མཉམ་འབྲེལ་རྒྱལ་ཚོགས་སུ་རྒྱུན་དུ་སྡོད་པའི་ཀྲུང་གོའི་འཐུས་ཚབ་གཞོན་པ་ཏའེ་པིང་གིས་ཚེས་ཉེར་གཉིས་ཉིན་བདེ་འཇགས་ལས་འཛིན་ལྷན་ཚོགས་སུ་སུའུ་ཏན་གྱི་གནད་དོན་ལ་གྲོས་ཞིབ་བྱེད་སྐབས་བསྟན་དོན། ཀྲུང་གོ་ནི་སུའུ་ཏན་གྱི་གྲོགས་པོ་བཟང་པོ་དང་སྤུན་ཟླ་བཟང་པོ་ཡིན་པའི་ཆ་ནས་འཁྲུག་རྩོད་ཕྱོགས་གཉིས་པོས་རྒྱལ་ཁབ་ཀྱི་ཞི་བདེ་དང་མི་དམངས་ཀྱི་བདེ་སྐྱིད་གཙོ་བོར་བཟུང་སྟེ་གང་མགྱོགས་སྒོས་དམག་འཁྲུག་མཚམས་འཇོག་རྒྱུ་དང་གྲོས་མོལ་བྱས་པར་བརྟེན་ནས་འགལ་བ་སེལ་རྒྱུར་རེ་བ་བྱེད་ཀྱིན་ཡོད་ཟེར།

ཏའེ་པིང་གིས་བསྟན་དོན། སུའུ་ཏན་དུ་དྲག་ཤུགས་འཁྲུག་རྩོད་བྱུང་ནས་ཟླ་བ་གཅིག་ལྷག་ཙམ་སོང་ཡང་། འཐབ་འཁྲུག་སྔར་བཞིན་ཇེ་མང་དུ་ཕྱིན་པ་དང་། འཆི་རྨས་བྱུང་བའི་མི་གྲངས་རྒྱུན་ཆད་མེད་པར་ཇེ་མང་དུ་ཕྱིན་ལ། མི་ཆོས་ཀྱི་གནས་བབ་མུ་མཐུད་དུ་ཇེ་སྡུག་ཏུ་འགྲོ་བཞིན་ཡོད་པས་ཀྲུང་གོ་ཕྱོགས་ཀྱིས་དེའི་ཐད་སེམས་ཁྲལ་ཆེན་པོ་བྱེད་ཀྱིན་ཡོད།  འཁྲུག་རྩོད་ཕྱོགས་གཉིས་པོས་གནས་སྐབས་དམག་འཁྲུག་མཚམས་འཇོག་རྒྱུའི་གྲོས་མཐུན་ཐེངས་མང་བཀོད་པར་མ་ཟད། ཚེས་20ཉིན་སོ་ཏི་ཨ་རབ་ཀྱི་གྲུ་ཁའི་གྲོང་ཁྱེར་ཅི་ཏ་རུ《དུས་ཡུན་ཐུང་ངུའི་ནང་དམག་འཁྲུག་མཚམས་འཇོག་རྒྱུ་དང་མི་ཆོས་བཀོད་སྒྲིག་བྱེད་པའི་གྲོས་མཐུན》ལ་མིང་རྟགས་བཀོད་པ་ཀྲུང་གོ་ཕྱོགས་ཀྱིས་ཤེས་གསལ་བྱུང་ཡོད། ད་ལྟ་ཁ་ཚ་དགོས་གཏུག་ཏུ་གྱུར་བ་ནི་འབྲེལ་ཡོད་ཀྱི་ཁས་ལེན་དོན་ཐོག་ཏུ་འཁྱོལ་བ་དང་། མི་སེར་དང་དམངས་སྤྱོད་སྒྲིག་བཀོད་བདེ་འཇགས་ལ་སྲུང་སྐྱོང་ཏན་ཏིག་བྱས་ཏེ་མི་ཆོས་རོགས་སྐྱོབ་དང་མི་སྣ་ཁ་གྲམ་པར་བདེ་འཇགས་འགན་སྲུང་འདོན་སྤྲོད་དང་ལས་ཀ་སྟབས་བདེ་ཡོང་བར་བྱ་རྒྱུ་དེ་རེད། ཀྲུང་གོ་ཕྱོགས་ཀྱིས་འཁྲུག་རྩོད་ཕྱོགས་གཉིས་པོས་གྲོས་མོལ་བྱས་པར་བརྟེན་ནས་འགལ་བ་སེལ་པའི་གནས་བབ་མུ་མཐུད་དུ་རྒྱུན་འཁྱོངས་བྱས་ནས་སྔར་ལས་རྒྱུན་སྲིང་གི་དམག་འཁྲུག་མཚམས་འཇོག་རྒྱུའི་ཇུས་གཞི་དང་ཆབ་སྲིད་བཀོད་སྒྲིག་ལ་གྲོས་མཐུན་ཡོང་བར་བྱས་ཏེ་སུའུ་ཏན་རྒྱལ་ཁབ་ཀྱི་འཕེལ་རྒྱས་སླར་ཡང་རྒྱུན་གཏན་བགྲོད་ལམ་ཐོག་བསྐྱོད་རྒྱུར་སྐུལ་འདེད་གཏོང་རྒྱུའི་རེ་བ་བྱེད་ཀྱིན་ཡོད་ཟེར།

