ཟླ་བཞི་པའི་ཚེས་ཉེར་དྲུག་ཉིན། རྒྱལ་སྲིད་ཨུ་ཡོན་དང་ཕྱི་འབྲེལ་པུའུ་ཀྲང་གི་འགན་གཅིག་ལྕོགས་སུ་འཁུར་བའི་ཆིན་ཀང་གིས་ཞི་ཨན་ནས་སོ་སོར་ཀྲུང་གོར་ཀྲུང་གོ་དང་ཨེ་ཤ་ཡ་དབུས་རྒྱུད་རྒྱལ་ཁབ་ཀྱི་ཕྱི་འབྲེལ་པུའུ་ཀྲང་གི་གྲོས་མོལ་ཐེངས་བཞི་པར་ཞུགས་པར་ཡོང་བའི་ཧ་སག་སི་ཐན་གྱི་ཙུང་ལི་གཞོན་པ་དང་ཕྱི་འབྲེལ་པུའུ་ཀྲང་ནུའུ་ཨེར་ཐི་ལེ་ཝུའུ་དང་ཅིར་ཅི་སི་སི་ཐན་གྱི་ཕྱི་འབྲེལ་པུའུ་ཀྲང་ཁུའུ་ལུའུ་ཡེ་ཧྥུའུ། ཐ་ཅི་ཁི་སི་ཐན་གྱི་ཕྱི་འབྲེལ་པུའུ་ཀྲང་མུའུ་ཧི་ལིས་ཏིང་། ཝུའུ་ཙི་པེ་ཁི་སི་ཐན་གྱི་ཕྱི་འབྲེལ་པུའུ་ཀྲང་སའེ་དབྱི་ཏའོ་ཧྥུའུ། ཐུའུ་ཁུའུ་མན་སི་ཐན་གྱི་ཕྱི་འབྲེལ་པུའུ་ཀྲང་གཞོན་པ་དང་པོ་ཧྭ་ཅི་ཡེ་ཧྥུའུ་བཅས་དང་གྲོས་མོལ་བྱས།
ཆིན་ཀང་གིས་བཤད་རྒྱུར། ཀྲུའུ་ཞི་ཞི་ཅིན་ཕིང་དང་ཙུང་ཐུང་ཐའོ་ཁ་ཡེ་ཧྥུའུ་གཉིས་ཀྱིས་མི་རབས་ནས་མི་རབས་བར་མཛའ་བརྩེ་བརྟན་པོ་ཡོད་པ་དང་ཕུན་ཚུན་ལ་ཡིད་ཆེས་ཆེན་པོ་བྱེད་པ། བདེ་སྡུག་མཉམ་མྱོང་བྱེད་པའི་ཀྲུང་གོ་དང་ཧྭ་སག་སི་ཐན་གྱི་ལས་སྐལ་གཅིག་མཐུན་ཚོགས་པ་འཛུགས་རྒྱུའི་གྲོས་ཐག་བཅད་པས། ཕྱོགས་གཉིས་ཀྱིས་དེ་རྩ་བའི་མཛུབ་ཁྲིད་དུ་བྱས་ནས། ཀྲུང་གོ་དང་ཧྭ་སག་སི་ཐན་གྱི་ཡུན་རིང་གི་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བས་རྒྱལ་ཁབ་གཉིས་ཀྱི་མི་དམངས་ལ་སྔར་ལས་བདེ་སྐྱིད་བསྐྲུན་པར་སྐུལ་འདེད་གཏོང་དགོས།
