མཉམ་འབྲེལ་རྒྱལ་ཚོགས་ཀྱི་དཔལ་འབྱོར་དང་སྤྱི་ཚོགས་ལས་འཛིན་ལྷན་ཚོགས་ཀྱིས་ཚེས་བཅུ་ཉིན་ཉིག་ཡོ་རུ་ཡོད་པའི་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་ནས་རྒྱུན་མཐུད་འཕེལ་རྒྱས་ཀྱི་མཐོ་རིམ་ཆབ་སྲིད་གླེང་སྟེགས་སྤེལ་ནས། རྒྱུན་མཐུད་འཕེལ་རྒྱས་དམིགས་འབེན་བཅུ་བདུན་ཡང་བསྐྱར་ཐབས་ལམ་ཡང་དག་ཏུ་ཞུགས་པར་བྱེད་པ་དང་ཐག་གཅོད་ཇུས་གཞིར་གྲོས་བསྡུར་བྱས་ཏེ། དམིགས་འབེན་མངོན་འགྱུར་བྱེད་པའི་ཆབ་སྲིད་སྒུལ་ཤུགས་ཡང་བསྐྱར་སྐུལ་སྤེལ་བྱས།
དཔལ་འབྱོར་དང་སྤྱི་ཚོགས་ལས་འཛིན་ལྷན་ཚོགས་ཀྱི་ཀྲུའུ་ཞི་སི་ཐའོ་ཡེ་ཝ་ཡིས་གླེང་སྟེགས་མགོ་རྩོམ་པའི་མཛད་སྒོའི་སྟེང་བསྟན་དོན། སྐབས་འདིའི་གླེང་སྟེགས་ནི་ཉིས་སྟོང་སུམ་ཅུ་ལོའི་གྲོས་རིམ་གྱི་དུས་རིམ་འབྲིང་དུ་སྤེལ་བ་ཡིན་ཞིང་། འཛམ་གླིང་ཡོངས་ཀྱི་དཔལ་འབྱོར་སླར་གསོའི་གོམ་སྟབས་ཇེ་མགྱོགས་སུ་གཏོང་བའི་བྱེད་ཐབས་གནད་སར་བཟུང་སྟེ། ཟླ་དགུ་བར་རྒྱུན་མཐུད་འཕེལ་རྒྱས་དམིགས་འབེན་གྱི་མཐོ་རིམ་གྲོས་ཚོགས་སྤེལ་བར་རྨང་གཞི་གཏོང་རྒྱུ་ཡིན་ཟེར། མོས་ནན་གྱིས་བསྟན་དོན། རྒྱལ་ཁབ་སོ་སོས་སྤྲད་པའི་རང་མོས་རྒྱལ་ཁབ་ཀྱི་དཔྱད་ཞིབ་སྙན་ཞུ་ནི་རྒྱུན་མཐུད་འཕེལ་རྒྱས་དམིགས་འབེན་ལག་བསྟར་དང་དཔྱད་ཞིབ། རྗེས་མཐུད་འགུལ་སྐྱོད་བཅས་ཀྱི་ནང་དོན་གལ་ཆེན་ཞིག་ཡིན་ཟེར།
མཉམ་འབྲེལ་རྒྱལ་ཚོགས་ཀྱི་རྒྱུན་མཐུད་འཕེལ་རྒྱས་ཀྱི་མཐོ་རིམ་ཆབ་སྲིད་གླེང་སྟེགས་དེ་ལོ་རེའི་ཟླ་བདུན་པར་ཉིག་ཡོ་རུ་ཡོད་པའི་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་ནས་སྤེལ་ཏེ། མཉམ་འབྲེལ་རྒྱལ་ཚོགས་ཀྱི་རྒྱུན་མཐུད་འཕེལ་རྒྱས་དམིགས་འབེན་གྱི་ལག་བསྟར་གནས་ཚུལ་ལ་གྲོས་བསྡུར་བྱེད་པ་རེད། སྐབས་འདིའི་གླེང་སྟེགས་ནི་ཚེས་བཅུ་ཉིན་ནས་ཚེས་བཅུ་དགུའི་བར་སྤེལ་རྒྱུ་ཡིན་པ་དང་། བརྗོད་སྙིང་ནི་པྲོག་གསར་གློ་ཚད་རིམས་ནད་ཁྲོད་ནས་མྱུར་མོར་སླར་གསོ་བྱུང་སྟེ་རིམ་པ་སོ་སོ་ནས་ཉིས་སྟོང་སུམ་ཅུ་ལོའི་རྒྱུན་མཐུད་འཕེལ་རྒྱས་གྲོས་རིམ་ཕྱོགས་ཡོངས་ནས་ལག་བསྟར་བྱེད་དགོས་ཞེས་པ་དེ་རེད། གླེང་སྟེགས་ནས་དག་གཙང་འཐུང་ཆུ་དང་གཙང་སྦྲའི་སྒྲིག་ཆས་ཀྱིས་མི་ཚང་མར་ཁུར་དུ་ལེན་ཐུབ་པ་དང་། བློ་གཏད་རུང་ལ་རྒྱུན་མཐུད་ཐུབ་པའི་དེང་རབས་ནུས་ཁུངས་དང་། ཐོན་ལས་དང་གསར་གཏོད། རྨང་གཞིའི་སྒྲིག་ཆས་སོགས་ཐོབ་པར་བྱེད་པ་དང་། རྒྱུན་མཐུད་ཀྱི་གྲོང་ཁྱེར་དང་སྡེ་ཁུལ། དེ་མིན་དམིགས་འབེན་མངོན་འགྱུར་བྱེད་པར་སྐུལ་འདེད་གཏོང་བའི་གྲོགས་པོའི་འབྲེལ་བ་སོགས་རྒྱུན་མཐུད་འཕེལ་རྒྱས་དམིགས་འབེན་ལྔར་གཏིང་ཟབ་ཏུ་གྲོས་བསྡུར་བྱས།
བསོད་ནམས་ཚེ་རིང་གིས་བསྒྱུར།
