ཟླ10པའི་ཚེས6ཉིན་གྱི་དགོང་མོར་ཝུའུ་ལུའུ་མུའུ་ཆི་རིག་གནས་ལྟེ་གནས་ཟློས་གར་ཁང་ཆེན་མོའི་ནང་དུས་ཆེན་གྱི་སྤྲོ་དགའི་རྣམ་པས་ཁེངས་ཡོད། ཞིན་ཅང་ཐོན་སྐྱེད་འཛུགས་སྐྲུན་དཔུང་ཚོགས་བཙུགས་ནས་ལོ70འཁོར་བར་རྟེན་འབྲེལ་ཞུ་བའི་རིག་རྩལ་དགོང་ཚོགས་ཏེ《གཟི་བརྗིད་ལྡན་པའི་འགན་འཁྲི》ཞེས་པ་གནས་དེ་ནས་འཁྲབ་སྟོན་བྱས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ། ཀྲུང་དབྱང་འཐུས་ཚབ་ཚོགས་པའི་ཚོགས་གཙོ་ཧི་ལིས་ཧྥིན་གྱིས་མི་རིགས་སོ་སོ་དང་ལས་རིགས་སོ་སོའི་མང་ཚོགས་དང་མཉམ་དུ་འཁྲབ་སྟོན་ལ་གཟིགས།
ལོ་ངོ་བདུན་ཅུའི་རིང་། དཔུང་ཚོགས་ཀྱི་མི་རྣམས་ཀྱིས་མཐའ་མཚམས་གསར་སྤེལ་དང་འཛུགས་སྐྲུན་བྱེད་པའི་བརྗིད་ཆེའི་བྱ་གཞག་བསྒྲུབས་པ་དང་། ལོ་བདུན་ཅུའི་རིང་འབད་འཐབ་བྱས་པ་བརྒྱུད། ཁོ་ཚོས་རྒྱལ་ཁབ་ཀྱི་མངའ་ཁོངས་སྲུང་སྐྱོང་དང་གཟི་བརྗིད་ལྡན་པའི་འགན་འཁྲི་བསྒྲུབས་ཡོད། དགོང་ཚོགས་དེ《དཔུང་ཚོགས་ཀྱི་བུ་དང་བུ་མོའི་སེམས་པ་ཏང་ལ་ཕྱོགས》ཞེས་པའི་མཉམ་གཞས་ཁྲོད་འགོ་བརྩམས་ཤིང་། དཀའ་སྤྱད་ལས་སྐྲུན་དང་། གསར་གཏོད་ཡར་བརྩོན། དུས་རབས་གསར་པར་ཡར་བརྩོན་བཅས་ལེའུ་གསུམ་དུ་བགོས་ཡོད་ལ། འོད་སྟོང་འབར་བའི་ཏང་གི་དར་ཆའི་འོག དཔུང་ཚོགས་ཀྱི་བྱ་གཞག་སོ་སོར་ཐོབ་པའི་གྲུབ་འབྲས་ལེགས་པོ་ཕྱིར་མངོན་པ་དང་། ལྷག་པར་དུ་ཏང་གི་ཚོགས་ཆེན་ཐེངས་བཅོ་བརྒྱད་པ་འཚོགས་པའི་ཚུན་ལ། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག དཔུང་ཚོགས་ཀྱིས་ཕྱོགས་ཡོངས་ནས་བཅོས་སྒྱུར་གཏིང་ཟབ་ཏུ་སྤེལ་བ་དང་། དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་ངང་འཕེལ་རྒྱས་འགྲོ་བར་སྐུལ་འདེད་གཏོང་བ། ཀྲུང་གོའི་ལུགས་ཀྱི་དེང་རབས་ཅན་གྱི་དཔུང་ཚོགས་ཀྱི་ལག་ལེན་སྤེལ་བའི་བརྗིད་ཉམས་ལྡན་པའི་ལེའུ་བརྩམས་པ་མཚོན་ཡོད། ཧི་ལི་ཧྥིན་སོགས་འཁྲབ་སྟོན་ལ་གཟིགས་མཁན་གྱི་ཀྲུང་དབྱང་འཐུས་ཚབ་ཚོགས་པའི་ཚོགས་མི་རྣམས་ཀྱིས་དགའ་བསུ་ཡང་ནས་ཡང་དུ་བྱས་ལ། ཚོགས་ར་ཡོངས་ཀྱི་མི་རྣམས་ཀྱིས་མཉམ་དུ《མེས་རྒྱལ་ལ་བསྟོད་གླུ་འབུལ》ཞེས་པའི་མཉམ་གཞས་བཏང་ནས་དགོང་ཚོགས་མཇུག་བསྒྲིལ།
ཀྲུང་གུང་ཀྲུང་དབྱང་ཆབ་སྲིད་ཅུའུ་ཨུ་ཡོན། ཞིན་ཅང་ཡུ་གུར་རིགས་རང་སྐྱོང་ལྗོངས་ཏང་ཨུའི་ཧྲུའུ་ཅི་མཱ་ཞིན་རུའེ་དང་། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཨུ་ཡོན། ཀྲུང་དབྱང་དམག་དོན་ཨུ་ཡོན་ལྷན་ཁང་ཆབ་སྲིད་ལས་དོན་པུའུ་ཡི་ཀྲུའུ་རིན། ཀྲུང་དབྱང་འཐུས་ཚབ་ཚོགས་པའི་ཚོགས་གཙོ་གཞོན་པ་མེའོ་ཧྭ། དེ་མིན་ཞིན་ཅང་ཐོན་སྐྱེད་འཛུགས་སྐྲུན་དཔུང་ཚོགས་ཀྱི་འགན་ཁུར་བློ་མཐུན་གཙོ་བོ་དང་ཀྲུང་དབྱང་འཐུས་ཚབ་ཚོགས་པའི་ཁོངས་མི་ཡོངས་ཀྱིས་མཉམ་དུ་འཁྲབ་སྟོན་ལ་བལྟས།
ཀྲུང་དབྱང་འཐུས་ཚབ་ཚོགས་པ་ཚེས་དྲུག་ཉིན་གྱི་ཕྱི་དྲོར་གནམ་གྲུར་བསྡད་དེ་ཝུའུ་ལུའུ་མུའུ་ཆིར་ཐོན་ནས། ཞིན་ཅང་ཐོན་སྐྱེད་འཛུགས་སྐྲུན་དཔུང་ཚོགས་བཙུགས་ནས་ལོ་བདུན་ཅུ་འཁོར་བར་རྟེན་འབྲེལ་ཞུ་བའི་བྱེད་སྒོར་ཞུགས་པ་རེད། མི་ཉེར་བཞི་ལས་གྲུབ་པའི་འཐུས་ཚབ་ཚོགས་པའི་ཁོངས་སུ་ཀྲུང་དབྱང་དང་རྒྱལ་ཁབ་ལས་ཁུངས་ཀྱི་འབྲེལ་ཡོད་སྡེ་ཁག་གི་འགན་ཁུར་བློ་མཐུན་ཡང་འདུ།
འབྲུག་མོས་བསྒྱུར།