ཆིན་ཀང་གིས་བཤད་རྒྱུར། ཀྲུང་གོ་དང་ཅིར་ཅི་སི་སི་ཐན་གཉིས་ཀྱི་འབྲེལ་བའི་ཐད་ནས་མཆོང་བརྒལ་རང་བཞིན་གྱི་འཕེལ་རྒྱས་མངོན་འགྱུར་བྱས་ཏེ། མིང་དོན་མཚུངས་པའི་ཁྱོན་ཡོངས་ཀྱི་འཐབ་ཇུས་གྲོགས་པོ་རུ་གྱུར་ཡོད། ང་ཚོས་རྒྱལ་ཁབ་གཉིས་ཀྱི་སྲིད་གཞུང་བར་གྱི་མཉམ་ལས་ཨུ་ཡོན་ལྷན་ཁང་གི་མཉམ་ལས་འདོན་སྤེལ་བཟང་བོ་བྱེད་པ་དང་། གཉིས་ཕན་མཉམ་ལས་ལ་ཤུགས་སྣོན་དགོས། ཀྲུང་གོས་ཅིར་ཅི་སི་སི་ཐན་ཕྱོགས་ཀྱིས་ད་ལོའི་ཧྲང་ཧེ་མཉམ་ལས་རྩ་འཛུགས་ཀྱི་ཙུང་ལིའི་གྲོས་ཚོགས་བཟང་བོར་བསྡུ་བར་རྒྱབ་སྐྱོར་བྱེད་ཀྱིན་ཡོད་ཟེར།
ཆིན་ཀང་གིས་བཤད་རྒྱུར། ཀྲུང་གོ་དང་ཐ་ཅི་ཁི་སི་ཐན་གཉིས་ནི་གྲོགས་པོ་བཟང་བོ་ཡིན་པ་དང་། ན་ནིང་། ཀྲུའུ་ཞི་ཞི་ཅིན་ཕིང་དང་ཙུང་ཐུང་ལ་ཧི་མིན་གཉིས་ཀྱིས་གྲོས་མོལ་བྱས་པར་མ་ཟད་ཐུན་མོང་གི་ལྟ་བ་རབ་དང་རིམ་པ་བྱུང་། ཕྱོགས་གཉིས་ཀྱིས་ལག་བསྟར་དམ་འཛིན་བྱེད་པ་དང་། ཆབ་སྲིད་ཡིད་རྟོན་ཇེ་བརྟན་དུ་བཏང་ནས། མཉམ་དུ་ཀྲུང་གོ་དང་ཐ་ཅི་ཁི་སི་ཐན་གྱི་འཕེལ་རྒྱས་གཅིག་མཐུན་ཚོགས་པ་དང་བདེ་འཇགས་གཅིག་མཐུན་ཚོགས་པ་འཛུགས་སྐྲུན་བྱེད་པར་སྐུལ་འདེད་གཏོང་དགོས།
ཆིན་ཀང་གིས་བཤད་རྒྱུར། ཀྲུང་གོ་དང་ཝུའུ་ཙི་པེ་ཁི་སི་ཐན་གཉིས་ཀྱི་འབྲེལ་བ་སྔར་མེད་ཀྱི་མཐོ་ཚད་དུ་སླེབས་ཡོད་པས། ང་ཚོས་རྒྱལ་ཁབ་གཉིས་ཀྱི་གཙོ་འཛིན་གྱི་འཐབ་ཇུས་ཐུན་མོང་ལྟ་བ་གཞི་འཛིན་ས་རུ་བྱེད་པ་དང་། ཀྲུང་གོ་དང་ཝུའུ་ཙི་པེ་ཁི་སི་ཐན་གྱི་ལས་སྐལ་གཅིག་མཐུན་ཚོགས་པའི་དམིགས་འབེན་ལ་ཁ་ཕྱོགས་ནས་མུ་མཐུད་མདུན་སྐྱོད་བྱས་ཏེ། ཀྲུང་གོ་དང་ཝུའུ་ཙི་པེ་ཁི་སི་ཐན་གྱི་ཕྱོགས་ཡོངས་ཀྱི་གཉིས་ཕན་མཉམ་ལས་ཐད་ནས་གྲུབ་འབྲས་སྔར་ལས་མང་པོ་ལེན་པར་སྐུལ་འདེད་གཏོང་དགོས།
