ཡོ་རོབ་གླིང་མནའ་འབྲེལ་གྱི་ཁྲིམས་འཛིན་དང་ནང་སྲིད་པུའུ་ཀྲང་གི་དངོས་གཞི་མིན་པའི་གྲོས་ཚོགས་དེ་ཚེས་ཉེར་དྲུག་ཉིན་སུའེ་ཏེན་གྱི་རྒྱལ་ས་སི་ཏི་ཀི་ཨར་མའོ་ནས་ཚོགས་མགོ་བརྩམས། ཚོགས་ཞུགས་པུའུ་ཀྲང་དག་གིས་ཡོ་རོབ་གླིང་མནའ་འབྲེལ་གྱི་མིག་སྔའི་གནས་སྤོར་སྡོད་དམངས་ཀྱི་གནས་བབ་ཛ་དྲག་ཡིན་པས། ཡོ་རོབ་གླིང་མནའ་འབྲེལ་གྱི་ཕྱི་ཕྱོགས་བར་གྱི་རྒྱལ་མཚམས་དོ་དམ་ཚོད་འཛིན་དང་། ཕྱིར་ལྡོག་ཤུགས་ཚད་ཇེ་ཆེར་བཏང་སྟེ་རྒྱུན་ལྡན་མ་ཡིན་པའི་གནས་སྤོར་སྡོད་དམངས་ལ་སྔོན་འགོག་བྱེད་དགོས་ཟེར།
ཡོ་རོབ་གླིང་མནའ་འབྲེལ་གྱི་རེས་སྐོར་ཀྲུའུ་ཞིའི་རྒྱལ་ཁབ་སུའེ་ཏེན་གྱིས་ཉིན་དེར་སྤེལ་བའི་གྲོས་ཚོགས་གསལ་སྒྲོག་ཅིག་ལས་བཤད་རྒྱུར། ཡོ་རོབ་གླིང་མནའ་འབྲེལ་དུ་སྡོད་དབང་མེད་པའི་རྒྱལ་ཁབ་གཞན་པའི་སྤྱི་དམངས་ཕྱིར་ལྡོག་དཀའ་བ་ནི་ཁོངས་གཏོགས་རྒྱལ་ཁབ་མང་བོའི་མདུན་དུ་ལྷགས་པའི་འགྲན་རྩོད་ཆེན་མོ་ཞིག་རེད་ཟེར། ཚོགས་ཞུགས་པུའུ་ཀྲང་དག་གིས་གཅིག་གྱུར་སྒོས་བལྟས་ན། གནས་སྤོར་སྡོད་དམངས་ཀྱི་གཞིས་སྡོད་རྒྱལ་ཁབ་བར་ཕན་ནུས་ལྡན་པའི་མཉམ་ལས་བྱེད་དགོས་པ་དང་། རྒྱལ་ཁབ་དེ་དག་བར་ཕྱོགས་ཡོངས་ཀྱི་གནས་སྤོར་སྡོད་དམངས་ཀྱི་གྲོགས་པོའི་འབྲེལ་བ་བཙུགས་ནས་ཕན་ནུས་ལྡན་པའི་སྒོ་ནས་ཡང་བསྐྱར་དང་ལེན་བྱེད་པའི་གྲོས་མཐུན་བཀོད་དེ། རྒྱུན་ལྡན་མིན་པའི་གནས་སྤོར་སྡོད་དམངས་སྔོན་འགོག་བྱས་ནས་ཕྱིར་ལྡོག་གི་ཚད་ཇེ་མཐོར་གཏོང་དགོས་པར་འདོད།
གསལ་སྒྲོག་ལས་བཤད་རྒྱུར། ཡོ་རོབ་གླིང་མནའ་འབྲེལ་གྱིས་སྐུལ་མ་གཏོང་བ་དང་ཚད་བཀག་བྱེད་པའི་བྱེད་ཐབས་དུས་མཉམ་དུ་སྤྱོད་དགོས་པ་དང་། ལམ་ཡིག་སྟེར་བའི་སྲིད་ཇུས་དང་འཕེལ་རྒྱས་མཉམ་ལས། ཉོ་ཚོང་དང་ཕྱི་ཕྱོགས་འབྲེལ་བ་སོགས་སྲིད་ཇུས་ཁྱབ་ཁོངས་སོ་སོ་ནས་གནས་སྤོར་སྡོད་དམངས་ཀྱི་གནས་བབ་ལེགས་བཅོས་བྱེད་དགོས་ཟེར། ཡོ་རོབ་གླིང་མནའ་འབྲེལ་གྱི་ཁོངས་གཏོགས་རྒྱལ་ཁབ་དག་གིས་ཕྱིར་ལྡོག་བྱ་བར་མཐུན་སྦྱོར་མི་བྱེད་པའི་གཞིས་སྡོད་རྒྱལ་ཁབ་དག་ལ་ཚད་བཀག་རང་བཞིན་གྱི་ལམ་ཡིག་སྟེར་བའི་བྱེད་ཐབས་སྤྱོད་པར་རྒྱབ་སྐྱོར་བྱེད་དགོས་ཟེར།
ཚོགས་ཞུགས་པུའུ་ཀྲང་དག་གིས་ཉིན་དེར་ད་རུང་གྲངས་ལྡན་དུས་རབས་ཀྱི་རྩ་འཛུགས་ཡོད་པའི་ནག་ཉེས་ལ་ཆམ་ཕབ་གཏོང་བ་སོགས་གྲོས་གཞིར་གྲོས་བསྡུར་བྱས། ཐེངས་འདིའི་གྲོས་ཚོགས་ཀྱི་ཚོགས་ཡུན་ཉིན་གཉིས་ཡིན་པ་དང་། ཚེས་ཉེར་བདུན་ཉིན་གྲོལ་རྒྱུ་རེད།
བསོད་ནམས་ཚེ་རིང་གིས་བསྒྱུར།
