སྐབས་སོ་གཉིས་པ་དང་སྐབས་སོ་གསུམ་པའི་ཀྲུང་གོའི་གསར་འགྱུར་བྱ་དགའ་དང་། སྐབས་བཅུ་བདུན་པའི་ཁྲང་ཅང་ཐའོ་ཧྥན་བྱ་དགའ་སྟེར་བའི་སྙན་ཞུའི་ཚོགས་འདུ་ཚེས་ཉེར་གཅིག་ཉིན་པེ་ཅིང་དུ་བསྡུས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅི་ཚའེ་ཆི་ཡིས་བྱ་དགའ་ཐོབ་མཐན་གྱི་འཐུས་མིར་མཇལ་འཕྲད་གནང་། སྔ་དྲོའི་དུས་ཚོད་དགུ་དང་ཕྱེད་ཀའི་སྟེང་ཚའེ་ཆི་མི་དམངས་ཚོགས་ཁང་ཆེན་མོའི་ཚོམས་ཆེན་བྱང་མ་རུ་ཕེབས་ནས་བྱ་དགའ་ཐོབ་མཁན་གྱི་འཐུས་མིར་ལྷག་བསམ་འཁོལ་བའི་ངང་ནས་རྟེན་འབྲེལ་ཞུས་པར་མ་ཟད། ཚང་མ་དང་མཉམ་དུ་དྲན་རྟེན་གྱི་མཉམ་པར་བསྐྱོན། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། ཀྲུང་དབྱང་དྲིལ་སྒྲོག་པུའུ་ཡི་པུའུ་ཀྲང་ལིས་ཧྲུའུ་ལེ་མཇལ་འཕྲད་ལ་ཞུགས་པར་མ་ཟད། སྙན་ཞུ་ཚོགས་འདུར་ཞུགས་ནས་གཏམ་བཤད། གྲོས་ཚོགས་སྟེང་རྒྱ་ཆེ་བའི་གསར་འགྱུར་བྱ་བ་སྒྲུབ་མཁན་ཚོས་ཞི་ཅིན་ཕིང་གི་རིག་གནས་དགོངས་པ་སློབ་སྦྱོང་དང་ཁོང་དུ་ཆུད་པར་བྱ་རྒྱུ་དེ་ངེས་སྦྱོང་སློབ་ཚན་དུ་བརྩིས་ནས་དགོངས་པ་གལ་ཆེན་དེའི་དོན་སྙིང་གལ་ཆེན་དང་། ནང་དོན་ཕུན་སུམ་ཇེ་ཚོགས་སུ་གཏོང་བ། ལག་ལེན་གྱི་བླང་བྱ་བཅས་ལ་གོ་བ་གཏིང་ཟབ་ལེན་པ་དང་། གསར་འགྱུར་གླེང་ཕྱོགས་ལས་དོན་ཕྱོགས་སོ་སོའི་བརྒྱུད་རིམ་ཧྲིལ་པོར་རང་རྟོགས་ངང་ལག་བསྟར་དོན་འཁྱོལ་བྱེད་པ། བརྩེ་སེམས་ལྡན་པ་དང་འཇོན་ཐང་ལྡན་པ། འགན་འཁུར་ཕོད་པ་བཅས་ཀྱི་དུས་རབས་གསར་པའི་གསར་འགྱུར་ལས་དོན་པ་ཞིག་ཧུར་ཐག་གིས་བྱེད་དགོས་པའི་རེ་བ་བཏོན།
ཚོགས་ཐོག་ཏུ་གསར་འགྱུར་འཐབ་ཕྱོགས་ཀྱིས་ཡིད་ཆེས་ཇེ་བརྟན་དུ་གཏོང་རྒྱུ་གཙོ་གནད་དུ་བྱས་ནས་དྲང་ཕྱོགས་ཀྱི་དྲིལ་སྒྲོག་ལ་ཤུགས་སྣོན་པ་དང་། ཀྲུང་གོ་དང་ཕྱི་རྒྱལ་གྱིས་གཅིག་མཐུན་དུ་སྤྱོད་པའི་ཐ་སྙད་གསར་པ་དང་ཁྱབ་ཁོངས་གསར་པ། རྒྱས་བཤད་གསར་པ་བཅས་ཀྱི་ཐོག་ནས་ཀྲུང་གོའི་གཏམ་རྒྱུད་དང་ཀྲུང་གོ་གུང་ཁྲན་ཏང་གི་གཏམ་རྒྱུད། དུས་རབས་གསར་པའི་གཏམ་རྒྱུད་ཡག་པོར་བཤད་པ་དང་། ལག་རྩལ་གསར་པ་དང་ལས་སྟེགས་གསར་པ། བྱེད་ཐབས་གསར་པ་བཅས་བཀོལ་སྤྱོད་གང་ལེགས་བྱས་ཏེ། སྨྱན་སྦྱོར་ཡོངས་ཀྱི་བརྒྱུད་སྤེལ་མ་ལག་འཛུགས་སྐྲུན་ལ་སྐུལ་འདེད་བཏང་ནས་གསར་འགྱུར་གླེང་ཕྱོགས་ལས་དོན་གྱི་རྣམ་པ་གསར་པ་རྒྱུན་ཆད་མེད་པར་གསར་གཏོད་བྱེད་དགོས་ཞེས་བསྟན།
ཀྲུང་གོ་གསར་འགོད་པའི་མཐུན་ཚོགས་ཀྱི་ཀྲུའུ་ཞི་ཧི་ཕེན་གྱིས་ཚོགས་འདུའི་ཐོག་ཤིས་ཚིག་ཕུལ། མི་དམངས་མཚོ་དམག་ཚགས་པར་ཁང་དང་བཟོ་པའི་ཉིན་རེའི་ཚགས་པར་ཁང་། མི་དམངས་ཉིན་རེའི་ཚགས་པར་ཁང་། ཞིན་ཧྭ་གསར་འགྱུར་ཁང་། ཀྲུང་དབྱང་རྒྱང་སྒྲོག་བརྙན་འཕྲིན་སྤྱི་ཁྱབ་ལས་ཁུངས། ཀྲེ་ཅང་རྒྱང་སྒྲོག་བརྙན་འཕྲིན་སྡེ་ཚོགས། ཧ་ཨར་པེན་ཉིན་རེའི་ཚགས་པར་ཁང་བཅས་ཀྱི་འཐུས་མིས་སྔ་རྗེས་སུ་གཏམ་བཤད་སྤེལ། ཀྲུང་དབྱང་དྲིལ་སྒྲོག་བསམ་བློ་རིག་གནས་ལས་དོན་འགོ་ཁྲིད་ཚོགས་ཆུང་གི་ཁོངས་མི་དང་། ཀྲུང་དབྱང་དང་རྒྱལ་ཁབ་ལས་ཁུངས་ཀྱི་འབྲེལ་ཡོད་སྡེ་ཁག ཀྲུང་དབྱང་གི་གསར་འགྱུར་ལས་ཁུངས་གཙོ་བོ་བཅས་ཀྱི་འགན་འཁུར་བློ་མཐུན་དང་གསར་འགྱུར་བྱ་བ་སྒྲུབ་མཁན་གྱི་འཐུས་མི་སོགས་མི310ཙམ་ཚོགས་འདུར་ཞུགས།