ཆིན་ཀང་གིས་བཤད་རྒྱུར། ཀྲུའུ་ཞི་ཞི་ཅིན་ཕིང་དང་ཙུང་ཐུང་པེ་ཨེར་ཏི་མུའུ་ཧྭ་མེ་ཏའོ་ཧྥུའུ་གཉིས་ཀྱིས་ད་ལོར་ལོ་འགོར་མཉམ་དུ་ཀྲུང་གོ་དང་ཐུའུ་ཁུའུ་མན་སི་ཐན་གྱི་འབྲེལ་བ་ཁྱོན་ཡོངས་འཐབ་ཇུས་གྲོགས་པོའི་འབྲེལ་བ་རུ་མཐོར་འདེགས་སུ་བཏང་བ་དྲིལ་སྒྲོག་བྱས་པ་དང་། ཕྱོགས་གཉིས་ཀྱི་ཟུར་ངོས་ནས་ལས་སྐལ་གཅིག་མཐུན་ཚོགས་པ་ལག་བསྟར་བྱས་ནས། རྒྱལ་ཁབ་གཉིས་ཀྱི་འབྲེལ་བའི་དུས་སྐབས་གསར་བ་འགོ་བརྩམས། ང་ཚོས་རྒྱལ་ཁབ་གཉིས་ཀྱི་གཙོ་འཛིན་གྱི་འཐབ་ཇུས་མཛུབ་སྟོན་ལྟར། ཀྲུང་གོ་དང་ཐུའུ་ཁུའུ་མན་སི་ཐན་གཉིས་ཀྱི་འབྲེལ་བ་ཆུ་ཚད་གསར་བ་ཞིག་ཏུ་བསྐྱོད་པར་སྐུལ་འདེད་གཏོང་དགོས།
ཆིན་ཀང་གིས་ནན་གྱིས་བསྟན་དོན། ཀྲུང་གོ་ཕྱོགས་ཀྱིས་སྔར་བཞིན་དུ་ཨེ་ཤ་ཡ་དབུས་རྒྱུད་རྒྱལ་ཁབ་ཀྱིས་རྒྱལ་ཁབ་ཀྱི་བདག་དབང་དང་རང་ཚུགས། བདེ་འཇགས། རྒྱལ་ཁོངས་ཆ་ཚང་ལ་སྲུང་སྐྱོབ་བྱེད་པར་རྒྱབ་སྐྱོར་བརྟན་པོ་བྱེད་ཀྱིན་ཡིན་པ་དང་། ཨེ་ཤ་ཡ་དབུས་རྒྱུད་རྒྱལ་ཁབ་ཀྱིས་རང་རྒྱལ་ཁབ་ཀྱི་གནས་ཚུལ་གཞིར་བཟུང་ནས་རང་བདག་སྒོས་འཕེལ་རྒྱས་ཀྱི་ལམ་བུ་འཚོལ་བར་རྒྱབ་སྐྱོར་བརྟན་པོ་བྱེད་པ་དང་། ཕྱི་ཕྱོགས་ཀྱི་སྟོབས་ཤུགས་གང་རུང་གིས་ཨེ་ཤ་ཡ་དབུས་རྒྱུད་རྒྱལ་ཁབ་ཀྱི་ནང་སྲིད་ལ་ཐེ་གཏོགས་བྱེད་པར་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་ལ། ཕྱོགས་གཉིས་ཀྱིས་མཉམ་འབྲེལ་རྒྱལ་ཁབ་དང་ཧྲང་ཧེ་མཉམ་ལས་རྩ་འཛུགས་སོགས་སྒྲོམ་གཞིའི་འོག་གི་བརྗེ་རེས་མཉམ་ལས་ལ་ཤུགས་བསྣན་ནས། རྒྱལ་སྤྱིའི་འབྲེལ་བའི་གཞི་རྩའི་ཚད་གཞི་ལ་སྲུང་སྐྱོབ་བྱེད་པ་དང་། མཉམ་འབྲེལ་རྒྱལ་ཚོགས་སྲོག་ཤིང་ཡིན་པའི་རྒྱལ་སྤྱིའི་མ་ལག་ལ་སྲུང་སྐྱོབ་བྱེད་པ། རྒྱལ་སྤྱིའི་འདྲ་མཉམ་དྲང་གཞག་ལ་སྲུང་སྐྱོབ་བྱེད་དགོས།
