ཙན་པུ་ཡཱའི་རྒྱལ་སྲུང་པུའུ་ཡིས་ཚེས་བཞི་ཉིན་སྐམ་དམག་གི་དམག་སྤྱི་ཁང་ནས་ཀྲུང་གོས་ཙན་པུ་ཡཱ་ལ་རོགས་སྐྱོར་བྱེད་པའི་སྐོར་ཐེངས་ཉེར་ལྔ་བའི་དམག་དོན་སྨན་བཅོས་ཆེད་མཁས་ཚན་ཆུང་ལ་གཟེངས་རྟགས་སྟེར་བའི་མཛད་སྒོ་གཟབ་རྒྱས་ངང་སྤེལ་ཏེ། མི་བཅུ་གཅིག་ལ་རྒྱལ་སྤྱིའི་མཛའ་མཐུན་མཉམ་ལས་ཀྱི་གཟེངས་རྟགས་བྱིན་པ་རེད།
ཙན་པུ་ཡཱའི་རྒྱལ་སྲུང་པུའུ་ཡི་རྒྱུན་ལས་དྲུང་ཡིག་ཆི་ཕཱ་ཁུའུ་ཕཱ་ཁུའུ་ཡིས་ཙུང་ཐུང་ཞི་ཆི་ལའེ་མཱ་དང་རྒྱལ་སྲུང་བློན་ཆེན་ལུའུ་ཧྥུའུ་མཱ་གཉིས་ཀྱིས་ཀྲུང་གོའི་དམག་དོན་སྨན་བཅོས་རྩ་འཛུགས་ཀྱི་ཁོངས་མི་ཚང་མར་སྙིང་ཉེ་བའི་འཚམས་འདྲི་བྱེད་པ་བརྒྱུད་སྒྲོག་བྱས་པ་དང་། ཙན་པུ་ཡཱ་དང་ཀྲུང་གོའི་བར་ཡུན་རིང་བའི་མཛའ་བརྩེ་ལྡན་པ་དང་མཛའ་འབྲེལ་དེ་རྟག་དུ་བརྟན་པའི་ཚུལ་བསྟན། ཙན་པུ་ཡཱ་ཕྱོགས་ཀྱིས་ཀྲུང་གོའི་དམག་དཔུང་གིས་དུས་ཡུན་རིང་བོར་ཙན་པུ་ཡཱ་རུ་ཆུ་ཚད་མཐོ་བའི་སྨན་བཅོས་ཆེད་མཁས་ཚན་ཆུང་མངག་པར་སྙིང་ཐག་པ་ནས་བཀའ་དྲིན་ཞུས་པ་དང་། ཀྲུང་གོ་དང་མཉམ་དུ་སྨན་བཅོས་དང་བཅས་པའི་ཁྱབ་ཁོངས་སོ་སོའི་དམག་དོན་མཉམ་ལས་ལ་ཤུགས་སྣོན་བྱེད་འདོད་ཡོད་པའི་ཚུལ་བསྟན།
ཙན་པུ་ཡཱའི་དམག་གསུམ་སྤྱིའི་སྨན་ཁང་གི་མགོ་བ་ཁཱ་ཕཱ་ཐཱ་མའོ་ཡའོ་ཡིས་ཀྲུང་གོའི་དམག་དོན་སྨན་བཅོས་རྩ་འཛུགས་ཀྱི་ཆེད་ལས་བྱང་ཚད་ལ་གདེང་འཇོག་ཆེན་པོ་བྱས་པ་དང་། ཀྲུང་གོའི་དམག་དོན་སྨན་བཅོས་མི་སྣའི་བླ་མེད་ཀུན་སྤྱོད་དང་རྩེར་སོན་ལག་རྩལ། བྱ་བའི་བརྩོན་སེམས། དོན་དངོས་འགུལ་སྐྱོད་བཅས་ལ་ཙན་པུ་ཡཱའི་དམག་དཔུང་དང་རྒྱ་ཆེའི་ནད་པའི་གཟེངས་བསྟོད་ཆེན་པོ་ཐོབ་ཡོད་ཟེར།
ཙན་པུ་ཡཱ་རུ་སྡོད་པའི་ཀྲུང་གོའི་གཞུང་ཚབ་ཁང་གི་དྲག་དཔོན་ཅང་ལོས་ཀྱིས་བསྟན་དོན། ཀྲུང་གོའི་དམག་དོན་སྨན་བཅོས་མི་སྣས་མུ་མཐུད་དུ་དཀའ་ཁག་ལ་མི་འཛེམ་པ་དང་གཏོང་ཕོད་ཆེ་བ། སྲོག་སྐྱོང་ཉེན་སྐྱོབ། བརྩེ་བ་ཆེན་པོར་མཐའ་མེད་པའི་སྙིང་སྟོབས་བཅས་དར་སྤེལ་བྱས་ཤིང་། བྱམས་བརྩེ་དང་ལག་རྩལ་ལ་བརྟེན་ནས་ས་དེའི་མི་དམངས་ལ་བདེ་སྐྱིད་བསྐྲུན་ནས། དམག་དཔུང་བར་གྱི་དངོས་གཉེར་མཉམ་ལས་ལ་སྐུལ་འདེད་གཏོང་བ་དང་རྒྱལ་ཁབ་གཉིས་ཀྱི་མི་དམངས་བར་གྱི་མཛའ་བརྩེ་ཇེ་དྲག་ཏུ་གཏོང་བའི་ཐད་བྱས་རྗེས་སྔར་ལས་ཆེན་པོ་འཇོག་རྒྱུའི་ཚུལ་བསྟན།
གཅིག་སྟོང་དགུ་བརྒྱ་གྱ་བཞི་ལོའི་ཚུན་ལ། ཀྲུང་གོའི་དམག་དཔུང་གིས་བསྟུད་མར་ཙན་པུ་ཡཱ་རུ་དམག་དོན་སྨན་བཅོས་ཆེད་མཁས་ཚན་ཆུང་སྐོར་ཐེངས་ཉེར་ལྔ་མངག་པ་དང་། བསྡོམས་པས་མི་སུམ་བརྒྱ་ཙམ་ཡོད།
བསོད་ནམས་ཚེ་རིང་གིས་བསྒྱུར།
