ཡོ་རོབ་གླིང་གྲོས་ཁང་གིས་ཚེས་བཅུ་གཉིས་ཉིན་འདེམ་ཤོག་འཕངས་ཏེ་རང་བྱུང་སླར་གསོའི་བཅའ་ཁྲིམས་འཆར་ཟིན་ལ་རྒྱབ་སྐྱོར་བྱེད་པའི་ཚུལ་བསྟན་པ་དང་། ཡོ་རོབ་གླིང་མནའ་འབྲེལ་གྱིས་ཉིས་སྟོང་སུམ་ཅུ་ལོའི་སྔོན་ལ་མ་མཐའ་ཡང་བརྒྱ་ཆའི་ཉི་ཤུའི་སྐམ་ས་དང་མཚོ་ཁོངས་ཀྱི་རྒྱ་ཁྱོན་ཁེབས་པའི་རང་བྱུང་སྐྱེ་ཁམས་མ་ལག་སླར་གསོའི་བྱེད་ཐབས་འདོན་དགོས་པའི་འབོད་སྐུལ་བཏང་།
ཡོ་རོབ་གླིང་གྲོས་ཁང་གིས་ཉིན་དེར་སྤེལ་བའི་སྤྱི་སྒྲོག་ཅིག་ལས་བཤད་རྒྱུར། སྐྱེ་ཁམས་མ་ལག་སླར་གསོ་བྱེད་པ་ནི་ནམ་ཟླའི་འགྱུར་ལྡོག་དང་སྐྱེ་དངོས་སྣ་མང་རང་བཞིན་ཉམས་དམས་སུ་འགྲོ་བ་ཐག་གཅོད་དང་། འབྲུ་རིགས་བདེ་འཇགས་ཀྱི་ཉེན་ཁ་ཇེ་དམའ་རུ་གཏོང་བའི་གནད་འགག་ཡིན། དེ་ལས་གཞན་བཅའ་ཁྲིམས་འཆར་ཟིན་དེས་ཡོ་རོབ་གླིང་དུ་སྲུང་སྐྱོབ་ས་ཁུལ་གསར་བ་འཛུགས་པའམ་ཡང་ན་ཡང་བསྐྱར་བེད་སྤྱོད་བྱས་ཆོག་པའི་ནུས་ཁུངས་ཀྱི་རྨང་གཞིའི་སྒྲིག་ཆས་གསར་བ་འཛུགས་སྐྲུན་བྱེད་པར་བཀག་འགོག་བྱེད་མི་སྲིད་ཟེར།
ཡོ་རོབ་གླིང་གྲོས་ཁང་གི་གྲོས་མི་ལུའུ་ཨེ་ནཱ་ཡིས་སྤྱི་སྒྲོག་ནང་བཤད་རྒྱུར། རང་བྱུང་སླར་གསོའི་བཅའ་ཁྲིམས་ནི་ཡོ་རོབ་གླིང་ལྷད་མེད་གྲོས་མཐུན་གྱི་གྲུབ་ཆ་གལ་ཆེན་ཞིག་ཡིན་པ་དང་། ཡོ་རོབ་གླིང་གི་སྐྱེ་ཁམས་མ་ལག་སླར་གསོ་བྱེད་པའི་ཚན་རིག་གི་ཐུན་མོང་ལྟ་ཚུལ་དང་གྲོས་གཞི་བརྩི་སྲུང་བྱས་ཡོད་ཟེར། ཁོས་ཕྱོགས་ཁག་སོ་སོས་སྐབས་འདིའི་གྲོས་ཁང་གི་འགན་ཡུན་མ་ལོངས་གོང་གྲོས་མཐུན་བཀོད་དེ། ཡོ་རོབ་གླིང་མནའ་འབྲེལ་གྱི་ལོ་རྒྱུས་སྟེང་གི་རང་བྱུང་སླར་གསོའི་ཁྲིམས་སྲོལ་ཐོག་མ་དེར་གྲོས་མཐུན་འགོད་པར་བརྩོན་ལེན་བྱེད་དགོས་པའི་འབོད་སྐུལ་བཏང་།
དེའི་རྗེས་ནས་ཡོ་རོབ་གླིང་གྲོས་ཁང་གིས་ད་རུང་ལས་རིམ་གཞིར་བཟུང་ནས་འབྲེལ་ཡོད་གྲོས་མོལ་སྤེལ་ཏེ། བཅའ་ཁྲིམས་འཆར་ཟིན་གྱི་ཆེས་མཇུག་མཐའི་ཁྲིམས་འཛུགས་ལས་རིམ་ཡོངས་འགྲུབ་བྱེད་དགོས་པ་རེད།
བསོད་ནམས་ཚེ་རིང་གིས་བསྒྱུར།
