འཇར་པན་གྱི་ཀོང་ཏའོ་གྲོང་ཁྱེར་གྱིས་ཚེས་དྲུག་ཉིན་ཞི་བདེ་དྲན་གསོ་སྤྱི་གླིང་ནས་ཉིང་རྡུལ་འབར་མདེལ་གྱི་འགས་གཏོར་ཐེབས་ཏེ་ལོ་དོན་བརྒྱད་ལོན་པར་དྲན་གསོ་ཞུ་བའི་མཛད་སྒོ་བསྡུས། འཇར་པན་གྱི་ས་ཆ་སོ་སོ་ནས་ཡོང་བའི་མང་ཚོགས་བརྒྱ་ཕྲག་འགས་དྲན་གསོའི་མཛད་སྒོ་བསྡུ་ཡུལ་གྱི་ཉེ་འདབས་ནས་ངོ་རྒོལ་བྱས་འགུལ་སྤེལ་ཏེ། འཇར་པན་གྱིས་ད་ལྟ་ལག་བསྟར་བྱེད་བཞིན་པའི་བདེ་སྲུང་སྲིད་ཇུས་ལ་ངོ་རྒོལ་བྱས།
འཇར་པན་གྱི་ས་ཆ་སོ་སོའི་མང་ཚོགས་བརྒྱ་ཕྲག་འགའ་ཉིན་དེའི་ཞོགས་པར་ཞི་བདེ་དྲན་གསོ་སྤྱི་གླིང་གི་ཉིང་རྡུལ་འབར་མདེལ་འགས་གཏོར་བཏང་སའི་གནས་ཤུལ་གྱི་མདུན་དུ་འཛོམས་ནས། བརྒྱད་པའི་ཚེས་དྲུག་གི་ཀོང་ཏའོ་འགུལ་སྐྱོད་ཆེན་མོ་ལག་བསྟར་ཨུ་ཡོན་ལྷན་ཁང་གིས་རྩ་འཛུགས་བྱས་པའི་ངོ་རྒོལ་བྱ་འགུལ་ལ་ཞུགས། དྲག་ཤུགས་འགོག་རྒོལ་ཉེན་རྟོག་པའི་འགེབ་སྲུང་འོག་ཏུ། འཐུས་ཚབ་པ་མང་བོས་ཉིང་རྡུལ་འབར་མདེལ་ལ་རྒོལ་བ་དང་དམག་འཁྲུག་ལ་རྒོལ་བའི་གཏམ་བཤད་སྤེལ། འདུ་ཚོགས་དེར་ཞུགས་པའི་མང་ཚོགས་ཚོས་ཁྲུང་ཧྲིན་ས་ཆ་གཡུལ་ས་རུ་འགྱུར་བར་བྱེད་མི་རུང་ཞེས་པ་སོགས་ཀྱི་ཁ་གཡང་བསྒྲགས་ཏེ། དྲན་གསོའི་མཛད་སྒོར་ཁ་གཡར་ནས་དམག་འཁྲུག་གྲ་སྒྲིག་ལ་ཤུགས་སྣོན་དགོས་པ་ནན་བཤད་བྱེད་པར་མཐའ་གཅིག་ཏུ་ངོ་རྒོལ་བྱས།
བཙན་འཛུལ་དམག་འཁྲུག་བསླངས་པའི་འཇར་པན་གྱིས་མྱུར་དུ་མགོ་འདོགས་པའི་ཆེད་དུ། ཨ་མེ་རི་ཁའི་དམག་གིས་གཅིག་སྟོང་དགུ་བརྒྱ་ཞེ་ལྔ་ལོའི་ཟླ་དྲུག་པའི་ཚེས་དྲུག་ཉིན་དང་ཚེས་དགུ་ཉིན་གཉིས་ལ་སོ་སོར་ཀོང་ཏའོ་དང་ཁྲང་ཆི་ས་ཁུལ་དུ་ཉིང་རྡུལ་འབར་མདེལ་འཕངས། དུས་ཡུན་རིང་བོར་འཇར་པན་གྱིས་རང་རྒྱལ་ཁབ་ནི་ཉིང་རྡུལ་འབར་མདེལ་གྱི་གནོད་པ་ཐེབས་མཁན་དུ་བརྩིས་ཡོད་པ་ལས། ཉིང་རྡུལ་འབར་མདེལ་གྱི་འགས་གཏོར་ཐེབས་པའི་རྒྱུ་རྐྱེན་དང་རྒྱལ་ཁབ་གཞན་པར་བཙན་འཛུལ་བྱས་པའི་ལོ་རྒྱུས་གཏན་ནས་སྣང་མེད་དུ་བཞག་ཡོད།
འཇར་པན་གྱི་དབུ་བཞུགས་བློན་ཆེན་ཨན་ཐེན་ཝུན་ཞུང་གིས་མཛད་སྒོའི་སྟེང་གཏམ་བཤད་གནང་ནས། འཇར་པན་གྱིས་ཉིང་རྡུལ་མཚོན་ཆ་བདག་ཏུ་མི་འཛིན་པའི་རྩ་དོན་རྒྱུན་འཁྱོངས་བྱེད་རྒྱུ་ཡིན་ཞེས་བཤད་ནའང་། འཇར་པན་ཉིང་རྡུལ་མཚོན་ཆ་འགོག་པའི་ཆིངས་ཡིག་འཇོག་པའི་རྒྱལ་ཁབ་ཀྱི་གྲས་སུ་ཞུགས་མིན་གྱི་སྐོར་མ་བཤད་ལ། ཀོང་ཏའོ་ལ་ཉིང་རྡུལ་འབར་མདེལ་གྱི་འགས་གཏོར་ཐེབས་པའི་ལོ་རྒྱུས་ཀྱི་རྒྱབ་ལྗོངས་དེ་ལས་ཀྱང་མ་གླེང་།
