ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཏིང་ཞུའེ་ཞང་ཚེས11ཉིན་གྱི་སྔ་དྲོར་ཐེན་ཅིན་ནས2025ལོའི་ཧྲང་ཧའེ་མཉམ་ལས་རྩ་འཛུགས་ཀྱི་གཞི་གྲངས་དཔལ་འབྱོར་གླེང་སྟེགས་འགོ་རྩོམ་པའི་མཛད་སྒོར་ཞུགས་པར་མ་ཟད་གཙོ་དོན་གསུང་བཤད་གནང་།
ཏིང་ཞུའེ་ཞང་གིས་བསྟན་དོན། ཀྲུང་གོ་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཧྲང་ཧའེ་མཉམ་ལས་རྩ་འཛུགས་ཀྱི་གཞི་གྲངས་དཔལ་འབྱོར་མཉམ་ལས་ལ་ཧ་ཅང་མཐོང་ཆེན་བྱེད་ཀྱིན་ཡོད་པ་དང་། ཀྲུང་གོས་ཁོངས་གཏོགས་རྒྱལ་ཁབ་སོ་སོ་དང་མཉམ་དུ“ཧྲང་ཧའེ་ཡི་སྙིང་སྟོབས”དར་སྤེལ་གཏོང་བ་དང་། གཞི་གྲངས་དཔལ་འབྱོར་གྱི་རྒྱལ་སྤྱིའི་མཉམ་ལས་ཁྲོད་ཟབ་ཞུགས་བྱས་ནས། གྲངས་འཛིན་ཅན་དང་དྲ་སྦྲེལ་ཅན། རིག་ནུས་ཅན་བཅས་ཀྱིས་དཔལ་འབྱོར་སྤྱི་ཚོགས་འཕེལ་རྒྱས་སུ་གཏོང་བའི་ཐད་སྒུལ་ཤུགས་སྣོན་པ་དང་། གཞི་གྲངས་དཔལ་འབྱོར་མཉམ་ལས་ཀྱི་རྣམ་པ་གསར་པ་བསྐྲུན་འདོད་ཡོད། ཉེ་བའི་ལོ་ཤས་རིང་། ཧྲང་ཧའེ་མཉམ་ལས་རྩ་འཛུགས་ཀྱི་གཞི་གྲངས་དཔལ་འབྱོར་མཉམ་ལས་ལ་རྒྱུན་མཐུད་ངང་སྐུལ་འདེད་བཏང་བ་དང་། གཞི་གྲངས་ལག་རྩལ་དེ་དཔལ་འབྱོར་སྤྱི་ཚོགས་འཕེལ་རྒྱས་དང་མཉམ་འདྲེས་གཏིང་ཟབ་བྱ་རྒྱུར་སྐུལ་འདེད་བཏང་ནས། ཁོངས་གཏོགས་རྒྱལ་ཁབ་སོ་སོའི་སྤུས་ཚད་མཐོ་བའི་འཕེལ་རྒྱས་ཐད་འདེགས་སྐྱོར་གལ་ཆེན་འདོན་སྤྲོད་བྱས།
ཏིང་ཞུའེ་ཞང་གིས་ཧྲང་ཧའེ་མཉམ་ལས་རྩ་འཛུགས་ཀྱིས་ལག་གདང་མཉམ་སྦྲེལ་སྒོས་སྔར་ལས་མཛེས་སྡུག་ལྡན་པའི“གཞི་གྲངས་ཀྱི་མ་འོངས་པར”བསྐྱོད་པར་སྐུལ་འདེད་གཏོང་བའི་ཐད་ནས་གྲོས་གཞི་བཞི་བཏོན་ཡོད་དེ། གཅིག་ནས་གཞི་གྲངས་དཔལ་འབྱོར་གྱི་མཉམ་ལས་རྐྱེན་སྲོལ་ཅན་དང་རྒྱུན་རྣམ་ཅན་དུ་བསྒྱུར་བར་སྐུལ་འདེད་གཏོང་བ་དང་། སྲིད་ཇུས་ཀྱི་མཐུན་སྦྱོར་དང་འཕེལ་རྒྱས་ཀྱི་འཆར་གཞི་འབྲེལ་མཐུད་བྱེད་པར་ཤུགས་བསྣན་ནས། གཞི་གྲངས་དཔལ་འབྱོར་འཕེལ་རྒྱས་སུ་གཏོང་བའི་ཐད་གསོན་ཤུགས་དང་སྒུལ་ཤུགས་སྣོན་དགོས། གཉིས་ནས་གཞི་གྲངས་ཀྱི་རྨང་གཞིའི་སྒྲིག་ཆས་ཀྱི་མཉམ་འབྲེལ་མཉམ་མཐུད་ཆུ་ཚད་ཕྱོགས་ཡོངས་ནས་མཐོར་འདེགས་གཏོང་བ་དང་། དྲ་རྒྱའི་འཕྲིན་གཏོང་དང་རྩིས་ནུས་བཀོད་གཏོང་། གཞི་གྲངས་ཐག་གཅོད་སོགས་ཀྱི་ནུས་ཤུགས་འཛུགས་སྐྲུན་ལ་རྒྱུན་མཐུད་ངང་ཤུགས་བསྣན་ནས། སྤུས་ཚད་མཐོ་བའི་སྒོ་ནས“གཞི་གྲངས་ཀྱི་དར་གོས་ཚོང་ལམ”མཉམ་སྐྲུན་བྱེད་དགོས། གསུམ་ནས་གཞི་གྲངས་ལག་རྩལ་གསར་གཏོད་ཀྱི་གྲུབ་འབྲས་གཉིས་ཕན་མཉམ་སྤྱོད་བྱེད་པར་སྐུལ་འདེད་གཏིང་ཟབ་གཏོང་བ་དང་། གཞི་གྲངས་དཔལ་འབྱོར་གྱི་དཀྱེལ་ཡངས་རང་བཞིན་དང་གཞི་གྲངས་ཅན་གྱི་ཚུལ་སྒྱུར་ཁེ་སྤོགས་ཀྱི་སྤྱོད་ཆོག་རང་བཞིན་ཇེ་མཐོར་བཏང་སྟེ། རྒྱལ་ཁབ་ཚང་མ་གཞི་གྲངས་དཔལ་འབྱོར་འཕེལ་རྒྱས་ཀྱི་མགྱོགས་འཁོར་ནང་སྡོད་ཐུབ་པར་བྱེད་དགོས། བཞི་ནས་ཕྱོགས་མང་མཉམ་ལས་ཀྱི་གཞི་གྲངས་བདེ་འཇགས་བཅོས་སྐྱོང་མ་ལག་མཉམ་བསྐྲུན་བྱས་ནས། ཀུན་ཕན་དོ་མཉམ་དང་མཐུན་སྦྱོར་དཀྱེལ་ཡངས། མཉམ་ལས་མཉམ་རྒྱལ། ཐུན་མོང་དར་རྒྱས་བཅས་ཀྱི་འཛམ་གླིང་ཧྲིལ་པོའི་གཞི་གྲངས་དཔལ་འབྱོར་གྱི་རྣམ་པ་གྲུབ་པར་བྱེད་དགོས། ཏིན་ཞུའེ་ཞང་གིས། ཐེངས་འདིའི་གླེང་སྟེགས་ཀྱིས་ཧྲང་ཧའེ་མཉམ་ལས་རྩ་འཛུགས་ཐེན་ཅིན་རྩེ་ཚོགས་ལ་གཞི་གྲངས་དཔལ་འབྱོར་ཁྱབ་ཁོངས་ཀྱི་མཉམ་ལས་གྲུབ་འབྲས་ཀྱི་གྲ་སྒྲིག་ལེགས་པོ་བྱ་རྒྱུའི་རེ་བ་བཅངས་ཡོད་ཟེར།
འབར་མའི་ཙུང་ལི་གཞོན་པ་དང་འགྲིམ་འགྲུལ་འཕྲིན་གཏོང་པུའུ་ཀྲང་གི་འགན་གཅིག་ལྕོགས་སུ་བཞེས་པའི་མེའོ་ཐོན་ཝུའུ་དང་། ཧྲང་ཧའེ་མཉམ་ལས་རྩ་འཛུགས་ཀྱི་དྲུང་ཡིག་ཆེན་མོ་ཡེར་མེ་ཁི་པ་ཡེ་ཧྥུའུ་འགོ་རྩོམ་མཛད་སྒོར་ཞུགས་ནས་ཤིས་ཚིག་ཕུལ།
ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། ཐེན་ཅིན་གྲོང་ཁྱེར་གྱི་ཏང་ཨུའི་ཧྲུའུ་ཅི་ཁྲིན་མིན་ཨར་འགོ་རྩོམ་མཛད་སྒོར་ཞུགས།
