གསར་འགོད་པས་ཚེས་ཉེར་ལྔ་ཉིན་ཀྲུང་གོའི་ཚོང་དོན་པུའུ་ནས་རྒྱུས་ལོན་བྱུང་བ་ལྟར་ན། ཀྲུང་གོའི་ཚོང་དོན་པུའུ་ཡི་པུའུ་ཀྲང་ཝང་ཝུན་ཐའོ་ཡིས་པེ་ཅིང་ནས་བརྙན་རིས་བརྒྱུད་དེ་ནི་ཁཱ་རཱ་ཀྭའི་འཕེལ་རྒྱས་དང་བཟོ་ལས། ཉོ་ཚོང་བཅས་ཀྱི་པུའུ་ཀྲང་པེ་མུའུ་ཏི་སི་དང་གྲོས་མོལ་བྱས་པ་དང་། མཉམ་དུ་ངོ་བོ་རང་བཞིན་ལྡན་པའི་སྒོ་ནས་ཀྲུང་གོ་དང་ནི་ཁཱ་རཱ་ཀྭའི་རང་དབང་ཉོ་ཚོང་གྲོས་ཆོད་ཀྱི་གྲོས་མོལ་ཡོངས་འགྲུབ་བྱས་པ་ཁྱབ་བསྒྲགས་བྱས། ཕྱོགས་གཉིས་ཀྱིས་གྲོས་ཆོད་བཀོད་དེ། འབྲེལ་ཡོད་ཀྱི་ལག་རྩལ་གྲ་སྒྲིག་བྱེད་པ་དང་རྒྱལ་ནང་གི་ཆོག་མཆན་འགོད་པའི་ལས་རིམ་ལག་བསྟར་བྱེད་པར་ཤུགས་སྣོན་བྱས་ནས། ཧུར་ཐག་སྒོས་སྔ་མོ་ནས་གྲོས་མཐུན་དེ་བཀོད་ནས་ལག་བསྟར་བྱེད་རྒྱུ་ཡིན་ཟེར།
ཀྲུང་གོ་དང་ནི་ཁཱ་རཱ་ཀྭ་ཡིས་རང་དབང་ཉོ་ཚོང་གྲོས་ཆོད་བཀོད་པ་ནི་རྒྱལ་ཁབ་གཉིས་ཀྱི་མགོ་ཁྲིད་པའི་ཐུན་མོང་ལྟ་ཚུལ་དངོས་འབེབས་བྱེད་པའི་བྱེད་ཐབས་གལ་ཆེན་ཞིག་ཡིན་པ་དང་། རྒྱལ་ཁབ་གཉིས་ཀྱི་དཔལ་འབྱོར་ཉོ་ཚོང་འགྲོ་འོང་ལ་ལམ་ལུགས་རང་བཞིན་གྱི་འགན་སྲུང་འདོན་སྤྲོད་བྱེད་ཐུབ་ལ། སྔར་ལས་ལྷག་པའི་སྒོ་ནས་ཕྱོགས་གཉིས་ཀྱི་དཔལ་འབྱོར་ཉོ་ཚོང་མཉམ་ལས་ཀྱི་ཆུ་ཚད་མཐོར་འདེགས་བྱེད་པར་ཕན་ཐོགས་ཡོད་པར་མ་ཟད། དུས་རབས་གསར་བའི་ཀྲུང་གོ་དང་ནི་ཁཱ་རཱ་ཀྭའི་འབྲེལ་བར་འཕེལ་རྒྱས་སྔར་ལས་ཆེན་པོ་འབྱུང་བར་སྐུལ་འདེད་གཏོང་ཐུབ་ངེས་རེད།
བསོད་ནམས་ཚེ་རིང་གིས་བསྒྱུར།
