ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཀྲའོ་ལི་ཅི་ཡིས་ཟླ4པའི་ཚེས14ཉིན་ནས་ཚེས17ཉིན་བར་ཅང་སུའུ་དང་ཨན་ཧུའེ་རུ་རྟོག་ཞིབ་མཛད། ཁོང་གིས་ནན་གྱིས་བསྟན་དོན། ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་ཁྲིད་དུ་བྱེད་རྒྱུ་རྒྱུན་འཁྱོངས་བྱེད་པ་དང་། རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་གསུམ་པའི་དགོངས་དོན་ལག་བསྟར་བྱེད་པ། བརྒྱུད་རིམ་ཧྲིལ་བོའི་མི་དམངས་དམངས་གཙོ་དོན་འཁྱོལ་བྱེད་པ། ཏན་ཏན་ཏིག་ཏིག་གིས་ཁྲིམས་ལྟར་རྒྱལ་ཁབ་སྐྱོང་བར་སྐུལ་འདེད་བཏང་ནས། དམངས་ཆེན་བྱ་བ་སྤུས་ཚད་མཐོ་བའི་ངང་འཕེལ་རྒྱས་སུ་གཏོང་བར་སྐུལ་འདེད་གཏོང་དགོས།

ཀྲའོ་ལི་ཅི་སྔ་གཞུག་ཏུ་དབྱང་ཀྲིའུ་དང་ནན་ཅིན། ཨན་ཆིན། ཧི་ཧྥེ་སོགས་ས་ཆའི་གཞིས་ཁུལ་དང་གྲོང་གསེབ། ཁེ་ལས་དང་ཚན་རིག་ཞིབ་འཇུག་ལས་ཁུངས་བཅས་ལ་ཕེབས་ནས། དམངས་ཆེན་འཐུས་མིའི་འབྲེལ་འདྲིས་ས་ཚིགས་དང་གཞི་རིམ་ཁྲིམས་འཛུགས་འབྲེལ་འདྲིས་བྱེད་སའི་འཁོར་རྒྱུག་གནས་ཚུལ་ལ་རྒྱུས་ལོན་གསལ་བོ་མཛད་པ་དང་། སྡོད་དམངས་ཀྱི་ཁྱིམ་དང་ཞིང་ཁྱིམ་དུ་ཕེབས་ནས། འཐུས་མི་དང་མང་ཚོགས་དང་བརྗེ་རེས་ཟབ་མོ་མཛད་ལ། དམངས་ཆེན་བྱ་བ་དང་ཁྲིམས་སྐྱོང་འཛུགས་སྐྲུན་སྐོར་གྱི་གྲོས་གཞི་བསམ་འཆར་ལ་ཉན། སོ་སོར་ཅང་སུའུ་དང་ཨན་ཧུའེ་ཡི་དམངས་ཆེན་རྒྱུན་ལས་ཨུ་ཡོན་ལྷན་ཁང་ལས་ཁུངས་སུ་རྟོག་ཞིབ་མཛད་དེ། ལས་ཁུངས་ལས་བྱེད་པར་འཚམས་འདྲི་མཛད་པ་དང་། མགོ་འཛིན་མཛད་དེ་བཞུགས་མོལ་ཚོགས་འདུ་བསྡུས།