རྒྱལ་ཁབ་ལྔའི་ཕྱིའི་འབྲེལ་པུའུ་ཀྲང་གིས་བསྟན་དོན། ཀྲུང་གོའི་བར་གྱི་འབྲེལ་བ་འཕེལ་རྒྱས་སུ་གཏོང་རྒྱུ་ནི་རང་རྒྱལ་ཁབ་ཀྱི་ཕྱི་ཕྱོགས་འབྲེལ་བའི་ཁ་ཕྱོགས་གཙོ་བོ་ཡིན་པ་དང་། རྒྱལ་ཁབ་ལྔས་གཙོ་འཛིན་གྱི་ཐུན་མོང་གི་ལྟ་བ་ལག་བསྟར་བཟང་བོ་བྱེད་པ་དང་། ཕྱོགས་གཉིས་ཀྱི་མཐོ་རིམ་འགྲོ་འོང་ཇེ་ཟབ་ཏུ་་གཏོང་བ། རྒྱུད་གཅིག་ལམ་གཅིག་མཉམ་འཛུགས་བྱེད་པར་སྐུལ་འདེད་གཏོང་བ། མི་གཞུང་བརྗེར་རེས་གཏིང་ཟབ་ཏུ་གཏོང་བ། སྟོབས་ཤུགས་གསུམ་ལ་རྡུང་རྡེག་བྱས་ཏེ། ཨེ་ཤ་ཡ་དབུས་རྒྱུད་དང་ཀྲུང་གོའི་འབྲེལ་བའི་གཞུག་མའི་ལོ་ངོ་སུམ་ཅུ་གསར་སྐྲུན་བྱེད་རྒྱུ་ཡིན། ཀྲུང་གོའི་རྒྱལ་སྤྱིའི་སྟེང་གི་ཤན་ཤུགས་ཧ་ཅང་གལ་ཆེ་བ་དང་། ཀྲུང་གོའི་ལུགས་ཀྱི་དེང་རབས་ཅན་གྱིས་ཨེ་ཤ་ཡ་དབུས་རྒྱུད་དང་འཛམ་གླིང་ལ་གོ་སྐབས་གསར་བ་བསྐྲུན། ང་ཚོས་ཀྲུང་གོས་བཏོན་པའི་འཛམ་གླིང་ཧྲིལ་བོའི་གྲོས་འགོ་དང་འདུ་ཤེས་རབ་དང་རིམ་པར་རྒྱབ་སྐྱོར་བྱེད་པ་དང་། ཀྲུང་གོས་ཐེ་ཝན་དང་ཞིན་ཅང་། བོད་ལྗོངས་སོགས་དང་འབྲེལ་བའི་གནད་དོན་ཐད་ཀྱི་ལངས་ཕྱོགས་ཡང་དག་ལ་རྒྱབ་སྐྱོར་བྱེད་ཀྱིན་ཡོད་ལ། མི་དབང་ཆབ་སྲིད་ཅན་དུ་བསྒྱུར་བར་ངོ་རྒོལ་བྱེད་པ་དང་། རྒྱལ་སྤྱིའི་ཕྱོགས་མང་མཉམ་ལས་ལ་ཤུགས་བསྣན་ནས། ཕན་ཚུན་གྱིས་སྲོག་ཤིང་ཁེ་ཕན་ལ་སྲུང་སྐྱོབ་བྱེད་པ་དང་། ས་ཁུལ་གྱི་ཞི་བདེ་བརྟན་འཇགས་ལ་སྲུང་སྐྱོབ་བྱེད་པར་རྒྱབ་སྐྱོར་བྱེད་ཀྱིན་ཡིན་ཟེར།
རིན་ཆེན་མཚོས་བསྒྱུར།
