ཟླ6པའི་ཚེས20ཉིན། མཚོ་སྔོན་ཞིང་ཆེན་གྱི་ཚོང་འགུག་དངུལ་འདྲེན་འོས་སྦྱོར་ཚོགས་འདུ་ཐེན་ཅིན་གྲོང་ཁྱེར་དུ་འཚོགས་ཤིང་།    སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཁ་གཏད་རོགས་སྐྱོར་སྐོར་གྱི་མཛུབ་སྟོན་གལ་ཆེན་དང་མཚོ་སྔོན་ལ་གཟིགས་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ལག་བསྟར་གཏིང་ཟབ་དང་དོན་འཁྱོལ་བྱས་ཏེ།    སྒོ་འབྱེད་མཉམ་ལས་བྱེད་ཐབས་སུ་བྱེད་པ་དང་ཕན་ཚུན་ཡིད་ཆེས་དང་མཉམ་རྒྱལ་རྨང་གཞིར་བྱས་ནས།    ཐབས་ཇུས་མཉམ་འདོན་བྱས་ཏེ་འཕེལ་རྒྱས་ཀྱི་གོ་སྐབས་གསར་པ་འཚོལ་བ་དང་། མཛེས་སྡུག་གི་མ་འོངས་པ་གསར་གཏོད་བྱེད་པ། སྤུས་ཚད་མཐོ་བའི་འཕེལ་རྒྱས་ཀྱི་ལེའུ་གསར་པ་མཉམ་དུ་རྩོམ་དགོས། ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཝུའུ་ཞའོ་ཅུན་གྱིས་ཤིས་ཚིག་ཕུལ་བ་དང་། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ལུའོ་ཏུང་ཁྲོན་གྱི་འགོ་འཛིན་བྱས།

ཐེན་ཅིན་གྲོང་ཁྱེར་གྱི་ཁེ་ལས100ལྷག་གི་འཐུས་མི་དང་འབྲེལ་ཡོད་ས་ཁུལ་དང་སྡེ་ཁག་གི་འགན་འཁུར་བློ་མཐུན་གྲོས་ཚོགས་སུ་ཞུགས།  ཕིང་ཡུན་གཞི་གྲངས་ཀྱི་འགན་འཛིན་པ་སུང་ཞའོ་ཡུས་དང་།  ཀྲུང་ཁི་ཧྲུའུ་ཀོང་གི་མཐོ་རིམ་ཙུང་ཚའེ་གཞོན་པ་ཀོན་ཧུང་མིན།    ཧན་ཀུའུ་ཡན་ཁྲང་གི་འགན་འཛིན་པ་ཝུའེ་ལིས་དབྱིན།    ཐེན་ཅིན་ཡུལ་སྐོར་སྡེ་ཚོགས་ཀྱི་འགན་འཛིན་པ་ཡུས་ཆིན་བཅས་ཀྱིས་བརྗེ་རེས་གཏམ་བཤད་བྱས།

