ཀྲུང་གོའི་ཕྱི་འབྲེལ་པུའུ་ཡི་མགྲིན་ཚབ་པས་ཚེས་ཉེར་དགུ་ཉིན་ཉེ་ལམ་ཕ་ལེ་སི་ཐན་དང་དབྱི་སི་རལ་གྱི་འགལ་བ་ཚབས་ཇེ་ཆེར་སོང་བའི་ཐད་ནས་གསར་འགོད་པའི་དྲི་བར་ལན་བཏབ། གསར་འགོད་པས་ཉེ་ལམ་ཕ་ལེ་སི་ཐན་དང་དབྱི་སི་རལ་གྱི་འགལ་བ་ཚབས་ཇེ་ཆེར་སོང་ནས་དྲག་ཤུགས་དོན་རྐྱེན་མཚམས་ཆད་བཞིན་མེད། ཟླ་དང་པོའི་ཚེས་ཉེར་དྲུག་ཉིན་དབྱི་སི་རལ་གྱི་དམག་དཔུང་གིས་ཅོར་ཏན་གཙང་བོའི་ནུབ་འགྲམ་གྱི་གྲོང་ཁྱེར་ཅེ་ཉིང་ནས་འཛིན་བཟུང་འགུལ་སྐྱོད་སྤེལ་སྐབས་ཕ་ལེ་སི་ཐན་པའི་བར་དུ་འཁྲུག་རྩོད་དྲག་པོ་བྱུང་སྟེ། ཕ་ལེ་སི་ཐན་པ་བཅུ་ལྷག་བསད་པ་དང་། ཚེས་ཉེར་བདུན་ཉིན། ཡེ་ལུའུ་ས་ལུན་ཤར་མའི་ཆོས་ལུགས་ཀྱི་ཆོ་ག་སྤེལ་ཡུལ་ཞིག་ཏུ་འཇིགས་སྐུལ་འཇབ་རྒོལ་དོན་རྐྱེན་བྱུང་ནས། མི་སེར་ཤི་རྨས་བཟོས་ཡོད། ཀྲུང་གོར་དེའི་ཐད་ནས་དཔྱད་བརྗོད་ཅི་ཞིག་སྤེལ་རྒྱུ་ཡོད་ཅེས་དྲིས་པ་ན། མགྲིན་ཚབ་པས་བཤད་རྒྱུར། ཀྲུང་གོས་ཉེ་ལམ་ཕ་ལེ་སི་ཐན་དང་དབྱི་སི་རལ་གྱི་འགལ་བ་ཚབས་ཇེ་ཆེར་སོང་བར་དོ་སྣང་ཆེན་པོ་བྱེད་བཞིན་ཡོད་པ་དང་། ཕ་ལེ་སི་ཐན་དང་དབྱི་སི་རལ་གྱི་འགལ་བ་ལས་མི་སེར་ཤི་རྨས་བཟོས་པར་སེམས་སྡུག་ཆེན་པོ་བྱེད་བཞིན་ཡོད་ལ། མེ་སེར་ལ་དམིགས་པའི་འཇབ་རྒོལ་དོན་རྐྱེན་ཡོད་ཚད་ལ་རྒོལ་གཏམ་གཏོང་བ་དང་། ཚད་ལས་བརྒལ་ནས་དྲག་ཤུགས་བཀོལ་བར་ངོ་རྒོལ་བྱེད་བཞིན་ཡོད། མིག་སྔར་ཆེས་གལ་ཆེ་བ་ནི་སྟོབས་ཤུགས་ཡོད་རྒུས་ཛ་དྲག་གི་གནས་བབ་ཞི་འཇགས་སུ་གཏོང་རྒྱུ་དེ་ཡིན་པས། འབྲེལ་ཡོད་ཕྱོགས་སོ་སོ་དང་། ལྷག་པར་དུ་དབྱི་སི་རལ་ཕྱོགས་ཀྱིས་རང་ཚོད་བཟུང་ནས་གནས་བབ་ཚབས་ཇེ་ཆེར་སོང་སྟེ་ཚོད་འཛིན་བྱེད་ཐབས་བྲལ་བའི་གནས་སུ་མི་ལྷུང་བར་བྱེད་རྒྱུའི་འབོད་སྐུལ་བཏང་བ་ཡིན་ཟེར། མགྲིན་ཚབ་པས་བཤད་རྒྱུར། ཕ་ལེ་སི་ཐན་དང་དབྱི་སི་རལ་བར་དུ་ཡང་དང་བསྐྱར་དུ་གདོང་གཏུག་བྱུང་བ་དེས་རྩ་བ་ནི་རྒྱལ་ཁབ་གཉིས་ཀྱི་ཐབས་ཇུས་ཞེས་པ་དེ་ད་ལྟའི་བར་དུ་དོན་འཁྱོལ་བྱེད་མ་ཐུབ་པར་ཕ་ལེ་སི་ཐན་མི་དམངས་ཀྱི་རང་བཙན་གྱི་རྒྱལ་ཁབ་འཛུགས་པའི་འོས་མཐུན་གྱི་རེ་འདོད་ཡུན་རིང་བོར་བསྐོང་མ་ཐུབ་པའི་རྐྱེན་ཡིན། རྒྱལ་སྤྱིའི་སྤྱི་ཚོགས་ཀྱིས་དགོས་གཏུགས་ཆེ་བའི་འདུ་ཤེས་ཇེ་དྲག་ཏུ་བཏང་ནས། ཕ་ལེ་སི་ཐན་དང་དབྱི་སི་རལ་གྱིས་ཡང་བསྐྱར་གྲོས་མོལ་བྱེད་པར་མཐུན་རྐྱེན་བསྐྲུན་དགོས། ཀྲུང་གོས་ཕ་ལེ་སི་ཐན་གྱི་གནད་དོན་དེ་ཕྱོགས་ཡོངས་ནས་དྲང་བདེན་ངང་གཏན་དུ་ཐག་གཅོད་ཆེད་མུ་མཐུད་དུ་འབད་བརྩོན་ལྷོད་མེད་བྱེད་རྒྱུ་ཡིན་ཟེར།
