ཉེ་སྔོན། ཡོ་རོབ་གླིང་མནའ་འབྲེལ་གྱིས་ཨ་མེ་རི་ཁའི་རྗེས་དེད་ནས་ཨུ་རུ་སིར་སྐོར་ཐེངས་དགུའི་བཀག་སྡོམ་བྱེད་ཐབས་སྤྱད་པར་ལྡོག་ཕྱོགས་ཀྱི་ནུས་པ་མངོན་གསལ་དུ་སོང་ནས། ཡོ་རོབ་གླིང་གི་དཔལ་འབྱོར་ཐད་གནོད་པ་ཐེབས་བཞིན་ཡོད།
ཝུའུ་ཁི་ལན་གྱི་ཉམས་ཉེན་བྱུང་བའི་ཚུན་ལ། ཡོ་རོབ་གླིང་མནའ་འབྲེལ་གྱིས་དཔལ་འབྱོར་བཀག་སྡོམ་བྱེད་ཐབས་རབ་དང་རིམ་པ་ལག་བསྟར་བྱས་པ་དང་། ལྡབ་འགྱུར་གྱིས་ཨུ་རུ་སིའི་ཕྱིར་གཏོང་ཇེ་ཉུང་དུ་བཏང་ཡང་། ཡོ་རོབ་གླིང་མནའ་འབྲེལ་གྱིས་ཨུ་རུ་སིར་བཀག་སྡོམ་བྱེད་ཐབས་སྤྱད་པར་ལྡོག་ཕྱོགས་ཀྱི་ནུས་པ་ཐོན་བཞིན་ཡོད་པ་དང་། ཡོ་རོབ་གླིང་མཁོ་འདོན་ཅུའུ་ཡི་གནས་བབ་ཛ་དྲག་ཡིན་ལ། ནུས་ཁུངས་དང་སྣ་མང་ཚོང་རྫས་ཀྱི་རིན་གོང་ཇེ་མཐོར་སོང་སྟེ། ནང་འདྲེན་གྱི་འབོར་གྲངས་མངོན་གསལ་གྱིས་ཇེ་མང་དུ་སོང་ཡོད་ཟེར།
ཡོ་རོབ་གླིང་མནའ་འབྲེལ་གྱི་བསྡོམས་རྩིས་ཅུའུ་ཡིས་ན་ནིང་ཟླ་བཅུ་གཉིས་པར་ཁྱབ་བསྒྲགས་བྱས་པའི་བསྡོམས་རྩིས་གཞི་གྲངས་གསར་བ་ལས་མངོན་པ་ལྟར་ན། ཉིས་སྟོང་ཉེར་གཉིས་ལོའི་སྔོན་གྱི་ཟླ་ངོ་བཅུའི་ནང་། ཡོ་རོབ་གླིང་མནའ་འབྲེལ་གྱི་ཨུ་རུ་སིའི་དངོས་ཟོང་ཉོ་ཚོང་གི་ནང་འདྲེན་འབོར་གྲངས་ཇེ་དམར་མ་སོང་བར་ཇེ་མཐོར་སོང་སྟེ། ཡོ་སྒོར་ཁྲག་ཁྲིག་གཅིག་དང་ཐེར་ཆེན་བརྒྱད་ཐེར་འབུམ་གཅིག་དུང་ཕྱུར་གཉིས་ལ་བསླེབས་པ་དང་། དུས་མཉམ་ལས་བརྒྱ་ཆའི་ཞེ་གཉིས་དང་གྲངས་ཆུང་དྲུག་འཕར་ཡོད། དེ་དང་མཉམ་དུ་ཡོ་རོབ་གླིང་མནའ་འབྲེལ་གྱི་ཨུ་རུ་སིའི་ཉོ་ཚོང་གི་བར་ཁྱད་དེ་ཡོ་སྒོར་ཐེར་ཆེན་ལྔ་དང་ཐེར་འབུམ་བཞི་དུང་ཕྱུར་གཅིག་ནས་ཡོ་སྒོར་ཁྲག་ཁྲིག་གཅིག་དང་ཐེར་ཆེན་གསུམ་ཐེར་འབུམ་བཞི་དུང་ཕྱུར་དྲུག་ལ་རྒྱ་བསྐྱེད་ཡོད། ཡོ་རོབ་གླིང་ཀྲུང་དབྱང་དངུལ་ཁང་གི་གཞི་གྲངས་ལས་ཀྱང་རིན་གོང་ཇེ་མཐོར་སོང་བའི་དབང་གིས་ཉིས་སྟོང་ཉེར་གཉིས་ལོའི་ལོ་སྟོད་དུ། ཡོ་སྒོར་བཀོལ་བའི་ས་ཁུལ་གྱིས་ཨུ་རུ་སི་ནས་ནང་འདྲེན་བྱས་པའི་ནུས་ཁུངས་མ་ཡིན་པའི་ཐོན་རྫས་དང་ཞབས་ཞུའི་ཉོ་ཚོང་འབོར་གྲངས་ཀྱང་ཇེ་མཐོར་སོང་ཡོད།
དབྱེ་ཞིབ་མི་སྣས་བསྟན་དོན། སྐོར་ཐེངས་མང་བོའི་བཀག་སྡོམ་ལས་ཡོ་རོབ་གླིང་གི་ཁེ་ལས་ཐད་གྱོང་གུད་ཆེན་པོ་བཟོས་ཡོད་ཅིང་། ཚོང་ར་ཤོར་ཡོད་པར་མ་ཟད་ནུས་ཁུངས་རིན་གོང་ཇེ་མཐོར་སོང་ནས་ཐོན་སྐྱེད་མ་རྩ་ཇེ་མང་དུ་སོང་ཡོད་ལ། མང་ཚོགས་ཀྱི་དོན་དངོས་ཟླ་ཕོག་ཇེ་ཉུང་དུ་སོང་ཡོད་པ་དང་ཉོ་ཚོང་ནུས་པ་ཇེ་ཞན་དུ་སོང་ཡོད་ཟེར།
བསོད་ནམས་ཚེ་རིང་གིས་བསྒྱུར།