ཏའེ་པིང་གིས་བཤད་རྒྱུར།  འཁྲུག་རྩོད་བྱུང་བ་ནས་བཟུང་སུའུ་ཏན་དང་མཐའ་འཁོར་ཁྱིམ་མཚེས་རྒྱལ་ཁབ་ཀྱི་ཉམས་ཞན་གྱི་དཔལ་འབྱོར་དང་མི་ཆོས་གནས་བབ་ལ་ཚང་མས་སེམས་ཁྲལ་བྱེད་ཀྱིན་ཡོད། མཉམ་འབྲེལ་རྒྱལ་ཚོགས་ཀྱི་གཞི་གྲངས་ལ་གཞིགས་ན།  འཁྲུག་རྩོད་ལས་མི་འབུམ་བདུན་ལྷག་ཙམ་རྒྱལ་ནང་དུ་ཡུལ་གྱར་དུ་སོང་བ་དང་། མི་འབུམ་གཉིས་ལྷག་ཙམ་ཉེ་འགྲམ་རྒྱལ་ཁབ་ཏུ་བྲོས་བྱོལ་དུ་སོང་ལ། མི་བྱེ་བ་གཉིས་དང་ས་ཡ་ལྔ་ལྷག་ཙམ་ལ་མི་ཆོས་རིང་ལུགས་ཀྱི་རོགས་སྐྱོར་མཁོ་འདུག སུའུ་ཏན་གྱི་ཁྱིམ་མཚེས་རྒྱལ་ཁབ་ཀྱིས་དཀའ་ངལ་ཁྱད་བསད་བྱས་ཏེ་སུའུ་ཏན་གྱི་མི་སེར་འབོར་ཆེན་དང་ལེན་བྱས་པར་ཀྲུང་གོ་ཕྱོགས་ཀྱིས་བསྔགས་བརྗོད་བྱ་རྒྱུ་ཡིན་པ་དང་། རྒྱལ་སྤྱིའི་སྤྱི་ཚོགས་ཀྱིས་སུའུ་ཏན་དང་སུའུ་ཏན་གྱི་ཁྱིམ་མཚེས་རྒྱལ་ཁབ་ལ་རོགས་སྐྱོར་བྱེད་ཤུགས་ཆེ་རུ་བཏང་ནས་འཁྲུག་རྩོད་ཇེ་ཉུང་དུ་བཏང་བ་ལས་ས་ཁུལ་རྒྱལ་ཁབ་ལ་ཤུགས་རྐྱེན་ངན་པ་བཟོ་ཚད་ཇེ་ཉུང་དུ་གཏོང་རྒྱུའི་རེ་འབོད་བྱ་རྒྱུ་ཡིན། ཀྲུང་གོ་ཕྱོགས་ཀྱིས་མཉམ་འབྲེལ་རྒྱལ་ཚོགས་ཀྱིས་སུའུ་ཏན་དང་སུའུ་ཏན་གྱི་ཁྱིམ་མཚེས་རྒྱལ་ཁབ་དང་མི་ཆོས་ཀྱི་གནད་དོན་ཐད་འབྲེལ་གཏུག་དང་མཐུན་སྦྱོར་རྒྱུན་འཁྱོངས་བྱེད་པ་དང་། ས་ཁུལ་དང་རྒྱལ་ཁབ་ཀྱིས་ཁ་གཏད་གཅོག་ནུས་ཆེ་རུ་གཏོང་བར་རོགས་རམ་དང་མི་ཆོས་ཀྱི་གནོན་ཤུགས་ཇེ་ཆུང་དུ་གཏོང་བ་བཅས་ལ་རྒྱབ་སྐྱོར་བྱ་རྒྱུ་ཡིན་ཟེར།

ཤ་བོ་གསེར་མཚོས་བསྒྱུར།