ས་དེའི་དུས་ཚོད་ཟླ7པའི་ཚེས7ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་ལིས་ཡའེ་རི་ནེ་ལུའུ་རུ་འཛམ་གླིང་ཉོ་ཚོང་རྩ་འཛུགས་ཀྱི་སྤྱི་ཁྱབ་འགན་འཛིན་པ་དབྱི་ཝེ་ལཱ་དང་མཇལ་འཕྲད་གནང་།
ལིས་ཆང་གིས་བསྟན་དོན། མིག་སྔའི་འཛམ་གླིང་ཉོ་ཚོང་གནས་བབ་ལ་འགྱུར་ལྡོག་ཆེན་པོ་བྱུང་ཡོད་པ་དང་། རྒྱལ་སྤྱིའི་སྤྱི་ཚོགས་ཀྱིས་ཕྱོགས་མང་ཉོ་ཚོང་སྒྲིག་གཞི་ལ་སྲུང་སྐྱོང་བྱེད་པའི་འབོད་སྒྲ་སྔར་ལས་མཐོ་ལ། འཛམ་གླིང་ཉོ་ཚོང་རྩ་འཛུགས་ཀྱིས་ནུས་པ་སྔར་ལས་ཆེན་པོ་འདོན་པའི་རེ་སྒུག་ཉིན་རེ་བཞིན་ཇེ་ཆེར་འགྲོ་བཞིན་ཡོད། ཀྲུང་གོས་སྔར་བཞིན་དུ་ཕྱོགས་མང་རིང་ལུགས་དང་རང་དབང་ཉོ་ཚོང་ལག་བསྟར་དང་སྲུང་སྐྱོང་བྱེད་པ་དང་། འཛམ་གླིང་ཉོ་ཚོང་རྩ་འཛུགས་ཀྱི་བཅོས་བསྒྱུར་འཕེལ་རྒྱས་ལ་མུ་མཐུད་དུ་ ་རྒྱབ་སྐྱོར་ཆེན་པོ་བྱེད་པ། རྒྱལ་སྤྱིའི་སྤྱི་ཚོགས་དང་མཉམ་དུ་འབད་བརྩོན་བྱས་ནས། འཛམ་གླིང་གི་དཔལ་འབྱོར་སྔ་མོ་ནས་ཡང་དག་པའི་ལམ་དུ་ཞུགས་པར་སྐུལ་འདེད་གཏོང་འདོད་ཡོད། ཀྲུང་གོར་རང་ངོས་ཀྱི་དཔལ་འབྱོར་རྒྱུན་མཐུད་དང་བདེ་ཐང་ངང་འཕེལ་རྒྱས་སུ་གཏོང་བར་ཡིད་ཆེས་དང་ནུས་པ་ཡོད་ལ། ང་ཚོས་རང་བདག་སྒོ་འབྱེད་དང་ཕྱོགས་རྐྱང་སྒོ་འབྱེད་ཀྱི་བྱེད་ཐབས་སྔར་ལས་མང་པོ་ཕྱིར་བཏོན་ནས། རྒྱལ་ཁབ་སོ་སོ་དང་འཕེལ་རྒྱས་ཀྱི་གོ་སྐབས་མུ་མཐུད་དུ་མཉམ་སྤྱོད་བྱ་རྒྱུ་ཡིན།
དབྱི་ཝེ་ལ་ཡིས་བསྟན་དོན། འཛམ་གླིང་ཉོ་ཚོང་རྩ་འཛུགས་ཀྱིས་ཕྱོགས་མང་ཉོ་ཚོང་སྒྲིག་གཞིའི་ཁྲོད་ཀྱི་ཀྲུང་གོའི་ནུས་པ་གལ་ཆེན་ལ་གདེང་འཇོག་ཆེན་པོ་བྱེད་ཀྱིན་ཡོད་པ་དང་། ཀྲུང་གོ་དང་ཁོངས་གཏོགས་རྒྱལ་ཁབ་གཞན་དག་དང་མཉམ་དུ། འཛམ་གླིང་ཉོ་ཚོང་རྩ་འཛུགས་ཀྱི་བཅོས་བསྒྱུར་ལ་སྐུལ་འདེད་གཏོང་བ་དང་། སྒོ་འབྱེད་དཀྱེལ་ཡངས་ཀྱི་ཉོ་ཚོང་ཁོར་ཡུག་བསྐྲུན་ནས། འཛམ་གླིང་ཉོ་ཚོང་འཕེལ་རྒྱས་དང་དཔལ་འབྱོར་སླར་གསོ་ཡོང་ཆེད་མཐུན་རྐྱེན་བཟང་པོ་བསྐྲུན་འདོད་ཡོད།
