ས་དེའི་དུས་ཚོད་ཟླ་ལྔ་པའི་ཚེས་བཅུ་གཉིས་ཉིན། རྒྱལ་སྲིད་ཨུ་ཡོན་གྱི་ཞོར་དུ་ཕྱི་འབྲེལ་པུའུ་ཀྲང་གི་འགན་ཁུར་མཁན་ཆིན་གང་གིས་ཨོ་སི་ལུའུ་ནས་ནོར་ཝེ་རྒྱལ་ཁབ་ཀྱི་ཕྱི་འབྲེལ་བློན་ཆེན་ཝེ་ཐི་ཧྥེ་ཨར་ཐི་དང་མཉམ་དུ་གསར་འགོད་པར་ཐུག་འཕྲད་བྱས།
གསར་འགོད་པས་འགྱུར་ལྡོག་ཆེ་བའི་རྒྱལ་སྤྱིའི་གནས་བབ་འོག་ཀྲུང་གོ་དང་ཡོ་རོབ་གླིང་གི་བརྟན་འཇགས་ཀྱི་འབྲེལ་བ་ཇི་ལྟར་སྲུང་འཛིན་བྱེད་རྒྱུ་ཡིན་ཞེས་དྲི་བ་བཏོན་པ་ན། ཆིན་ཀང་གིས་བཤད་རྒྱུར། ཀྲུང་གོ་དང་ཡོ་རོབ་གླིང་ནི་འཛམ་གླིང་སྟེང་ཤན་ཤུགས་ཆེ་བའི་སྟོབས་ཤུགས་ཆེན་པོ་གཉིས་དང་ཁྲོམ་ར་ཆེན་པོ་གཉིས། ཤེས་རིག་ཆེན་པོ་གཉིས་ཡིན། ཐེངས་འདིའི་འཚམས་འདྲི་བརྒྱུད་དེ། ངས་ཡོ་རོབ་གླིང་ཕྱོགས་ཀྱིས་ཀྲུང་གོའི་བར་གྱི་འབྲེལ་འདྲིས་མཐུན་སྦྱོར་ལ་ཤུགས་སྣོན་པ་དང་གཉིས་ཕན་མཉམ་ལས་ལ་སྐུལ་འདེད་གཏོང་བའི་འདོད་བློ་བཟང་བོ་དངོས་སུ་ཚོར་བྱུང་། ལོ་བརྒྱའི་འགྱུར་ལྡོག་ཚབས་ཆེ་ཞིང་རྙོག་འཛིང་ལྡན་པས། ཀྲུང་གོ་དང་ཡོ་རོབ་གླིང་གི་འབྲེལ་བ་བསྟུད་མར་བརྟན་འཇགས་སྒོས་གོང་འཕེལ་དུ་གཏོང་དགོས་ན། རྒྱུན་འཁྱོངས་གསུམ་དོན་འཁྱོལ་བྱེད་དགོས་ཏེ།
གཅིག་ནི་དཀྱེལ་ཡངས་ཀྱི་འཇིག་རྟེན་ལྟ་བ་རྒྱུན་འཁྱོངས་བྱེད་དགོས། དུས་རབས་ཀྱི་རིམས་ནད་བྱུང་བ་ནས་ཁོར་ཡུག་ཇེ་སྡུག་ཏུ་གྱུར་པ་དང་། དཔལ་འབྱོར་སླར་གསོ་ནས་དཔལ་འབྱོར་མཚལ་ཡིག་གང་ཡིན་རུང་། འཛམ་གླིང་རང་བཞིན་གྱི་གནད་དོན་ཉིན་རེ་བཞིན་འབུར་ཐོན་རྙོག་འཛིང་དུ་གྱུར་པ་དང་། རྒྱལ་ཁབ་སོ་སོའི་མི་དམངས་ཀྱི་ལས་དབང་གཞི་གཅིག་ཏུ་དམ་པོར་འབྲེལ་ཡོད་པས། ལག་གདང་སྦྲེལ་ནས་ཐུན་མོང་གི་འགྲན་སློང་ལ་ཁ་གཏད་འཇལ་དགོས། ཀྲུང་གོ་དང་ཡོ་རོབ་གླིང་ནས་རྒྱལ་ཁབ་སོ་སོའི་མི་དམངས་རང་བདག་གིས་བདམས་པའི་འཕེལ་རྒྱས་བགྲོད་ལམ་ལ་བརྩི་བཀུར་དང་རྒྱབ་སྐྱོར་བྱས་ཏེ། རྒྱལ་སྤྱིའི་སྤྱི་ཚོགས་ཀྱི་ཡོངས་ཁྱབ་ཀྱི་དོ་སྣང་ལ་མཉམ་དུ་ལན་བཟང་བོ་འདེབས་དགོས། དམག་འཁྲུག་རྗེས་ཀྱི་རྒྱལ་སྤྱིའི་སྒྲིག་ལམ་ལ་ངེས་པར་དུ་སྲུང་སྐྱོབ་བྱེད་དགོས་པ་དང་། དོན་དམ་པའི་ཕྱོགས་མང་རིང་ལུགས་ངེས་པར་དུ་རྒྱུན་འཁྱོངས་བྱེད་དགོས།