ཝུའུ་ཞའོ་ཅུན་གྱིས་མཚོ་སྔོན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་། ཞིང་ཆེན་ཡོངས་ཀྱི་རིགས་སོ་སོའི་མི་དམངས་བཅས་ཀྱི་ཚབ་བྱས་ཏེ་དུས་ཡུན་རིང་པོར་མཚོ་སྔོན་གྱི་འཕེལ་རྒྱས་ལ་རྒྱབ་སྐྱོར་བྱེད་པའི་ཐེན་ཅིན་གྱི་ལས་རིགས་སོ་སོའི་གྲོགས་པོར་ལྷག་བསམ་རྣམ་དག་གིས་བཀའ་དྲིན་ཞུས། ཁོས་བཤད་རྒྱུར། ཏང་གི་ཚོགས་ཆེན་བཅོ་བརྒྱད་པའི་ཚུན་ལ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐོག་མཐའ་བར་གསུམ་དུ་མཚོ་སྔོན་དང་ཐེན་ཅིན་ས་ཁུལ་གཉིས་ཀྱི་འཕེལ་རྒྱས་ལ་ཐུགས་ཁུར་ཧ་ཅང་ཆེན་པོ་གནང་གིན་ཡོད།    ཞིང་ཆེན་དང་གྲོང་ཁྱེར་གཉིས་ཀྱིས་དུས་དང་བར་སྟོང་ལས་བརྒལ་ཏེ་ལག་གདང་སྦྲེལ་ནས་འབད་འཐབ་ཀྱི་ལོ་རྒྱུས་སྙན་ངག་མཉམ་དུ་འབྲི་བ་དང་།    “རྒྱལ་དོན་གྱི་ཆེ་ཕྱོགས”མཉམ་དུ་སྲུང་སྐྱོབ་བྱེད་པ།    སྒོ་འབྱེད་ཀྱི་ལམ་བུ་མཉམ་དུ་རྒྱ་བསྐྱེད་པ་བཅས་བྱས་ཏེ།    སྤྱི་ཚོགས་རིང་ལུགས་ཀྱི་ལམ་ལུགས་ཀྱིས་སྟོབས་ཤུགས་གཅིག་སྡུད་བྱས་ནས་དོན་ཆེན་སྒྲུབ་པའི་ཁྱད་འཕགས་རང་བཞིན་གསལ་འགྲེལ་གསོན་ཉམས་ལྡན་པ་བྱས་ཡོད། ཐེན་ཅིན་གྱི“སྒོ་འབྱེད་ལྟེ་གནས”དང་མཚོ་སྔོན་གྱི“ཐོན་ཁུངས་ཁྱད་སྟོབས”རང་བྱུང་གིས་གསབ་རེས་བྱས་པར་བརྟེན་ནས། ཉེ་བའི་ལོ་འགའི་རིང་ལ། ཐེན་ཅིན་གྱི་ཁེ་ལས་མང་པོ་ཞིག་གིས་མཚོ་སྔོན་གྱི་ལྗང་མདོག་རྩིས་ནུས་དང་།  ཁྱད་ལྡན་ཞིང་ཕྱུགས། རྫས་འགྱུར་བཟོ་ལས་སོགས་མངའ་ཁོངས་སུ་དངུལ་གཏོང་ལས་གཉེར་བྱས་ནས། མ་དངུལ་སྒོར་ཐེར་འབུམ་དྲུག་དང་དུང་ཕྱུར་གཉིས་བཏང་ཡོད་པ་དང་། ས་ཁུལ་གཉིས་ཀྱི་སེམས་ཤུགས་གཅིག་སྒྲིལ་གྱིས་དཀའ་ངལ་སེལ་བ་དང་དཔུང་པ་མཉམ་གཤིབ་ཀྱིས་མཉམ་ལས་གཉིས་རྒྱལ་གྱི་དུས་སྐབས་ཡག་ཤོས་བསུ་བཞིན་ཡོད།

ཝུའུ་ཞའོ་ཅུན་གྱིས་བཤད་རྒྱུར། མཚོ་སྔོན་གྱི་གོ་སྐབས་ནི་ཚང་མའི་གོ་སྐབས་ཡིན།     མཚོ་སྔོན་གྱི་མ་འོངས་པ་ནི་ཚང་མ་དང་ལག་གདང་སྦྲེལ་ནས་མཉམ་རྒྱལ་བྱེད་པའི་མ་འོངས་པ་ཡིན་ངེས།     རྒྱ་ཆེའི་ཐེན་ཅིན་གྱི་ཚོང་པ་མཚོ་སྔོན་དུ་ཕེབས་པ་དང་མཚོ་སྔོན་ལ་རྒྱུས་ལོན་བྱེད་པ། མཚོ་སྔོན་ལ་མ་དངུལ་གཏོང་དུ་ཡོང་བར་ལྷག་བསམ་རྣམ་དག་གིས་བསུ་མ་བྱེད།    “ལིས”ཀྱི་འཛམ་གླིང་གི་འདོན་སྤྲོད་ཕྲེང་འབྲེལ་མཉམ་དུ་བསྐྲུན་ནས་ཐཱན་མེད་དཔལ་འབྱོར་གྱི་རྒྱུགས་ལམ་གསར་པར་བསྐྱོད་དེ། སྐྱེ་ཁམས་ཡུལ་སྐོར་གྱི་གསང་བའི་ལྡེ་མིག་བཀྲོལ་བ་དང་། “མཚོ་སྔོན་རྟགས”ཀྱི་སྐྱེ་ལྡན་ལྗང་མདོག་ཟས་རིགས་པེ་ཅིང་དང་ཐེན་ཅིན། ཧི་པེ་བཅས་སུ་ཐད་ཀར་དུ་རོལ་མྱོང་བྱེད་ཐུབ་པར་བྱ་དགོས།  ང་ཚོས་མཚོ་སྔོན་གྱི་ཡོད་ཚད་དང་མཚོ་སྔོན་གྱི་ཁྱད་སྟོབས་ལ་གཞི་ཚུགས་ནས། ཐོག་མཐའ་བར་གསུམ་དུ་ཚོང་གཉེར་ཁོར་ཡུག་དེ་ཁེ་ལས་འཕེལ་རྒྱས་ཀྱི་གཙོ་གནད་དུ་བརྩིས་ནས། ཐེན་ཅིན་གྱི་ཕྱོགས་སོ་སོ་དང་ཁེ་ལས་སོ་སོར་བརྗེ་རེས་བྱེད་པར་ཤུགས་སྣོན་པ་དང་མཉམ་ལས་གཏིང་ཟབ་ཏུ་བཏང་སྟེ། སྤུས་ཚད་མཐོ་བའི་འཕེལ་རྒྱས་ཀྱི་བར་སྟོང་གསར་པ་རྒྱ་སྐྱེད་དེ་མཚོ་སྔོན་དུ་དངུལ་གཏོང་བྱེད་པའི་ཁེ་ལས་པ་ཚང་མ་དང་མཉམ་དུ་དུས་རབས་གསར་པའི་འོད་སྟོང་བསྐྲུན་རྒྱུ་ཡིན།

ལུའོ་ཏུང་ཁྲོན་གྱིས་འགོ་འཛིན་བྱེད་སྐབས་བཤད་རྒྱུར། མིག་སྔར་ས་ཁོངས་མཐུན་སྦྱོར་འཕེལ་རྒྱས་ཀྱི་ཚ་རླབས་འཕྱུར་བཞིན་ཡོད་པས།    སྒོ་འབྱེད་མཉམ་ལས་ནི་མ་འོངས་པར་རྒྱལ་ཁ་ཐོབ་པའི་ལྡོག་མེད་ཀྱི་གདམ་ག་ཞིག་ཏུ་གྱུར་ཡོད།     ད་ལྟའི་མཚོ་སྔོན་དང་ཐེན་ཅིན་ནི་རྒྱལ་ཁབ་ཀྱི་འཐབ་ཇུས་ལ་བརྟེན་ནས་ལག་གདང་སྦྲེལ་བ་དང་།   ཁྱད་སྟོབས་གསབ་རེས་ལ་བརྟེན་ནས་མཉམ་འགུལ་བྱེད་པ།  བརྗེ་རེས་མཉམ་ལས་ལ་བརྟེན་ནས་མཉམ་དུ་མདུན་སྐྱོད་བྱེད་བཞིན་ཡོད། ཐེངས་འདིའི་འོས་སྦྱོར་ཚོགས་འདུ་སྤེལ་བའི་དམིགས་ཡུལ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཁ་གཏད་རོགས་སྐྱོར་བྱ་བའི་མཛུབ་སྟོན་གལ་ཆེན་དང་མཚོ་སྔོན་ལ་གཟིགས་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ལག་བསྟར་གཏིང་ཟབ་དང་དོན་འཁྱོལ་བྱེད་པ། པེ་ཅིང་དང་ཐེན་ཅིན། ཧི་པེ་བཅས་མཐུན་སྦྱོར་ངང་འཕེལ་རྒྱས་གཏོང་བའི་རྒྱལ་ཁབ་ཀྱི་འཐབ་ཇུས་སྟེགས་བུར་བརྟེན་ནས། བརྗེ་རེས་གཏིང་ཟབ་ཏུ་གཏོང་བ་དང་གནད་ལ་འཁེལ་བའི་འབྲེལ་མཐུད་བྱས་ཏེ། མཚོ་སྔོན་དང་ཐེན་ཅིན་ས་ཁུལ་གཉིས་ཀྱི་ཐོན་ལས་མཉམ་ལས་ལ་སྔར་ལས་སྐུལ་འདེད་གཏོང་ཆེད་ཡིན། ང་ཚོས་ཁེ་ལས་གཉེར་མཁན་གྱི་གྲོགས་པོ་མཚོ་སྔོན་དུ་ཕེབས་པ་དང་། མཚོ་སྔོན་དུ་མ་དངུལ་གཏོང་བ། མཚོ་སྔོན་དུ་གཞིས་ཆགས་པར་ལྷག་བསམ་རྣམ་དག་གིས་གདན་འདྲེན་ཞུས་པ་ཡིན། སྐྱེ་སྟོབས་ཀྱི་དཔལ་འབར་བའི་མཐོ་སྒང་གི་ས་གཞི་ཆེན་མོའི་སྟེང་མཉམ་ལས་ཀྱི་གོ་སྐབས་མཉམ་སྤྱོད་དང་།    འཕེལ་རྒྱས་ཀྱི་དཔེ་རིས་མཉམ་དུ་འབྲི་བ།   མཉམ་དུ་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ལ་མཛེས་སྡུག་གི་ལེའུ་གསར་བ་འབྲི་དགོས།

ཀྲང་ཅིན་ཀང་གིས་ཚོང་འགུག་དངུལ་འདྲེན་འོས་སྦྱོར་བྱས་པ་དང་། ཝང་ཝེ་ཏུང་དང་ཀྲུའུ་ཞང་ཧྥིན་བྱེད་སྒོར་ཞུགས།

ཤ་བོ་རིན་མཚོས་བསྒྱུར།