ཕྱི་འབྲེལ་པུའུ་ཡི་མགྲིན་ཚབ་པས་ཚེས་ཉི་ཤུ་ཉིན་རྒྱལ་ཁབ་བདུན་གྱི་སྡེ་ཚོགས་ཀྱི་ཀོང་ཏའོ་རྩེ་ཚོགས་ཀྱིས་ཀྲུང་གོ་དང་འབྲེལ་བའི་གྲོས་གཞི་འུད་སྒྲོག་བྱས་པའི་ཐད་ནས་གསར་འགོད་པའི་དྲི་བར་ལན་བཏབ།
གསར་འགོད་པ་ལ་ལས་བསྒྲགས་པའི་གནས་ཚུལ་ལྟར་ན། རྒྱལ་ཁབ་བདུན་གྱི་སྡེ་ཚོགས་ཀྱི་ཀོང་ཏའོ་རྩེ་ཚོགས་ཀྱིས་མཉམ་འབྲེལ་གསལ་བསྒྲགས་སོགས་ཡིག་ཆ་སྤེལ་ནས། ཀྲུང་གོ་དང་འབྲེལ་བའི་གྲོས་གཞི་འུད་སྒྲོག་བྱས་ལ། ཐའེ་ཝན་མཚོ་འགག་གི་གནས་བབ་ཧམ་བཤད་བྱས་པར་མ་ཟད། ཤར་མཚོ་དང་ལྷོ་མཚོ། ཞང་ཀང་། ཞིན་ཅང་། བོད་ལྗོངས་སོགས་དང་འབྲེལ་བའི་གནད་དོན་དང་ཀྲུང་གོའི་ཉིང་རྡུལ་སྟོབས་ཤུགས་ཐད་ལ་བཤད་ལུང་བཤད་མང་བོ་བྱས་ཏེ། ཕྱོགས་གཅིག་གིས་ད་ལྟའི་གནས་བབ་བསྒྱུར་བར་ངོ་རྒོལ་བྱེད་པ་ཡིན་ཞེས་བཤད་པ་དང་། དཔལ་འབྱོར་བཙན་ཤེད་ཅེས་པར་ཁ་གཡར་ནས་ཀྲུང་གོའི་ཕྱོགས་ལ་རྒྱགས་གཏམ་བཤད་སོང་། ཀྲུང་གོས་དེར་ལྟ་སྟངས་ཅི་འདྲ་བཟུང་ཡོད་ཅེས་དྲིས།
མགྲིན་ཚབ་པས་དེར་ལན་འདེབས་རྒྱུར། རྒྱལ་ཁབ་བདུན་གྱི་སྡེ་ཚོགས་ཀྱིས་ཁ་ནས་ཞི་བདེ་དང་བརྟན་འཇགས། དར་རྒྱས་བཅས་ཀྱི་འཛམ་གླིང་གི་ཕྱོགས་སུ་བསྐྱོད་པ་ཞེས་འུར་གྱིས་བསྒྲགས་མོད། ཡིན་ནའང་དེ་དག་གིས་བསྒྲུབས་པ་ནི་རྒྱལ་སྤྱིའི་ཞི་བདེ་ལ་བཀག་འགོག་བྱེད་པ་དང་། ས་ཁུལ་གྱི་བརྟན་འཇགས་ལ་གནོད་སྐྱེལ་བ། རྒྱལ་ཁབ་གཞན་དག་གི་འཕེལ་རྒྱས་ལ་ཚོད་འཛིན་བྱེད་པ་བཅས་ཀྱི་དོན་དག་རེད། བྱ་སྤྱོད་དེའི་རིགས་ལ་རྒྱལ་སྤྱིའི་ཡིད་རྟོན་ཟེར་བ་གླེང་རིན་གཏན་ནས་མེད། རྒྱལ་ཁབ་བདུན་གྱི་སྡེ་ཚོགས་ཀྱིས་ཀྲུང་གོས་དོ་སྣང་ཆེན་པོ་བྱེད་པར་མ་འཛེམས་པར། བསམ་བཞིན་དུ་ཀྲུང་གོ་དང་འབྲེལ་བའི་གྲོས་གཞི་ངན་གླེང་བྱས་པ་དང་། ཀྲུང་གོར་སྐྱོན་མེད་སྐྱོན་འཛུགས་དང་རྒོལ་གཏམ་བཏང་ལ། ཀྲུང་གོའི་ནང་སྲིད་ལ་བཙན་ཤེད་ཀྱིས་ཐེ་གཏོགས་བྱས་ཡོད། ཀྲུང་གོས་དེར་ཧ་ཅང་མི་དགའ་བའི་ཚུལ་བསྟན་པ་དང་མཐའ་གཅིག་ཏུ་ངོ་རྒོལ་བྱས་པ་ཡིན་ལ། རྩེ་ཚོགས་གཙོ་སྒྲུབ་བྱས་པའི་འཇར་པན་ཕྱོགས་ལ་འབྲེལ་ཡོད་དོན་དག་སྐོར་ནས་ཚ་འདྲི་ནན་མོ་བྱས་ཡོད་ཟེར།