གཉིས་ནི་ཡར་ཐོན་གྱི་ལོ་རྒྱུས་ལྟ་བ་རྒྱུན་འཁྱོངས་བྱེད་དགོས། རྒྱལ་སྤྱིའི་སྤྱི་ཚོགས་ལ་ཆེས་མཁོ་བ་ནི་ཞི་བདེ་དང་གོང་འཕེལ་ཡིན་ལ། འདྲ་མཉམ་དང་དྲང་གཞག་ཡིན་ཞིང་། མདུན་སྐྱོད་ཡིན་པ་ལས་རྗེས་ལུས་མིན། འཇམ་འཐབ་ནི་མིའི་རིགས་ཀྱི་སྐྱོ་གར་ཡིན་ལ། འཇམ་འཐབ་གསར་པས་ཆག་སྒོ་སྔར་ལས་ཆེན་པོ་འབྱུང་བར་བྱས་ཏེ། ཀྲུང་གོ་དང་ཡོ་རོབ་མི་དམངས་དང་འཛམ་གླིང་མི་དམངས་ཀྱི་ཁེ་ཕན་ལ་གནོད་པ་ཚབས་ཆེན་བསྐྱལ་ངེས་ཤིང་། ཕྱོགས་མང་རིང་ལུགས་དང་འཛམ་གླིང་གི་བཅོས་སྐྱོང་ལ་བརྡབ་གསིག་ཆེན་པོ་ཐེབས་ངེས། ཀྲུང་གོ་དང་ཡོ་རོབ་གླིང་གིས་འཇམ་འཐབ་གསར་པར་མཉམ་དུ་ངོ་རྒོལ་བྱས་ཏེ། རྒྱལ་ཁབ་ཆེན་པོའི་མཐུན་སྦྱོར་དང་མཉམ་འགུལ་བཟང་བོར་སྣེ་ཁྲིད་དང་ཡར་སྐུལ་བྱས་ནས། སྟོབས་ཤུགས་དང་ཐོན་ཁུངས་དེ་ཐུན་མོང་གི་གོང་འཕེལ་དང་དར་རྒྱས་ལ་ཡར་སྐུལ་བྱེད་པའི་ཐད་བཀོལ་དགོས།
གསུམ་ནི་གཉིས་ཕན་མཉམ་རྒྱལ་གྱི་མཉམ་ལས་ལྟ་བ་རྒྱུན་འཁྱོངས་བྱེད་དགོས། ཀྲུང་གོ་ནི་ཡོ་རོབ་གླིང་གིས་ཉེན་ཁ་དང་འགྲན་སློང་ལ་ཁ་གཏད་འཇལ་བའི་ཟླ་གྲོགས་ཡིན་ལ། ཀྲུང་གོས་ཡོ་རོབ་གླིང་དང་འཛམ་གླིང་ལ་ཕྱིར་གཏོང་བྱེད་པར་ཉེན་ཚབ་བྱེད་པ་དང་ཉེན་ཁ་མེད། ཀྲུང་གོ་དང་ནོར་ཝེ། ཀྲུང་གོ་དང་ཡོ་རོབ་གླིང་གིས་དཔལ་འབྱོར་འཛམ་གླིང་ཅན་གྱི་ཁ་ཕྱོགས་ཡང་དག་མཉམ་དུ་རྒྱུན་འཁྱོངས་བྱས་ཏེ། ཆེ་ཕྱོགས་དཔལ་འབྱོར་སྲིད་ཇུས་ཀྱི་མཐུན་སྦྱོར་ལ་ཤུགས་སྣོན་པ་དང་། མཉམ་ལས་ཀྱི་སྦས་ཤུགས་ཟབ་མོར་སྔོག་པ། ཕ་རོལ་བའི་དོ་སྣང་བྱེད་པའི་དོན་དག་གལ་ཆེན་འོས་འཚམ་གྱིས་ཐག་གཅོད་པ་བཅས་བྱས་ཏེ། འཛམ་གླིང་ཧྲིལ་བོའི་ཐོན་ལས་ཕྲེང་འབྲེལ་དང་འདོན་སྤྲོད་ཕྲེང་འབྲེལ་བརྟན་འཇགས་གེགས་མེད་ཡོང་བར་མཉམ་དུ་སྲུང་སྐྱོབ་བྱེད་དགོས་ཟེར།
