ཚོགས་ཡུན་ཉིན་གཉིས་ཡིན་པའི་རྒྱལ་ཁབ་ཉི་ཤུའི་སྡེ་ཚོགས་ཀྱི་ནོར་སྲིད་བློན་ཆེན་དང་ཀྲུང་དབྱང་དངུལ་ཁང་གི་མགོ་བའི་གྲོས་ཚོགས་དེ་ཚེས་ཉེར་ལྔ་ཉིན་རྒྱ་གར་ལྷོ་ཕྱོགས་ཀྱི་པན་ཅཱ་ལོ་ཨར་གྲོང་ཁྱེར་ནས་གྲོལ། གྲོས་ཚོགས་ནས་རྒྱལ་སྤྱིའི་སྲིད་ཇུས་མཉམ་ལས་ལ་ཤུགས་སྣོན་བྱས་ཏེ། འཛམ་གླིང་ཡོངས་ཀྱི་དཔལ་འབྱོར་དེ་སྟོབས་ཤུགས་ཆེན་པོ་དང་རྒྱུན་མཐུད། དོ་མཉམ། བཟོད་སྒོམ་རང་བཞིན་བཅས་ལྡན་པའི་སྒོ་ནས་འཕར་སྣོན་འབྱུང་བར་སྐུལ་འདེད་གཏོང་དགོས་པའི་འབོད་སྐུལ་བཏང་། 

གྲོས་ཚོགས་ནས་བསྟན་དོན། ཐེངས་སྔོན་མའི་གྲོས་ཚོགས་ཀྱི་ཚུན་ལ། འཛམ་གླིང་ཡོངས་ཀྱི་དཔལ་འབྱོར་མདུན་ལྗོངས་ལ་ལེགས་བཅོས་ཅུང་ཙམ་ཐོབ་ཡོད་ཀྱང་། འཕར་ཚད་སྔར་བཞིན་དལ་བ་དང་། དཔལ་འབྱོར་ཉམས་རྒུད་ཀྱི་ཉེན་ཁ་སྔར་བཞིན་གནས་ཡོད། དངུལ་ལོར་ཚད་བརྒལ་འགྲེམ་པའི་ཆུ་ཚད་མཐོར་འདེགས་བྱུང་བ་དང་། རིམས་ནད་ཡང་བསྐྱར་འབྱུང་། དངུལ་ལོར་ཆ་རྐྱེན་ཇེ་དམ་དུ་སོང་བ་སོགས་ཉེན་ཁ་ལས་གསར་དར་ཚོང་ར་དང་འཕེལ་རྒྱས་སུ་འགྲོ་བཞིན་པའི་དཔལ་འབྱོར་ཚོགས་པའི་དངུལ་བུན་གྱི་ཉམས་ཞན་རང་བཞིན་ཇེ་དྲག་ཏུ་སོང་ཡོད་ཟེར། 

གྲོས་ཚོགས་ནས་བསྟན་དོན། རྒྱལ་ཁབ་ཉི་ཤུའི་སྡེ་ཚོགས་ཀྱིས་སེམས་ཞིབ་མོས་དངུལ་ལོར་དང་ནོར་སྲིད། གྲུབ་ཚུལ་རང་བཞིན་བཅས་ཀྱི་སྲིད་ཇུས་གཏན་འབེབས་བྱས་ཏེ། འཕར་སྣོན་ལ་སྐུལ་འདེད་གཏོང་བ་དང་། འཛམ་གླིང་ཡོངས་ཀྱི་ཆེ་མཐོང་དཔལ་འབྱོར་དང་དངུལ་ལོར་གཏན་འཇགས་སྲུང་འཛིན་བྱེད་དགོས། དེ་ལས་གཞན་རྒྱལ་ཁབ་ཉི་ཤུའི་སྡེ་ཚོགས་ཀྱིས་མུ་མཐུད་དུ་ཆེ་མཐོང་སྲིད་ཇུས་ཀྱི་མཉམ་ལས་ལ་ཤུགས་སྣོན་བྱས་ནས། མཉམ་འབྲེལ་རྒྱལ་ཚོགས་ཀྱི་ཉིས་སྟོང་སུམ་ཅུ་ལོའི་རྒྱུན་མཐུད་འཕེལ་རྒྱས་ཀྱི་གྲོས་རིམ་ལ་རྒྱབ་སྐྱོར་བྱས་ནས་སྐུལ་འདེད་གཏོང་རྒྱུ་ཡིན་ཟེར། 

ཐེངས་འདིའི་གྲོས་ཚོགས་ལ་རྒྱ་གར་གྱི་ནོར་སྲིད་པུའུ་ཀྲང་ཞི་ཐཱ་ལཱ་མན་དང་རྒྱ་གར་གསོག་ཉར་དངུལ་ཁང་གི་མགོ་བ་ཏཱ་སི་གཉིས་ཀྱིས་མཉམ་དུ་མགོ་འཛིན་བྱས། དེ་ནི་རྒྱ་གར་གྱིས་རྒྱལ་ཁབ་ཉི་ཤུའི་སྡེ་ཚོགས་ཀྱི་རེས་སྐོར་ཀྲུའུ་ཞིའི་རྒྱལ་ཁབ་ཀྱི་འགན་ཁུར་བའི་རྗེས་སུ་སྤེལ་བའི་པུའུ་ཀྲང་རིམ་པའི་གྲོས་ཚོགས་ཐོག་མ་རེད། 

བསོད་ནམས་ཚེ་རིང་གིས་བསྒྱུར།