ཀྲའོ་ལི་ཅི་ཡིས་བསྟན་དོན། ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཡོངས་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་གསུམ་པའི་སྐབས་སུ་གནང་བའི་གསུང་བཤད་གལ་ཆེན་གྱི་དགོངས་དོན་དང་ཚོགས་ཆེན་གྱི་བཀོད་སྒྲིག་བླང་བྱ་སློབ་སྦྱོང་ནན་མོ་དང་ལག་ལེན་མཐར་ཕྱིན་བྱེད་པ་དང་། རང་རྟོགས་སྒོས་བསམ་བློ་དང་བྱ་སྤྱོད་གཉིས་ཏང་ཀྲུང་དབྱང་གི་མིག་སྔར་གྱི་གནས་བབ་ཐད་ཀྱི་ཚན་རིག་དང་མཐུན་པའི་བརྡར་གཅོད་དང་བྱ་བ་སྣ་ཚོགས་ཀྱི་ཇུས་ཆོད་བཀོད་སྒྲིག་སྟེང་གཅིག་གྱུར་བྱེད་པ། ཡིད་ཆེས་ཇེ་བརྟན་དུ་གཏོང་བ་དང་ངེས་ཤུགས་སྲུང་འཛིན་བྱེད་པ། རང་རྒྱལ་འཕེལ་རྒྱས་ཀྱི་ཕན་ཡོད་ཆ་རྐྱེན་དང་ལམ་ལུགས་དགེ་མཚན་འདོན་སྤེལ་གང་ལེགས་བྱེད་པ། བློ་བརྟན་འགྱུར་མེད་ཀྱིས་རང་ཉིད་ཀྱི་བྱ་བ་བཟང་བོར་བསྒྲུབ་ནས། སྤུས་ཚད་མཐོ་བའི་ངང་ལོ་ལྔའི་འཆར་འགོད་བཅུ་བཞི་པའི་དམིགས་འབེན་ལས་འགན་ཡོངས་འགྲུབ་བྱེད་པ་དང་། ལོ་ལྔའི་འཆར་འགོད་བཅོ་ལྔ་པའི་མགོ་བཟང་བོ་རྩོམ་པའི་རྨང་གཞི་བརྟན་པོ་འདིང་དགོས། དམངས་ཆེན་གྱིས་སྤྱི་ཡོངས་ལ་དམིགས་ནས་ཁྲིམས་ལྟར་འགན་སྒྲུབ་དང་ཁག་ཁུར་འགན་བསྟར་བྱས་ཏེ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་སྤྱི་ཚོགས་འཆམ་མཐུན་བརྟན་འཇགས་ཐད་ཁྲིམས་སྐྱོང་གི་འགན་སྲུང་འདོན་སྤྲོད་བྱེད་དགོས། གསར་དུ་བཟོ་བཅོས་བྱས་པའི་འཐུས་མིའི་བཅའ་ཁྲིམས་དྲིལ་སྒྲོག་འགྲེལ་ཀློག་དང་། སློབ་སྦྱོང་གསོ་སྦྱོང་དང་ལག་བསྟར་དོན་འཁྱོལ་བྱེད་པར་རྩ་འཛུགས་བཟང་བོ་བྱས་ནས། འཐུས་མིའི་བྱ་བའི་ལམ་ལུགས་ཅན་དང་ཚད་ལྡན་ཅན། བརྒྱུད་རིམ་ཅན་གྱི་ཆུ་ཚད་མཐོར་འདེགས་གཏོང་དགོས།

