ཨུ་རུ་སིའི་ཙུང་ཐུང་ཕུའུ་ཅིན་གྱིས་ཚེས་དགུ་ཉིན་བསྟན་དོན། ཝུའུ་ཁི་ལན་གྱི་དམག་དཔུང་གི་དཔུང་འཇུག་མགོ་བརྩམས་ཡོད་ཀྱང་། དམིགས་འབེན་གང་ཡང་མངོན་འགྱུར་བྱུང་མེད་ཟེར།

ཨུ་རུ་སིའི་སྨྱན་བྱད་ཀྱིས་ཚེས་བཅུ་ཉིན་བསྒྲགས་པ་ལྟར་ན། ཨུ་རུ་སིའི་དམག་དཔུང་གིས་ཝུའུ་ཁི་ལན་དམག་དཔུང་གི་ཀྲ་པའོ་ལོ་རི་ཕྱོགས་ཀྱི་སྐོར་ཐེངས་གསར་བའི་དཔུང་འཇུག་ལ་རྒོལ་ལན་སྤྲོད་བཞིན་ཡོད་ཟེར། གཞན་ཡང་ཨ་མེ་རི་ཁའི་སྨྱན་བྱད་ཀྱིས་བསྒྲགས་པ་ལྟར་ན། ཝུའུ་ཁི་ལན་གྱི་ཙུང་ཐུང་ཙེ་ལེན་སི་ཅི་ཡིས་ཉེ་སྔོན་བསྟན་དོན། ཝུའུ་ཁི་ལན་གྱི་དམག་དཔུང་གི་འགུལ་སྐྱོད་ལ་གྲུབ་འབྲས་ངེས་ཅན་བླངས་ཡོད་ཀྱང་། ཝུའུ་ཁི་ལན་གྱིས་ཕྱིར་རྒོལ་བྱེད་པར་དཀའ་ཁག་ཧ་ཅང་ཆེ་ཟེར།

ཨུ་རུ་སིའི་སྨྱན་བྱད་ཀྱིས་ཚེས་བཅུ་ཉིན་བསྒྲགས་པ་ལྟར་ན། ཁཱ་ཧའོ་ཧྥུའུ་ཁཱ་ཆུ་གློག་ས་ཚིགས་ཀྱི་ཆུ་རགས་ཆེན་མོ་མ་ཤོར་གོང་། ནོར་ཝེའི་ས་ཡོམ་ལྟ་ཞིབ་ཚད་འཇལ་ལས་ཁུངས་ཀྱིས་ཆུ་གློག་ས་ཚིགས་ཀྱི་ཕྱོགས་ནས་ས་ཡོམ་གྱི་བརྡ་རྟགས་བྱུང་བ་ཟིན་ཐོར་བཀོད་ཡོད། དེ་ལས་ཆུ་གློག་ས་ཚིགས་ནས་འགས་གཏོར་བྱུང་བ་གསལ་བཤད་བྱེད་ཐུབ་ཟེར། ཝུའུ་ཁི་ལན་ཕྱོགས་ཀྱིས་ཚེས་དགུ་ཉིན་ཆུ་རགས་ཆེན་མོར་འགས་གཏོར་བཏང་རྗེས་བྱུང་བའི་ཆུ་ལོག་ལས་མི་ལྔ་རྐྱེན་ལམ་དུ་ཤོར་བ་དང་། མི་བཅུ་ལྷག་གར་སོང་རྙེད་མེད་ལ། ཝུའུ་ཁི་ལན་ཕྱོགས་ཀྱིས་མི་སྟོང་གསུམ་ལྷག་བདེ་འཇགས་ས་ཁུལ་དུ་བསྐྱལ་ཡོད་ཟེར། ཉིན་དེར་ཨུ་རུ་སིའི་ཕྱོགས་ཀྱིས་བསྟན་དོན། ཆུ་རགས་ཆེན་མོར་འགས་གཏོར་བཏང་རྗེས་ཨུ་རུ་སིས་ཚོད་འཛིན་བྱེད་པའི་ས་ཁོངས་ནང་གི་མི་བརྒྱད་རྐྱེན་ལམ་དུ་ཤོར་བ་དང་། ཨུ་རུ་སིའི་ཕྱོགས་ཀྱིས་མི་སྟོང་ལྔ་དང་བརྒྱད་བརྒྱ་བདེ་འཇགས་ས་ཁུལ་དུ་བསྐྱལ་ཡོད་ཟེར། མཉམ་འབྲེལ་རྒྱལ་ཚོགས་ཀྱི་ཡུལ་གྱར་བའི་ལས་དོན་ཁང་གི་མགྲིན་ཚབ་པ་ཧྲ་པུས་ཡཱ་མན་ཐུའུ་ཡིས་ཚེས་དགུ་ཉིན་བསྟན་དོན། མིག་སྔར་ས་དེའི་ཆུ་ཁུངས་དང་གཙང་སྦྲའི་གནད་དོན་ལ་ཀུན་གྱིས་སེམས་ཁུར་བྱེད་བཞིན་ཡོད་ལ། ཆུ་རགས་ཆེན་མོར་གཏོར་བརླག་ཐེབས་པ་ལས་བྱུང་བའི་ཆུ་ལོག་གི་གནོད་འཚེ་ཡིས་ས་དེར་ཤུགས་རྐྱེན་ཆེན་པོ་ཐེབས་ཡོད་ཟེར།

ཨུ་རུ་སིའི་ཕྱི་འབྲེལ་པུའུ་ཡིས་ཚེས་དགུ་ཉིན་གསལ་སྒྲོག་སྤེལ་ཏེ། ཨུ་རུ་སིས་ཡོ་རོབ་གླིང་རྒྱུན་སྲོལ་དྲག་ཆས་སྟོབས་ཤུགས་ཆིངས་ཡིག་རྩིས་མེད་དུ་གཏོང་བའི་བཅའ་ཁྲིམས་ཉིན་དེར་དངོས་སུ་ནུས་ལྡན་དུ་གྱུར་ཡོད་ཅིང་། ཨུ་རུ་སིའི་ཕྱོགས་ཀྱིས་ཆིངས་ཡིག་དེ་བཀོད་པའི་རྒྱལ་ཁབ་ཚང་མར་བརྡ་བཏང་ཡོད་ལ། ཨུ་རུ་སིའི་ཕྱོགས་ཉིན་བརྒྱ་དང་ལྔ་བཅུའི་རྗེས་ཏེ། ད་ལོའི་ཟླ་བཅུ་གཅིག་པའི་ཚེས་བདུན་ཉིན་གྱི་ནམ་གུང་བར་ཆིངས་ཡིག་དེ་ལས་ཕྱིར་འབུད་རྒྱུ་ཡིན་ཟེར།

བསོད་ནམས་ཚེ་རིང་གིས་བསྒྱུར།