ཕེ་རུའི་པུའུ་ཀྲང་གྲོས་ཚོགས་ཀྱི་ཀྲུའུ་ཞི་ཨོ་ཐཱ་ལོ་ལཱ་ཡིས་ཚེས་དགུ་ཉིན་གྱི་དགོང་མོར་གསལ་སྒྲོག་སྤེལ་ཏེ། ལྷོ་ཕྱོགས་ཀྱི་ཕུའུ་ནོའུ་ཞིང་ཆེན་གྱི་ཧུའུ་ལེ་ཡཱ་ཁཱ་གྲོང་ཁྱེར་དུ་ཉིན་དེར་གཞི་རྒྱ་ཆེ་བའི་རྩ་འཛུགས་ཅན་གྱི་དྲག་ཤུགས་གཏོར་བརླག་བྱ་འགུལ་བྱུང་བ་དང་། སྲིད་གཞུང་གིས་གང་མགྱོགས་སྒོས་ས་དེའི་སྒྲིག་ལམ་སླར་གསོ་བྱས་ཏེ་དྲག་ཤུགས་བྱ་འགུལ་ལ་ཁྲིམས་འཛིན་ཐད་ནས་རྟོག་ཞིབ་བྱེད་རྒྱུ་ཡིན་ཟེར།
ཨོ་ཐཱ་ལོ་ལཱ་ཡིས་བཤད་རྒྱུར། ཉིན་དེར་རྔམ་སྟོན་ཁྲོམ་སྐོར་མཁན་མང་བོས་རང་བཟོས་མཚོན་ཆ་བཀོལ་ནས་ཧུའུ་ལེ་ཡཱ་ཁཱ་གྲོང་ཁྱེར་གྱི་གནམ་གྲུ་ཐང་བཙན་བཟུང་བྱེད་རྩིས་བྱས་པ་དང་། ཉེན་རྟོག་པའི་བར་འཁྲུག་རྩོད་བྱུང་བ་རེད་ཟེར།
ཕེ་རུའི་ཨན་ཏིས་སི་འཕྲིན་གཏོང་ཁང་གིས་བསྒྲགས་པ་ལྟར་ན། འཁྲུག་རྩོད་དེ་ལས་ཉུང་མཐར་ཡང་མི་བཅུ་གཉིས་རྐྱེན་ལམ་དུ་ཤོར་བ་དང་། མི་སོ་བརྒྱད་ལ་རྨས་ཕོག་ཡོད་ཟེར།
ཕེ་རུའི་རྒྱལ་ཚོགས་ཀྱིས་ན་ནིང་ཟླ་བཅུ་གཉིས་པའི་ཚེས་བདུན་ཉིན་རྩ་ཁྲིམས་དང་འགལ་ནས་རྒྱལ་ཚོགས་གཏོར་བ་དང་གཞུང་གི་དབང་ཤུགས་འཕྲོག་ལེན་བྱས་པ་རྒྱུ་མཚན་དུ་བྱས་ནས་སྐབས་དེའི་ཙུང་ཐུང་ཁཱ་སི་ཏིས་ལོས་ཀྱི་ཉེས་པ་ཐེར་འདོན་བྱས་ནས་དབང་ཆ་བླངས། དེའི་རྗེས་སུ་ཉེན་རྟོག་ཕྱོགས་ཀྱིས་ཁཱ་སི་ཏིས་ལོས་བཀག་འཇུག་བྱས་པ་རེད། སྐབས་དེའི་ཙུང་ཐུང་གཞོན་པ་པའོ་ལུའུ་ཨ་ཐི་ཡིས་ཉིན་དེར་དམ་བཅའ་བཞག་སྟེ་ཙུང་ཐུང་གི་ལས་འགན་ཁུར་དུ་བླངས། ཁཱ་སི་ཏིས་ལོས་ཀྱི་རྒྱབ་སྐྱོར་མཁན་གྱིས་དེའི་རྗེས་སུ་རྒྱལ་ཡོངས་ཀྱི་ས་ཁུལ་མང་བོར་ངོ་རྒོལ་བྱེད་པའི་ཁྲོམ་སྐོར་བྱ་འགུལ་སྤེལ་ནས། ཁཱ་སི་ཏིས་ལོས་གཏོང་དགོས་པ་དང་པའོ་ལུའུ་ཨ་ཐི་ཡིས་ལས་འགན་བསྐྱུར་དགོས་པ། གང་མགྱོགས་ཀྱིས་ཙུང་ཐུང་དང་རྒྱལ་ཚོགས་ཀྱི་འདེམ་བསྐོའི་བྱ་འགུལ་སྤེལ་དགོས་པའི་རེ་བ་བཏོན། རྔམ་སྟོན་ཁྲོམ་སྐོར་མཁན་དང་ཉེན་རྟོག་པའི་བར་འཁྲུག་རྩོད་བྱུང་ནས་མི་སྣར་ཤི་རྨས་བཟོས་ཡོད།
ན་ནིང་ཟླ་བཅུ་གཉིས་པའི་ཚེས་བཅུ་བཞི་ཉིན། སྐབས་དེའི་ཕེ་རུའི་རྒྱལ་སྲུང་བློན་ཆེན་གྱི་འགན་ཁུར་བའི་ཨོ་ཐཱ་ལོ་ལཱ་ཡིས་རྒྱལ་ཡོངས་སུ་ཉིན་སུམ་ཅུའི་རིང་ལ་དོགས་ཟོན་མཐོར་འདེགས་བྱས་ཏེ། རྒྱལ་ཡོངས་ཀྱི་ས་ཁུལ་མང་བོ་ནས་བྱུང་བའི་དྲག་ཤུགས་ངོ་རྒོལ་བྱ་འགུལ་ཐག་གཅོད་བྱེད་རྒྱུ་ཁྱབ་བསྒྲགས་བྱས་པ་རེད།
བསོད་ནམས་ཚེ་རིང་གིས་བསྒྱུར།
