ཟླ6པའི་ཚེས5ཉིན། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ལུའོ་ཏུང་ཁྲོན་མཚོ་ལྷོ་བོད་རིགས་རང་སྐྱོང་ཁུལ་གུང་ཧོ་རྫོང་དུ་སོང་ནས། “མི་བྱེད་པ་བཞི་དང་ཐད་ཀར་གཉིས”ཀྱི་བྱེད་ཐབས་ལ་བརྟེན་ནས་རྒྱལ་སྤྱིའི་སྐྱེ་ཁམས་ཡུལ་སྐོར་གྱི་དམིགས་སའི་མཚོ་སྔོན་པོ་དཔེ་སྟོན་ཁུལ་གསར་འཛུགས་བྱ་བར་ལྟ་སྐུལ་རྟོག་ཞིབ་བྱས་པ་དང་། ཡུལ་དངོས་སུ་འབུར་ཐོན་གནད་དོན་ལ་ཞིབ་འཇུག་དང་ཐག་གཅོད་བྱས། ཁོས་བཤད་རྒྱུར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཡུལ་སྐོར་འཕེལ་རྒྱས་ཀྱི་རྣམ་བཤད་གལ་ཆེན་དང་མཚོ་སྔོན་ལ་གཟིགས་ཞིབ་མཛད་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱེད་པ་དང་། ཞིང་ཆེན་ཏང་ཨུའི་བཀོད་སྒྲིག་བླང་བྱ་ནན་ཏན་སྒོས་ལག་བསྟར་དངོས་འབེབས་བྱས་ཏེ། སྐྱེ་ཁམས་སྔོན་ལ་འཇོག་པ་དང་ལྗང་མདོག་འཕེལ་རྒྱས་གཏོང་བ་རྒྱུན་འཁྱོངས་བྱས་ནས། ཡུལ་སྐོར་པ་གཙོ་ཡིན་པའི་འདུ་ཤེས་བརྟན་པོ་འཛུགས་པ། རྒྱལ་སྤྱིའི་རྩེ་གྲར་དཔེ་ལྟ་བྱེད་པ་དང་། ཚད་གཞིའི་མ་ལག་འཐུས་ཚང་དུ་གཏོང་བ། སྒྲིག་ཆས་ཀྱི་ཞན་ཆ་གསབ་པ། ཡུལ་སྐོར་ལས་རིགས་ཕུན་སུམ་ཇེ་ཚོགས་སུ་གཏོང་བ་བཅས་བྱས་ཏེ། ནུས་ཤུགས་ཡོད་རྒུས་དཀའ་གནད་ཐག་གཅོད་བྱས་ནས། རྒྱལ་སྤྱིའི་སྐྱེ་ཁམས་ཡུལ་སྐོར་གྱི་དམིགས་སའི་མཚོ་སྔོན་པོའི་དཔེ་སྟོན་ཁུལ་གྱི་གསར་འཛུགས་ལ་ཚད་གཞི་མཐོ་བའི་སྒོ་ནས་སྐུལ་འདེད་བཏང་སྟེ། ནུས་ཤུགས་ཡོད་རྒུས་མཚོ་སྔོན་རྒྱལ་སྤྱིའི་སྐྱེ་ཁམས་ཡུལ་སྐོར་གྱི་དཔེ་མཚོན་ཆེན་པོ་གཏོད་དགོས།
ལུའོ་ཏུང་ཁྲོན་གྱིས་མཚོ་སྔོན་པོའི་ཤར་ཕྱོགས་ཀྱི་གྲོན་བསྡུ་ས་ཚིགས་སུ་སོང་ནས། གནས་འདིའི་རླངས་འཁོར་རྒྱུག་ཚད་ཅི་འདྲ་རེད། ཡུལ་སྐོར་པ་མང་པོའི་སྐབས་སུ་བགྲོད་ལམ་གེགས་མེད་ཡོང་བར་འགན་ལེན་བྱེད་ཐུབ་བམ་ཞེས་དྲིས། ཁོས་ཡུལ་དངོས་སུ་མཚོ་སྐོར་ཡུལ་སྐོར་གཞུང་ལམ་འཆར་འགོད་དང་། འཛུགས་སྐྲུན་གཉེར་སྐྱོང་། ཞབས་ཞུའི་འགན་སྲུང་སོགས་ཀྱི་གནས་ཚུལ་ལ་རྒྱུས་ལོན་བྱས་པ་དང་། སྐྱེ་ཁམས་སྲུང་སྐྱོབ་ཡག་པོ་བྱེད་པའི་སྔོན་འགྲོའི་ཆ་རྐྱེན་འོག་འཛུགས་སྐྲུན་མྱུར་ཚད་ཇེ་མགྱོགས་སུ་གཏོང་བའི་བླང་བྱ་ལྟར། མཚོ་སྐོར་ས་ཁོངས་ཀྱི་འགྲིམ་འགྲུལ་ལམ་དྲའི་བཀོད་སྒྲིག་འཐུས་ཚང་དུ་གཏོང་བ་དང་། རིག་ནུས་ཅན་གྱི་ཞབས་ཞུའི་ཆུ་ཚད་མཐོ་རུ་གཏོང་བ། ཧུར་ཐག་གིས་སྐྱེ་ཁམས་ཡུལ་སྐོར་དཔེ་སྟོན་གཞུང་ལམ་བསྐྲུན་རྒྱུའི་ཐད་རེ་བ་བཏོན། ལུག་ལའི་མདོ་དང་། ནུ་ལྕེ། ལྷོ་རི། པཎ་ཆེན་ལབ་ཙེ། དུང་དཀར་སོགས་མཛེས་ལྗོངས་ཁུལ་དང་མཚོ་སྔོན་པོའི་མཚོ་གཟིགས་རྒྱལ་སྤྱིའི་གསོལ་མགྲོན་ཁང་བཅས་སུ་ལུའོ་ཏུང་ཁྲོན་གྱིས་སྐྱེ་ཁམས་ཁོར་ཡུག་སྲུང་སྐྱོབ་དང་། འགྲོ་འདུག་སྤྱོད་གསུམ་དང་ཡུལ་སྐོར། དངོས་རྫས་ཉོ་བ། རོལ་རྩེད་སོགས་ཞབས་ཞུའི་སྒྲིག་བཀོད་དང་དེ་མིན་སྤྱི་པའི་སྤྱོད་ཁང་བཀོད་སྒྲིག་དང་། སྐྱེལ་འདྲེན་བདག་སྐྱོང་སོགས་ཀྱི་གནས་ཚུལ་ལ་ཡུལ་དངོས་ནས་ལྟ་ཞིབ་བྱས་པ་དང་། མཛེས་ལྗོངས་ཁུལ་གྱི་འགན་ཁུར་བ་དང་། ཡུལ་སྐོར་ཚོང་གཉེར་ཁྱིམ་ཚང་། རོང་འབྲོག་མང་ཚོགས་བཅས་དང་བསམ་ཚུལ་བརྗེ་རེས་ཟབ་མོ་བྱས་ནས། ཡུལ་སྐོར་པའི་བསམ་འཆར་དྲིས་པ་དང་། ཡུལ་དངོས་སུ་འབྲེལ་ཡོད་གནད་དོན་མཐུན་སྦྱོར་ཐག་གཅོད་བྱས།
རྟོག་ཞིབ་ཁྲོད། ལུའོ་ཏུང་ཁྲོན་གྱིས་ནན་གྱིས་བསྟན་དོན། ཐོག་མཐའ་བར་གསུམ་དུ་མཚོ་སྔོན་གྱི་སྐྱེ་ཁམས་ཁོར་ཡུག་ལ་སྲུང་སྐྱོབ་ཡག་པོ་བྱེད་རྒྱུ་ནི“རྒྱལ་དོན་གྱི་ཆེ་ཕྱོགས”ཡིན་པ་བློ་ལ་བརྟན་པོར་ངེས་དགོས་པ་དང་། མཚོ་སྔོན་པོའི་སྐྱེ་ཁམས་རིན་ཐང་དང་ཡུལ་སྐོར་རིན་ཐང་གལ་ཆེན་ལ་ངོས་འཛིན་གཏིང་ཟབ་བྱས་ཏེ། རྒྱལ་ཁབ་སྤྱི་གླིང་འཛུགས་སྐྲུན་དམིགས་འབེན་དུ་བྱས་ནས། ཕྱོགས་ཡོངས་ནས་སྐྱེ་ཁམས