ཨ་མེ་རི་ཁའི་ཕོ་བྲང་དཀར་པོའི་རྒྱལ་ཁབ་བདེ་འཇགས་ཨུ་ཡོན་ལྷན་ཁང་གི་མགྲིན་ཚབ་པ་བོ་སིན་གྱིས་ཚེས་བཅུ་ཉིན་གསལ་སྒྲོག་སྤེལ་ཏེ། ཨ་མེ་རི་ཁ་ཕྱོགས་ལ་དབྱི་ལིང་གི་ཁས་ལེན་ཐོབ་ཡོད་པ་དང་། དབྱི་ལིང་གིས་བཀག་འཇུག་བྱས་པའི་ཨ་མེ་རི་ཁའི་སྤྱི་དམངས་ལྔ་བཙོན་གྲོལ་གཏོང་རྒྱུ་ཡིན་པ་དང་། མིག་སྔར་ཁོ་ཚོ་བཟང་བཙོན་གྱི་རྣམ་པར་ཡོད་ཟེར།
བོ་སིན་གྱིས་བཤད་རྒྱུར། མི་ལྔ་བོ་དེ་བཙོན་གྲོལ་གཏོང་བར་འགན་སྲུང་བྱེད་ཆེད་ཨ་མེ་རི་ཁ་ཕྱོགས་ཀྱིས་དབྱི་ལིང་བར་གྲོས་མོལ་བྱས། གྲོས་མོལ་འཕེལ་རིམ་ལ་ངེས་གཏན་མེད་པར་དམིགས་ནས། ཨ་མེ་རི་ཁ་ཕྱོགས་ཀྱིས་བཟང་བཙོན་ལ་བཅུག་པའི་མི་ལྔ་བོ་དེའི་བྱེ་བྲག་གི་གནས་ཚུལ་དང་ཨ་མེ་རི་ཁ་ཕྱོགས་ཀྱིས་ཁོ་ཚོར་རང་དབང་ཐོབ་པར་འགན་སྲུང་བྱེད་ཆེད་འབད་བརྩོན་བྱས་པའི་བྱ་བ་སོགས་ཞིབ་ཏུ་བརྗོད་པར་སྟབས་བདེ་མིན་ཟེར།
གཞན་ཡང་དབྱི་ལིང་སྤྱི་མཐུན་རྒྱལ་ཁབ་འཕྲིན་ཁང་གིས་ཚེས་བཅུ་ཉིན་བསྒྲགས་པ་ལྟར་ན། དབྱི་ལིང་དང་ཨ་མེ་རི་ཁས་ཉེ་སྔོན་བཙོན་མ་བརྗེ་སྤོར་བྱེད་པའི་གྲོས་མཐུན་ཞིག་བཀོད་པ་དང་། ཕྱོགས་གཉིས་ཀྱིས་ཆ་རྐྱེན་ཡོད་པའི་སྒོ་ནས་བཀག་འཇུག་བྱས་པའི་ཕན་ཚུན་གྱི་མི་སྣས་མང་བོ་ཕྱིར་གཏོང་རྒྱུ་རེད་ཟེར།
འབྲེལ་ཡོད་མི་སྣས་བཤད་རྒྱུར། ཕྱོགས་གཉིས་ཀྱིས་ཐོག་མར་བཀོད་པའི་གྲོས་མཐུན་དེ་ལྟར་ན། དབྱི་ལིང་གི་ཕྱི་རྒྱལ་ནས་བཀག་ཉར་བྱས་པའི་མེ་སྒོར་ཐེར་འབུམ་འགའི་རྒྱུ་ནོར་གྱི་བཀག་ཉར་མེད་པར་གཏོང་རྒྱུ་ཡིན་པ་དང་། དེའི་ནང་ཧན་གོར་བཀག་ཉར་བྱས་པའི་མེ་སྒོར་ཐེར་འབུམ་དྲུག་གི་རྒྱུ་ནོར་དང་དབྱི་རག་ཉོ་ཚོང་དངུལ་ཁང་དུ་བཀག་ཉར་བྱས་པའི་རྒྱུ་ནོར་མང་བོ་འདུས། ཐེངས་འདིའི་བཙོན་པ་བརྗེ་སྤོར་བྱེད་པའི་གྲོས་མཐུན་དེར་འབྲེལ་བའི་ཨ་མེ་རི་ཁའི་མི་སྣ་བཙོན་ཁང་ནས་ཕྱིར་བླངས་ཡོད་པ་དང་། མ་དངུལ་དེ་དག་དབྱི་ལིང་གི་དམིགས་སའི་རྩིས་ཐོའི་སྟེང་བསྐུར་རྗེས་དངོས་སུ་བཙོན་གྲོལ་གཏོང་རྒྱུ་རེད་ཟེར།
དབྱི་ལིང་ཕྱི་འབྲེལ་པུའུ་ཡིས་གསལ་སྒྲོག་ཅིག་གི་ནང་བཤད་རྒྱུར། མ་དངུལ་གྱི་བཀག་ཉར་མེད་པ་གཏོང་བའི་ལས་རིམ་མགོ་བརྩམས་ཡོད་པ་དང་། དབྱི་ལིང་ལ་གནད་དོན་དེའི་ཐད་ནས་ཨ་མེ་རི་ཁའི་དགོས་ངེས་ཀྱི་ཁག་ཐེག་ཐོབ་ཡོད་ཟེར། གསལ་སྒྲོག་ལས་བཤད་རྒྱུར། ཨ་མེ་རི་ཁས་ཁྲིམས་འགལ་བཀག་འཇུག་བྱས་པའི་དབྱི་ལིང་གི་མི་མང་བོ་ཡང་ཉེ་སྔོན་བཙོན་གྲོལ་གཏོང་རྒྱུ་རེད་ཟེར།
བསོད་ནམས་ཚེ་རིང་གིས་བསྒྱུར།