མགྲིན་ཚབ་པས་བཤད་རྒྱུར། ཐའེ་ཝན་ནི་ཀྲུང་གོའི་ཐའེ་ཝན་ཡིན་པ་དང་། ཐའེ་ཝན་གྱི་གནད་དོན་ཐག་གཅོད་པ་ནི་ཀྲུང་གོ་བ་རང་གི་དོན་དག་ཡིན་པས། ཀྲུང་གོ་བས་ཐག་གཅོད་དགོས། ཀྲུང་གོ་གཅིག་གི་རྩ་དོན་ནི་ཐའེ་ཝན་མཚོ་འགག་གི་ཞི་བདེ་དང་བརྟན་འཇགས་ལ་སྲུང་སྐྱོབ་བྱེད་པའི་གཞི་རྟེན་ཡིན། རྒྱལ་ཁབ་བདུན་གྱི་སྡེ་ཚོགས་ཀྱིས་ཐའེ་ཝན་མཚོ་འགག་གི་ཞི་བདེ་ལ་སྲུང་སྐྱོབ་བྱེད་དགོས་ཞེས་སྟོང་བཤད་རྒྱག་པ་ལས། ཐའེ་ཝན་རང་བཙན་ལ་ངོ་རྒོལ་བྱེད་པའི་སྐོར་གཏན་ནས་མི་གླེང་བ་དེ་ནི། དོན་དངོས་སུ་ཐའེ་ཝན་རང་བཙན་སྟོབས་ཤུགས་ངན་ཤོར་དུ་བཏང་བ་ཡིན་ལ་དེར་རྒྱབ་སྐྱོར་བྱས་པ་ཡིན། དེའི་མཇུག་འབྲས་ཀྱིས་ཐའེ་ཝན་མཚོ་འགག་གི་ཞི་བདེ་དང་བརྟན་འཇགས་ལ་བརྡབ་གསིག་ཚབས་ཆེན་ཐེབས་ངེས། མི་སུ་ཡིས་ཀྱང་ཀྲུང་གོ་མི་དམངས་ཀྱིས་རྒྱལ་ཁབ་ཀྱི་བདག་དབང་དང་མངའ་ཁོངས་ཆ་ཚང་བར་སྲུང་སྐྱོབ་བྱེད་པའི་ཆོད་སེམས་བརྟན་པོ་དང་། འདོད་བློ་བརྟན་པོ། ནུས་པ་ཆེན་པོ་བཅས་ལ་མཐོང་ཆུང་བྱེད་མི་རུང་ཟེར།
མགྲིན་ཚབ་པས་བཤད་རྒྱུར། ཞང་ཀང་དང་ཞིན་ཅང་། བོད་ལྗོངས་བཅས་ཀྱི་དོན་དག་ནི་ཀྲུང་གོའི་ནང་སྲིད་ཁོ་ནར་གཏོགས་ལ། ཀྲུང་གོས་ཕྱིའི་སྟོབས་ཤུགས་གང་རུང་གིས་འགྲོ་མིའི་ཐོབ་ཐང་ལ་ཁ་ཡར་ནས་དེར་བྱུང་རྒྱལ་དུ་ཐེ་གཏོགས་བྱེད་པར་མཐའ་གཅིག་ཏུ་ངོ་རྒོལ་བྱེད་པ་ཡིན། རྒྱལ་ཁབ་བདུན་གྱི་སྡེ་ཚོགས་ཀྱིས་ཞང་ཀང་དང་ཞིན་ཅང་། བོད་ལྗོངས་བཅས་དང་འབྲེལ་བའི་གནད་དོན་ཐད་ནས་ཀྲུང་གོས་ཉེས་མེད་སྐྱོན་འཛུགས་བྱེད་མཚམས་མྱུར་དུ་བཞག་སྟེ། རང་གི་ལོ་རྒྱུས་དང་འགྲོ་མིའི་ཐོབ་ཐང་གི་བྱས་ཉེས་ལ་ཕྱིར་འདང་ཟབ་མོ་རྒྱག་འོས་ཟེར།
མགྲིན་ཚབ་པས་བཤད་རྒྱུར། ཀྲུང་གོ་ནི་རྒྱལ་སྤྱིའི་རྒྱ་མཚོའི་ཁྲིམས་སྐྱོང་ལ་འགྱུར་བ་མེད་པར་སྲུང་སྐྱོབ་བྱེད་མཁན་དང་འཛུགས་སྐྲུན་པ་ཡིན། དེང་སྐབས་ཤར་མཚོ་དང་ལྷོ་མཚོའི་གནས་བབ་སྤྱིའི་ཆ་ནས་བརྟན་འཇགས་ཡིན་པ་དང་། འབྲེལ་ཡོད་རྒྱལ་ཁབ་ཀྱིས་ས་ཁུལ་གྱི་རྒྱལ་ཁབ་དག་གི་ཞི་བདེ་དང་བརྟན་འཇགས་ལ་སྲུང་སྐྱོབ་བྱེད་པའི་འབད་བརྩོན་ལ་དངོས་སུ་རྒྱལ་ཁབ་བྱས་ཏེ། རྒྱ་མཚོ་དང་འབྲེལ་བའི་གནད་དོན་བེད་སྤྱད་དེ་ས་ཁུལ་གྱི་རྒྱལ་ཁབ་བར་གྱི་འབྲེལ་བར་དཀྲུགས་ཤིང་འཕེན་པ་དང་འགལ་བ་སློང་བའི་མཚམས་འཇོག་དགོས་ཟེར།
མགྲིན་ཚབ་པས་བཤད་རྒྱུར། དཔལ་འབྱོར་བཙན་ཤེད་ཟེར་ན། ཨ་མེ་རི་ཁས་ཕྱོགས་གཅིག་གི་བཀག་སྡོམ་སྤྱད་པ་དང་། གཞན་དག་བར་གྱི་འབྲེལ་མཚམས་བཅད་པ་དེ་ནི་ད་གཟོད་འབྱོར་ཚོང་འབྲེལ་བ་ཆབ་སྲིད་ཅན་དང་མཚོན་ཆ་ཅན་དུ་བསྒྱུར་བའི་བཙན་ཤེད་ངོ་མ་ཡིན། ང་ཚོས་རྒྱལ་ཁབ་བདུན་གྱི་སྡེ་ཚོགས་དཔལ་འབྱོར་བཙན་ཤེད་ཀྱི་ལག་རོགས་དང་ངན་པའི་རྒྱབ་རོགས་མི་བྱེད་རྒྱུའི་འབོད་སྐུལ་བཏང་བ་ཡིན་ཟེར།
མགྲིན་ཚབ་པས་བཤད་རྒྱུར། ཀྲུང་གོས་དུས་ནམ་ཡང་རང་སྲུང་འགོག་རྒོལ་གྱི་ཉིང་རྡུང་འཐབ་ཇུས་ལག་བསྟར་མཐའ་འཁྱོལ་བྱེད་པ་ཡིན་ལ། ཉིང་རྡུལ་མཚོན་ཆ་སྔོན་ལ་མི་བཀོལ་བའི་སྲིད་ཇུས་བརྩི་སྲུང་བྱེད་པ་ཡིན། ཐོག་མཐའ་བར་གསུམ་དུ་ཉིང་རྡུལ་སྟོབས་ཤུགས་དེ་རྒྱལ་ཁབ་བདེ་འཇགས་ཀྱི་དགོས་མཁོའི་ཆེས་དམའ་བའི་ཚད་དུ་སྲུང་འཛིན་བྱས་ཡོད། ཀྲུང་གོ་ནི་ཉིང་རྡུལ་མཚོན་ཆ་ཡོད་པའི་རྒྱལ་ཁབ་ལྔའི་ཁྲོད་དུ་གོང་གི་དམ་བཅའ་བཞག་པའི་རྒྱལ་ཁབ་གཅིག་པུ་ཡིན། ཀྲུང་གོའི་ལངས་ཕྱོགས་ནི་ཁ་གསལ་གཞུང་དྲང་ཡིན་པས། དེར་སྐྱོན་འཛུགས་བྱེད་མི་རུང་ཟེར།
