་གྲུབ་འབྲས་ཆེན་པོ་བླངས་པར་གདེང་འཇོག་ཆེན་པོ་བྱས་ནས། ཀྲུང་གོའི་སྲིད་ཏང་བར་འགྲོ་འོང་སྔར་ལས་དམ་ཟབ་བྱེད་པ་དང་། ཏང་སྐྱོང་དང་རྒྱལ་སྐྱོང་སྲིད་གཉེར་གྱི་ཉམས་མྱོང་བརྗེ་རེས་གཏིང་ཟབ་བྱེད་པ། ཀྲུང་གོའི་ལུགས་ཀྱི་དབུལ་པོ་ཉུང་གཏོང་གི་ཚོད་ལྟའི་མཉམ་ལས་བྱེད་པ། ཚོང་དོན་དང་དངུལ་གཏོང་། ནུས་ཁུངས། རྨང་གཞིའི་སྒྲིག་ཆས་འཛུགས་སྐྲུན། བཟོ་སྐྲུན་ལས་རིགས། ཚན་རྩལ་སོགས་ཁྱབ་ཁོངས་ཀྱི་མཉམ་ལས་རྒྱ་སྐྱེད་གཏོང་བ་བཅས་བྱས་ནས། ཀྲུང་གོའི་ཁེ་ལས་སྔར་ལས་གང་མང་ཨ་ཧྥེ་རི་ཁ་ལྷོ་མར་ཡོང་ནས་དངུལ་གཏོང་ལས་སྐྲུན་བྱེད་པར་དགའ་བསུ་ཞུ་རྒྱུ་ཡིན་ཞེས་བསྟན།
ཚའེ་ཆི་དང་ཝང་དབྱི་སོགས་གོང་གསལ་གྱི་བྱེད་སྒོར་ཞུགས།
བན་དེ་སྐྱབས་ཀྱིས་བསྒྱུར།