ཀྲའོ་ལི་ཅི་ཡིས་ནན་གྱིས་བསྟན་དོན། ཞི་ཅིན་ཕིང་གི་ཁྲིམས་སྐྱོང་དགོངས་པ་སློབ་སྦྱོང་ཟབ་མོ་དང་ལག་ལེན་མཐར་ཕྱིན་བྱེད་ན། ཏང་གི་ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་ཐད་ཀྱི་མགོ་ཁྲིད་རྒྱུན་འཁྱོངས་བྱེད་པ་དང་། བློ་བརྟན་འགྱུར་མེད་ཀྱིས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་བགྲོད་ལམ་དུ་བསྐྱོད་པ། རྒྱལ་ཁབ་ཀྱི་ཕྱོགས་སོ་སོའི་བྱ་བ་ཁྲིམས་སྐྱོང་ཅན་དུ་བསྒྱུར་བར་ཕྱོགས་ཡོངས་ནས་སྐུལ་འདེད་གཏོང་དགོས། དམངས་ཆེན་གྱི་ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་ཁྲོད་ཀྱི་འགན་ནུས་ནུས་པ་འདོན་སྤེལ་བྱེད་ན། དུས་རབས་གསར་བའི་ལས་འགན་གསར་བ་དང་བླང་བྱ་གསར་བར་འཚམ་པར་བྱས་ནས་ཁྲིམས་འཛུགས་བྱ་བར་ཤུགས་སྣོན་པ་དང་ལེགས་བསྒྱུར་བྱེད་པ་དང་། བཅའ་ཁྲིམས་ཚད་ལྡན་མ་ལག་ཐད་བབ་བསྟུན་མདུན་སྐྱོད་དང་ཚན་རིག་ཆ་ཚང་། སྦྲེལ་མཐུན་རིམ་ལྡན། འཆམ་མཐུན་གཅིག་གྱུར་བྱེད་པར་སྐུལ་འདེད་བཏང་སྟེ། སྤུས་ཚད་མཐོ་བའི་ཁྲིམས་འཛུགས་ཀྱིས་བཅོས་བསྒྱུར་འཕེལ་རྒྱས་ལ་ཞབས་འདེགས་ཞུ་བ་དང་འགན་སྲུང་བྱེད་དགོས། ས་གནས་ཁྲིམས་འཛུགས་ཀྱི་ལག་བསྟར་རང་བཞིན་དང་ཁ་གསབ་རང་བཞིན། འཚོལ་ཞིབ་རང་བཞིན་གྱི་རྩོལ་ནུས་འདོན་སྤེལ་བྱེད་ན། གནས་ཚུལ་དངོས་ལ་རྐང་འཛུགས་པ་དང་ཁྱད་ཆོས་འབུར་དུ་ཐོན་པར་བྱེད་པ་དང་། དངོས་ཡོད་གནད་དོན་ཐག་གཅོད་བྱེད་དགོས། རྩ་ཁྲིམས་བཅའ་ཁྲིམས་ཀྱིས་བསྩལ་བའི་ལྟ་སྐུལ་འགན་འཁྲི་ལག་བསྟར་ནན་མོ་བྱེད་ན། ཡང་དག་པའི་ལྟ་སྐུལ་དང་ཕན་ལྡན་པའི་ལྟ་སྐུལ། ཁྲིམས་དང་མཐུན་པའི་ལྟ་སྐུལ་ལག་བསྟར་བྱས་ཏེ། རྩ་ཁྲིམས་བཅས་ཁྲིམས་ལག་བསྟར་ནུས་ལྡན་བྱེད་པར་ཁག་ཐེག་བྱེད་དགོས། ཁྲིམས་སྐྱོང་དྲིལ་སྒྲོག་སློབ་གསོར་ཤུགས་སྣོན་བྱེད་ན། ཁྲིམས་འཛུགས་དང་བཅའ་ཁྲིམས་ལག་བསྟར་གྱི་དྲིལ་སྒྲོག་འགྲེལ་ཀློག་ལ་ཤུགས་སྣོན་པ་དང་། ཁྲིམས་སྐྱོང་གི་དགོངས་པ་དར་སྤེལ་གཏོང་བ་དང་ཁྲིམས་སྐྱོང་གི་གཏམ་རྒྱད་བཟང་བོར་བཤད་དགོས། རང་རྟོགས་སྒོས་ཏང་གི་འགོ་ཁྲིད་འོག བརྒྱུད་རིམ་ཧྲིལ་བོའི་མི་དམངས་དམངས་གཙོ་ལག་བསྟར་བྱེད་པ་དང་། མི་དམངས་མང་ཚོགས་དེའི་ཁྲོད་ཞུགས་ཚད་རྒྱ་སྐྱེད་དེ། ཁྲིམས་ལྟར་མང་ཚོགས་ཀྱིས་སེམས་ཁུར་བྱེད་པའི་བྲེལ་དཀའ་ཕྲལ་སྒུག་གི་གནད་དོན་ཐག་གཅོད་པར་སྐུལ་འདེད་གཏོང་དགོས།

ཀྲའོ་ལི་ཅི་ཡིས་ནན་གྱིས་བསྟན་དོན། ལས་ཁུངས་བཞིའི་བླང་བྱ་ལྟར། དམངས་ཆེན་གྱིས་རང་སྟེང་གི་འཛུགས་སྐྲུན་ལ་ཕྱོགས་ཡོངས་ནས་ཤུགས་སྣོན་པ་དང་། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་བྱེད་པའི་སློབ་སྦྱོང་སློབ་གསོ་ཏན་ཏིག་སྒོས་གཏིང་ཟབ་ཏུ་སྤེལ་བ། སྤྱོད་ཚུལ་འཛུགས་སྐྲུན་གྱི་གྲུབ་འབྲས་ལ་བརྟེན་ནས་དམངས་ཆེན་གྱི་ཏང་གི་འཛུགས་སྐྲུན་དང་བྱ་བ་སྣ་ཚོགས་ཐད་ནས་གྲུབ་འབྲས་གསར་བ་ལེན་པར་སྐུལ་འདེད་གཏོང་དགོས།

རིན་ཆེན་མཚོས་བསྒྱུར།