་ཁོར་ཡུག་སྲུང་སྐྱོབ་ལ་ཤུགས་བསྣན་ཏེ་མཛེས་ལྗོངས་ཁུལ་ཚང་མར་སྐྱེ་ཁམས་དཔལ་ཡོན་གྱི་འདུ་ཤེས་ལྟ་བའི་དྲིལ་བསྒྲགས་སློབ་གསོའི་གཡུལ་ས་བསྐྲུན་ནས། “མཐོ་སྒང་གི་གཡུ་མཚོར”མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་སྐྱེ་ཁམས་ཀྱི་མཛེས་ལྗོངས་མངོན་དུ་འཇུག་དགོས། འཆར་འགོད་སྣེ་ཁྲིད་རྒྱུན་འཁྱོངས་བྱས་ནས། རིག་གནས་ཡུལ་སྐོར་མཉམ་འདྲེས་ལ་སྐུལ་འདེད་གཏོང་བ་དང་། ཞབས་ཞུའི་སྤུས་ཚད་མཐོ་རུ་གཏོང་བ། ཞིང་འབྲེལ་ཞིང་ཁྲིད་གཏིང་ཟབ་ཏུ་གཏོང་བ། རང་བྱུང་ལྟ་སྐོར་དང་སྐྱེ་ཁམས་སློབ་གསོ། རིག་གནས་ཉམས་མྱོང་། ཚན་རིག་ཁྱབ་གདལ་དང་སློབ་སྦྱོང་ཞིབ་འཇུག ཕྱི་རོལ་འགུལ་སྐྱོད་སོགས་ཀྱི་ནུས་པ་གཞི་གཅིག་ཅན་གྱི་མཐོ་སྒང་གི་མཚེའུ་ཡི་སྐྱེ་ཁམས་ཡུལ་སྐོར་བྱེད་ཡུལ་བསྐྲུན་ནས། དུས་ཚིགས་ཡོངས་དང་ས་ཁོངས་ཡོངས། དུས་ཡོངས་བཅས་ཀྱི་རྒྱལ་སྤྱིའི་སྐྱེ་ཁམས་ཡུལ་སྐོར་དམིགས་སའི་དཔེ་སྟོན་ཁུལ་བསྐྲུན་དགོས། བདེ་འཇགས་ཀྱི་ཚད་མཐའ་བརྟན་པོར་སྲུང་བ་དང་ཕྱོགས་སོ་སོའི་འགན་འཁྲི་ནན་དཀྲི་བྱེད་པ། བདེ་འཇགས་ཀྱི་ལྟ་སྐུལ་དོ་དམ་ལ་ཤུགས་སྣོན་པ། ཕྱོགས་ཡོངས་ནས་རོལ་རྩེད་སྒྲིག་ཆས་དང་། མཛེས་ལྗོངས་ཁུལ་གྱི་མེ་ཟོན། ཟས་རིགས་བདེ་འཇགས་སོགས་ཁྱབ་ཁོངས་ཀྱི་མངོན་མེད་རྐྱེན་ངན་སེལ་ནས། མཛེས་ལྗོངས་ཁུལ་གྱི་བདེ་འཇགས་དང་འཁོར་སྐྱོད་ལ་ཁག་ཐེག་བྱེད་དགོས། སྒྲིག་སྲོལ་དང་ལམ་སྲོལ་འཐུས་ཚང་དུ་གཏོང་བ་དང་། མཐུན་སྦྱོར་མཉམ་འགུལ་བྱེད་ཤུགས་ཆེ་རུ་གཏོང་བ། ཞིང་ཆེན་རིམ་པའི་གཅིག་གྱུར་འཆར་འགོད་དང་། སྡེ་ཁག་མཉམ་འབྲེལ། ས་ཁོངས་མཐུན་སྦྱོར། སྤྱི་ཚོགས་ཟབ་ཞུགས་བཅས་ཀྱི་གསར་སྐྲུན་རྣམ་པ་འཛུགས་པ་དང་། མཉམ་སྐྲུན་མཉམ་བཅོས་མཉམ་སྤྱོད་ཀྱི་སྟོབས་ཤུགས་གཅིག་ཏུ་བསྡུ་དགོས།
ཁྲིན་ཅི་ཝེ་བྱ་འགུལ་ལ་ཞུགས།
ཤ་བོ་རིན་མཚོས་བསྒྱུར།
