ཨུ་རུ་སིའི་རྒྱལ་སྲུང་པུའུ་དང་འབྲེལ་ཡོད་སྡེ་ཁག་གི་བསྒྲགས་པ་ལྟར་ན། ཚེས་ཉེར་དགུ་ཉིན་གྱི་ནམ་གུང་ནས་ཚེས་སུམ་ཅུ་ཉིན་གྱི་ཞོགས་པའི་བར། ཝུའུ་ཁི་ལན་གྱིས་མི་བསྡད་མེད་པའི་གནམ་གྲུ་བཀོལ་ནས་ཨུ་རུ་སིའི་མངའ་ཁོངས་ཀྱི་དམིགས་འབེན་ལ་གཞི་རྒྱ་ཆེ་བའི་འཇབ་རྒོལ་བྱེད་རྩིས་བྱས་པ་དང་། མི་བསྡད་མེད་པའི་གནམ་གྲུ་དེ་དག་ས་ཁུལ་མང་བོ་ནས་འགས་གཏོར་བཏང་ཡོད་ཟེར།
ཕུའུ་སི་ཁི་ཧྥུའུ་མངའ་སྡེའི་མགོ་བ་ཝེ་ཅེ་ཨར་ནེ་ཁི་ཧྥུའུ་ཡིས་ཟླ་བརྒྱད་པའི་ཚེས་སུམ་ཅུ་ཉིན་དྲ་ཐོག་ཏུ་རྩོམ་ཡིག་སྤེལ་ནས། ཚེས་ཉེར་དགུ་ཉིན་གྱི་ནམ་གུང་ཝུའུ་ཁི་ལན་གྱི་མི་བསྡད་མེད་པའི་གནམ་གྲུས་ཕུའུ་སི་ཁི་ཧྥུའུ་གནམ་གྲུ་ཐང་དུ་འཇབ་རྒོལ་བྱས་པ་དང་། བསྒྲགས་པའི་གནས་ཚུལ་ལྟར་ན་འཇབ་རྒོལ་དེ་ལས་མི་སྣར་ཤི་རྨས་བཟོས་མེད་ཟེར།
ཁོས་བཤད་རྒྱུར། གནམ་གྲུ་ཐང་གི་རྒྱུག་ལམ་ལ་གཏོར་བརླག་ཐེབས་པའི་གནས་ཚུལ་ལ་དཔྱད་འཇོག་བྱེད་བཞིན་ཡོད་པ་དང་། ཕུའུ་སི་ཁི་ཧྥུའུ་གནམ་གྲུ་ཐང་གི་ཚེས་སུམ་ཅུ་ཉིན་གྱི་གནམ་གྲུ་ཚང་མ་གཏོང་མཚམས་བཞག་ཡོད་ཟེར། ཝེ་ཅེ་ཨར་ནེ་ཁི་ཧྥུའུ་ཡིས་འཇབ་རྒོལ་སྤེལ་མཁན་གྱི་མི་བསྡད་མེད་པའི་གནམ་གྲུའི་ཁ་གྲངས་གསལ་བོར་བཤད་མེད། ཨུ་རུ་སིའི་བྲེལ་མྱུར་གནས་ཚུལ་པུའུ་ཡི་ཕུའུ་སི་ཁི་ཧྥུའུ་མངའ་སྡེའི་སྤྱི་ཁྱབ་ཅུའུ་ཡིས་ཚེས་སུམ་ཅུ་ཉིན་བསྒྲགས་པ་ལྟར་ན། ཚེས་ཉེར་དགུ་ཉིན་གྱི་དགོང་མོའི་དུས་ཚོད་བཅུ་གཅིག་དང་སྐར་མ་ཉེར་བརྒྱད་སྟེང་། ཕུའུ་སི་ཁི་ཧྥུའུ་གནམ་གྲུ་ཐང་ལ་མེ་སྐྱོན་བྱུང་བ་དང་། དབྱེ་ཨར-76རྟགས་ཅན་གྱི་སྐྱེལ་འདྲེན་གནམ་གྲུ་འགར་གཏོར་བརླག་ཐེབས་ལ། ས་དེའི་རྒུད་སྐྱོབ་སྡེ་ཁག་གིས་བྲེལ་མྱུར་རྒུད་སྐྱོབ་བྱེད་བཞིན་ཡོད་ཟེར།
མའོ་སི་ཁོ་གྲོང་ཁྱེར་གྱི་ཧྲི་ཀྲང་སོ་པུས་ཡཱ་ཉིང་གིས་དྲ་ཐོག་ཏུ་རྩོམ་ཡིག་སྤེལ་ནས། ཚེས་སུམ་ཅུ་ཉིན་གྱི་ཞོགས་པར། ཝུའུ་ཁི་ལན་གྱིས་མི་བསྡད་མེད་པའི་གནམ་གྲུ་བཀོལ་ནས་ཨུ་རུ་སིའི་ཀྲུང་དབྱང་རྒྱལ་ཕྲན་མཉམ་འབྲེལ་ས་ཁུལ་དུ་གཞི་རྒྱ་ཆེ་བའི་འཇབ་རྒོལ་བྱེད་རྩིས་བྱས་པ་དང་། དེའི་ནང་མའོ་སི་ཁོ་གྲོང་ཁྱེར་དུ་འཕུར་རྩིས་བྱེད་པའི་མི་བསྡད་མེད་པའི་གནམ་གྲུ་ཞིག་མའོ་སི་ཁོ་མངའ་སྡེའི་ལུའུ་སི་ཅི་ས་ཁུལ་གྱི་བར་སྣང་ནས་ཨུ་རུ་སིའི་མཁའ་སྲུང་དམག་དཔུང་གིས་གཏོར་བ་དང་། འཇབ་རྒོལ་དོན་རྐྱེན་ལས་མི་སྣར་ཤི་རྨས་དང་རྒྱུ་ནོར་གྱོང་གུད་བྱུང་མེད་ཟེར། ཨུ་རུ་སིའི་རྒྱལ་སྲུང་པུའུ་ཡིས་ཉིན་དེར་ཁྱབ་བསྒྲགས་བྱས་དོན། མི་བསྡད་མེད་པའི་གནམ་གྲུ་ཞིག་མའོ་སི་ཁོ་མངའ་སྡེའི་ལུའུ་སི་ཅི་ས་ཁུལ་གྱི་བར་སྣང་ནས་བཀག་ནས་གཏོར་བའི་གནས་ཚུལ་དེ་བདེན་དཔང་བྱས།
ཨུ་རུ་སིའི་རྒྱལ་སྲུང་པུའུ་ཡིས་བསྒྲགས་པ་ལྟར་ན། ཚེས་སུམ་ཅུ་ཉིན་གྱི་ཞོགས་པར། གཞན་ཡང་མི་བསྡད་མེད་པའི་གནམ་གྲུ་བདུན་སོ་སོར་པུའུ་ལིང་སི་ཁི་མངའ་སྡེ་དང་ཁཱ་ལུའུ་ཅཱ་མངའ་སྡེ། ཨོ་ལེའོ་ཨར་མངའ་སྡེ། ལིང་ཙན་མངའ་སྡེ་བཅས་ནས་ཨུ་རུ་སིའི་མཁའ་སྲུང་མ་ལག་གིས་གཏོར་བ་རེད་ཟེར།
བསོད་ནམས་ཚེ་རིང་གིས་བསྒྱུར།