མགྲིན་ཚབ་པས་བཤད་རྒྱུར། ཀྲུང་གོ་ནི་འགན་ཁུར་བའི་རྒྱལ་ཁབ་ཆེན་པོ་ཡིན་པའི་ཆ་ནས། མཉམ་འབྲེལ་རྒྱལ་ཚོགས་སྲོག་ཤིང་ཡིན་པའི་རྒྱལ་སྤྱིའི་མ་ལག་དང་། རྒྱལ་སྤྱིའི་བཅའ་ཁྲིམས་རྨང་གཞིར་བྱས་པའི་རྒྱལ་སྤྱིའི་སྒྲིག་ཁྲིམས། མཉམ་འབྲེལ་རྒྱལ་ཚོགས་ཀྱི་སྒྲིག་ཁྲིམས་དམིགས་བྱ་དང་རྩ་དོན་རྨང་གཞིར་བྱས་པའི་རྒྱལ་སྤྱིའི་འབྲེལ་བའི་གཞི་རྩའི་རྩ་དོན་བཅས་ལ་བློ་བརྟན་འགྱུར་མེད་སྒོས་སྲུང་སྐྱོབ་བྱེད་པ་དང་། རྒྱལ་ཁབ་ཉུང་ཤོས་ཀྱིས་བཟོས་པའི་སྒེར་གྱི་སྒྲིག་ལམ་དེ་དང་ལེན་གཏན་ནས་མི་བྱེད། རྒྱལ་སྤྱིའི་སྤྱི་ཚོགས་ཀྱིས་རྒྱལ་ཁབ་བདུན་གྱི་སྡེ་ཚོགས་ཀྱིས་གཙོ་ཁྲིད་བྱས་པ་དང་། ཁོ་ཚོའི་འདུ་ཤེས་འཛིན་སྟངས་དང་རིན་ཐང་ལྟ་བ་གཞིར་བཟུང་ནས་གཏན་ཁེལ་བྱས་པའི་ནུབ་ཕྱོགས་ཀྱི་སྒྲིག་སྲོལ་དང་ལེན་མི་བྱེད་ལ། ཨ་མེ་རི་ཁ་ཨང་དང་པོ་ཡིན་པ་དང་རྒྱལ་ཁབ་ཉུང་ངུའི་ཁེ་ཕན་ལ་ཞབས་འདེགས་ཞུ་བའི་ཚོགས་ར་ཆུང་ངུའི་སྒྲིག་ལམ་དེ་ལས་ཀྱང་དང་ལེན་མི་བྱེད། རྒྱལ་ཁབ་བདུན་གྱི་སྡེ་ཚོགས་ཀྱིས་རང་སྐྱོན་ལ་ཕྱིར་འདང་བརྒྱབ་ནས་སྐྱོན་ཆ་ཡོ་བསྲང་བྱེད་འོས་ཟེར།
མགྲིན་ཚབ་པས་བཤད་རྒྱུར། ནུབ་ཕྱོགས་ཀྱི་དར་རྒྱས་ཆེ་བའི་རྒྱལ་ཁབ་ཉུང་ངུས་གང་འདོད་ལྟར་རྒྱལ་ཁབ་གཞན་གྱི་ནང་སྲིད་ལ་ཐེ་གཏོགས་བྱེད་པ་དང་འཛམ་གླིང་གི་དོན་དག་ལ་ཁ་ལོ་བསྒྱུར་བའི་དུས་རབས་དེ་ཡོངས་སུ་འདས་ཟིན་པ་ཡིན། ང་ཚོས་རྒྱལ་ཁབ་བདུན་གྱི་སྡེ་ཚོགས་ཀྱི་ཁོངས་གཏོགས་རྒྱལ་ཁབ་དག་གིས་དུས་རབས་ཀྱི་འཕེལ་ཕྱོགས་ལ་བསྟུན་ནས། སེམས་ཤུགས་རང་ལ་གནས་པའི་གནད་དོན་ཐག་གཅོད་པའི་སྟེང་དུ་བཏོན་ཏེ། རང་སྡོམ་གཞན་འབུད་ཀྱི་ཚོགས་ཆ་ཆུང་ངུ་འཛུགས་མཚམས་འཇོག་པ་དང་། རྒྱལ་ཁབ་གཞན་པར་ཚོད་འཛིན་བྱེད་པ་དང་གནོན་ཤུགས་སྟེར་མཚམས་འཇོག་པ། གཞན་དག་གི་བར་དུ་འགལ་བ་སློང་མཚམས་འཇོག་པ་བཅས་བྱས་ནས། ཡང་བསྐྱར་གྲོས་མོལ་དང་མཉམ་ལས་ཀྱི་ཡང་དག་པའི་ལམ་དུ་བསྐྱོད་རྒྱུའི་འབོད་སྐུལ་བཏང་བ་ཡིན་ཟེར།
