ནེ་ཀྲི་རི་ཡཱའི་ཙུང་ཐུང་ཐིས་ནོའུ་པུའུ་ཡིས་ཚེས་བཅུ་གསུམ་ཉིན་ཁྱབ་བསྒྲགས་བྱས་དོན། ནེ་ཀྲི་རི་ཡཱ་འབྲུ་རིགས་བདེ་འཇགས་ཀྱི་བྲེལ་མྱུར་རྣམ་པར་གནས་པ་ཁྱབ་བསྒྲགས་བྱས་པར་མ་ཟད། བྱེད་ཐབས་བཀོད་སྒྲིག་བྱས་ནས་འབྲུ་རིགས་ཀྱི་རིན་གོང་ཇེ་མཐོར་སོང་བ་ལས་བྱུང་བའི་དམངས་འཚོའི་གནད་དོན་ཐག་གཅོད་བྱེད་དགོས་ཟེར།
ནེ་ཀྲི་རི་ཡཱའི་ཙུང་ཐུང་གི་མགྲིན་ཚབ་པ་ཨ་ལཱ་ཁི་ཡིས་ཉིན་དེར་རྒྱལ་ས་ཨ་པུའུ་ཅཱ་ནས་བསྡུས་པའི་གསར་འགྱུར་སྒྲོག་སྤེལ་ཚོགས་འདུའི་སྟེང་བཤད་རྒྱུར། ཐིས་ནོའུ་པུའུ་ཡིས་ཉེ་སྔོན་འབྲུ་རིགས་ཀྱི་རིན་གོང་ཇེ་མཐོར་སོང་བ་ལས་མང་ཚོགས་ཀྱི་འཚོ་བར་བཟོས་པའི་ཤུགས་རྐྱེན་ལ་རྒྱུས་ལོན་བྱུང་བས། ནེ་ཀྲི་རི་ཡཱ་འབྲུ་རིགས་བདེ་འཇགས་ཀྱི་བྲེལ་མྱུར་རྣམ་པར་གནས་པ་ཁྱབ་བསྒྲགས་བྱས་པ་རེད། ཐིས་ནོའུ་པུའུ་ཡིས་འབྲེལ་ཡོད་ཀྱི་སྲིད་གཞུང་ལས་ཁུངས་ཀྱིས་བྲེལ་མྱུར་བྱེད་ཐབས་སྤྱད་དེ། འབྲུ་རིགས་ཐོན་སྐྱེད་ལ་སྐུལ་མ་གཏོང་བ་དང་ཚོང་རའི་མཁོ་འདོན་རྒྱ་བསྐྱེད་དེ་འབྲུ་རིགས་ཀྱི་རིན་གོང་ཇེ་དམའ་རུ་གཏོང་དགོས་པའི་རེ་བ་བཏོན། བྱེ་བྲག་གི་བྱེད་ཐབས་ལ་ཞིང་ལས་ཁྱབ་ཁོངས་ཀྱི་དངུལ་གཏོང་ལ་ཤུགས་སྣོན་པ་དང་། རྨོ་འདེབས་བྱེད་པའི་མཁོ་འདོན་ཇེ་མང་དུ་གཏོང་བ། ས་ཞིང་གི་ཆུ་གཏོང་ལེགས་བཅོས་བྱེད་པ། ཞིང་བར་ས་བོན་དང་ལུད་རྫས་འདོན་སྤྲོད་བྱེད་པ། འབྲུ་རིགས་སྐྱེལ་འདྲེན་དང་ཉོ་ཚོང་གི་བཀག་རྒྱ་སེལ་བ་སོགས་འདུས།
ནེ་ཀྲི་རི་ཡཱ་རྒྱལ་ཁབ་སྡོམ་རྩིས་ཅུའུ་ཡི་གཞི་གྲངས་ལྟར་ན། ཉིས་སྟོང་ཉེར་གཅིག་ལོའི་ལོ་མགོའི་ཚུན་ལ། ནེ་ཀྲི་རི་ཡཱའི་དངུལ་ལོར་ཚད་བརྒལ་འགྲེམ་པའི་ཚད་ཅུང་མཐོ་བའི་ཆུ་ཚད་དུ་གནས་ཡོད་པ་དང་། ད་ལོའི་ཟླ་ལྔ་བའི་འཛད་སྤྱོད་རིན་གོང་གི་དམིགས་ཚད་དུས་མཉམ་ལས་བརྒྱ་ཆའི་ཉེར་གཉིས་དང་གྲངས་ཆུང་བཞི་འཕར་བ་དང་། དེའི་ནང་ཟས་རིགས་ཀྱི་རིན་གོང་དུས་མཉམ་ལས་བརྒྱ་ཆའི་ཉེར་བཞི་དང་གྲངས་ཆུང་བརྒྱད་འཕར་ཡོད།
ས་དེའི་སྨྱན་བྱད་ཀྱིས་བསྒྲགས་པ་ལྟར་ན། ཐིས་ནོའུ་པུའུ་ཡིས་ཚེས་བཅུ་གསུམ་ཉིན་ནེ་ཀྲི་རི་ཡཱའི་རྒྱལ་དམངས་གྲོས་ཁང་གྲོས་ཞུགས་ཁང་ལ་འཕྲིན་ཡིག་བསྐུར་ཏེ། སྲིད་གཞུང་གིས་འཛམ་གླིང་དངུལ་ཁང་ལ་མེ་སྒོར་དུང་ཕྱུར་བརྒྱད་ཀྱི་དངུལ་བུན་བསྐྱི་བའི་འཆར་གཞིར་ཆོག་མཆན་འགོད་དགོས་པ་དང་། དངུལ་བུན་མ་དངུལ་དེ་གཙོ་བོ་འཚོ་བར་དཀའ་ཁག་ཆེ་བའི་མང་ཚོགས་ལ་གཞི་རྩའི་འཚོ་བའི་ཁ་གསབ་འདོན་སྤྲོད་བྱེད་པའི་ཐད་བཀོལ་དགོས་པའི་རེ་བ་བཏོན།
བསོད་ནམས་ཚེ་རིང་གིས་བསྒྱུར།
