སྤྱི་ཁྱབ་པུའུ་ཧྥ་རན་སིའི་ཕཱ་རེ་སི་རུ་ཡོད་པའི་མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་ཀྱིས་ཚེས་ཉེར་དྲུག་ཉིན་ཉིས་སྟོང་ཉེར་གསུམ་ལོའི་འཛམ་གླིང་ཡོངས་ཀྱི་སློབ་གསོའི་ལྟ་རྟོག་ཚད་འཇལ་སྙན་ཞུ་སྤེལ་ཏེ། སློབ་གསོའི་ལས་ཁུངས་སུ་ཚད་བརྒལ་གྱིས་རིག་ནུས་ལག་ཁྱེར་ཁ་པར་སོགས་སྤོ་སྒུལ་སྒྲིག་ཆས་བེད་སྤྱོད་བྱས་པར་སེམས་ཁུར་བྱེད་པའི་ཚུལ་བསྟན།

ལོ་ཧྲིལ་བོའི་སྙན་ཞུ་དེ་ལས་བསྟན་དོན། གྲངས་ལྡན་ལག་རྩལ་གོང་འཕེལ་དུ་སོང་བ་ལས་འཛམ་གླིང་ཧྲིལ་བོར་འགྱུར་ལྡོག་བཟོ་བཞིན་ཡོད། འདས་པའི་ལོ་ངོ་ཉི་ཤུའི་ནང་། སློབ་སྦྱོང་མཁན་དང་སློབ་གསོའི་བྱ་བ་བྱེད་མཁན། སློབ་གསོའི་ལས་ཁུངས་བཅས་ཀྱིས་གྲངས་ལྡན་ལག་རྩལ་གྱི་ཡོ་བྱད་རྒྱ་ཆེར་བེད་སྤྱོད་བྱས་ཡོད། ཡིན་ཡང་གལ་ཏེ་འོས་འཚམ་མིན་པ་དང་ཚད་བརྒལ་གྱིས་གྲངས་ལྡན་ལག་རྩལ་བེད་སྤྱོད་བྱས་ན་སློབ་གསོའི་ཐད་གནོད་པ་ཐེབས་སྲིད་ཟེར།

སྙན་ཞུའི་ནང་དྲངས་པའི་རྒྱལ་སྤྱིའི་སློབ་གསོའི་ནུས་པའི་དཔྱད་འཇོག་འཆར་གཞིའི་ནང་གི་རྒྱལ་སྤྱིའི་དཔྱད་འཇོག་གཞི་གྲངས་ལྟར་ན། ཚད་བརྒལ་གྱིས་འཕྲིན་གཏོང་ལག་རྩལ་བེད་སྤྱོད་བྱེད་པ་དང་སློབ་གསོའི་སྦྱངས་འབྲས་བར་ལྡོག་ཕྱོགས་ཀྱི་འབྲེལ་བ་ལྒདན་པ་རེད། རྒྱལ་ཁབ་བཅུ་བཞིར་འབྲེལ་བའི་ཞིབ་འཇུག་ཅིག་ལས་མངོན་པ་ལྟར་ན། སྤོ་སྒུལ་སྒྲིག་ཆས་ཁོ་ནས་སློབ་གསོའི་བློ་རྩེ་གཅིག་སྒྲིམ་གྱི་ནུས་པ་ཉམས་པར་བྱས་ནས་སློབ་མའི་སློབ་སྦྱོང་ལ་ལྡོག་ཕྱོགས་ཀྱི་ཤུགས་རྐྱེན་ཐེབས་སྲིད་པ་རེད། དེ་ལས་གཞན་དགེ་རྒན་ལ་ལས་བལྟས་ན། རྩིས་འཁོར་དང་ཁ་པར་བཀོལ་ན་སློབ་ཁྲིད་སྐབས་ཀྱི་དོ་དམ་ལ་བར་ཆད་ཐེབས་སྲིད་པར་འདོད་ཀྱང་། མིག་སྔར་བཞི་ཆའི་གཅིག་གི་རྒྱལ་ཁབ་མ་གཏོགས་སློབ་མས་སློབ་གྲྭ་ནས་རིག་ནུས་ལག་ཁྱེར་ཁ་པར་བཀོལ་བར་གཏན་འགོག་བྱས་མེད་ཟེར།

བསོད་ནམས་ཚེ་རིང་གིས་བསྒྱུར།