དབྱི་ཐཱ་ལེ་འི་ཀྲུང་གོའི་ཚོང་ཚོགས་ཀྱིས་ཉེ་སྔོན་དབྱི་ཐཱ་ལེའི་བྱང་ཕྱོགས་ཀྱི་མུས་ལན་གྲོང་ཁྱེར་ནས་བགྲོ་གླེང་ཚོགས་འདུ་བསྡུས་ཏེ། ཚན་རྩལ་ཁྱབ་ཁོངས་ཀྱི་དབྱི་ཐཱ་ལེ་རུ་ཡོད་པའི་ཀྲུང་གོའི་དངུལ་གཏོང་ཁེ་ལས་དང་དབྱི་ཐཱ་ལེའི་ཁེ་ལས་ལ་བརྗེ་རེས་ཀྱི་སྟེགས་བུ་བསྐྲུན་ནས། མཉམ་དུ་ཀྲུང་གོ་དང་དབྱི་ཐཱ་ལེའི་ཚན་རྩལ་དཔལ་འབྱོར་ཉོ་ཚོང་མཉམ་ལས་ཀྱི་གོ་སྐབས་གསར་བ་འཚོལ་ཞིབ་བྱས།
མུས་ལན་དུ་སྡོད་པའི་ཀྲུང་གོའི་གཞུང་ཚབ་ཁང་དང་དབྱི་ཐཱ་ལེའི་སྲིད་གཞུང་གི་སྡེ་ཁག མུས་ལན་གྲོང་ཁྱེར་སྲིད་གཞུང་། དབྱི་ཐཱ་ལེ་དང་ཀྲུང་གོའི་ལས་འཛིན་ཐེབས་རྩ་ཚོགས་པ། དབྱི་ཐཱ་ལེ་ཕྱོགས་ཀྱི་འཐུས་མི་བརྒྱ་ཙམ་བགྲོ་གླེང་ཚོགས་འདུར་ཞུགས། མུས་ལན་དུ་སྡོད་པའི་ཀྲུང་གོའི་གཞུང་ཚབ་ཁང་གི་མགོ་བ་གཞོན་པ་ཀྲང་ཁའེ་པེན་གྱིས་ཞུ་ཚིག་འབུལ་སྐབས། ཀྲུང་གོག་དང་དབྱི་ཐཱ་ལེ་རྒྱལ་ཁབ་གཉིས་ཀྱིས་མུ་མཐུད་དུ་གཉིས་ཕན་མཉམ་རྒྱལ་གྱི་རྩ་དོན་རྒྱུན་འཁྱོངས་བྱེད་པ་དང་། མཉམ་དུ་ཕྱོགས་གཉིས་ཀྱི་ཚན་རྩལ་མཉམ་ལས་གཏན་འཇགས་ངང་ཡུན་དུ་འཕེལ་རྒྱས་སུ་འགྲོ་བར་སྐུལ་འདེད་གཏོང་བ། ལག་རྡང་སྦྲེལ་ནས་རིམས་ནད་རྗེས་ཀྱི་དཔལ་འབྱོར་སླར་གསོ་དང་མིའི་རིགས་ཀྱི་ཕན་བདེ་ཇེ་ཆེར་གཏོང་བའི་ཐད་ཚན་རྩལ་གྱི་སྟོབས་ཤུགས་འབུལ་དགོས་པའི་འབོད་སྐུལ་བཏང་།
ཚོགས་འདུར་ཞུགས་པའི་སྐུ་མགྲོན་དག་གིས་བསྟན་དོན། ཀྲུང་གོ་དང་དབྱི་ཐཱ་ལེ་རྒྱལ་ཁབ་གཉིས་ཀྱི་ཚན་རྩལ་དཔལ་འབྱོར་ཉོ་ཚོང་མཉམ་ལས་ཀྱི་རྨང་གཞི་བརྟན་ཅིང་། སྦས་ཤུགས་ཆེ་བ་དང་། མདུན་ལྗོངས་རྒྱ་ཆེ་བས། གོ་སྐབས་དེ་དང་བསྟུན་ནས་སྔར་ལས་ལྷག་པའི་སྒོ་ནས་ཕྱོགས་གཉིས་ཀྱི་ཉོ་ཚོང་དངུལ་གཏོང་འབྲེལ་བ་ཇེ་ཟབ་ཏུ་གཏོང་བར་རེ་སྒུག་བྱས་ཡོད་ཟེར།
བསོད་ནམས་ཚེ་རིང་གིས་བསྒྱུར།
