ཕཱ་ལེ་སི་ཐན་གྱི་འཕྲོད་བསྟེན་པུའུ་ཡིས་ཚེས་བཅུ་དྲུག་ཉིན་གསལ་སྒྲོག་སྤེལ་ཏེ། དབྱི་སི་རལ་གྱི་དམག་དཔུང་གིས་ཉིན་དེར་ཅོར་ཏན་གཙང་བོའི་ནུབ་འགྲམ་བྱང་ངོས་ཀྱི་ཅེ་ཉིང་གྲོང་ཁྱེར་ནས་ཕཱ་ལེ་སི་ཐན་གྱི་མི་བཞི་བསད་ཟེར།

གནས་ཚུལ་དངོས་སུ་མཐོང་མཁན་གྱིས་བཤད་རྒྱུར། དབྱི་སི་རལ་གྱི་དམག་དཔུང་ཉིན་དེར་ཅེ་ཉིང་དུ་སོང་ནས་འཛིན་བཟུང་འགུལ་སྐྱོད་སྤེལ་སྐབས་ཕཱ་ལེ་སི་ཐན་གྱི་མིའི་བར་འཁྲུག་རྩོད་བྱུང་། ཕཱ་ལེ་སི་ཐན་གྱི་འཕྲོད་བསྟེན་པུའུ་ཡིས་བཤད་རྒྱུར། གཞན་ཡང་མི་ཉི་ཤུ་ལྷག་ལ་ཐེངས་འདིའི་འཁྲུག་རྩོད་ཁྲོད་རྨས་ཕོག་པ་དང་། དེའི་ནང་མི་བཞིའི་རྨས་སྐྱོན་ཅུང་ཚབས་ཆེན་རེད་ཟེར།

གཞན་ཡང་དབྱི་སི་རལ་གསར་འགྱུར་ལས་རིགས་ཀྱིས་བསྒྲགས་པ་ལྟར་ན། རྐྱེན་ལམ་དུ་ཤོར་བ་ནི་ཕཱ་ལེ་སི་ཐན་དབྱི་སི་ལན་འཐབ་མཆོག་རྩ་འཛུགས་ཅེ་ཧཱ་ཏིའི་དྲག་ཆས་མི་སྣ་གཉིས་ཡིན་པ་དང་། དབྱི་སི་རལ་གྱི་དམག་མིར་འགུལ་སྐྱོད་དེའི་ཁྲོད་ཤི་རྨས་བྱུང་མེད་ཟེར།

བསོད་ནམས་ཚེ་རིང་གིས་བསྒྱུར།