སེར་ཝེ་ཡཱའི་ཙུང་ཐུང་ཝུའུ་ཆི་ཆི་ཡིས་ཚེས་གཅིག་ཉིན་བྱང་ཕྱོགས་ཀྱི་ཧྥུའུ་དབྱེ་ཧྥུའུ་ཏེན་ནཱ་ཞིང་ཆེན་གྱི་སློབ་ཆུང་ཞིག་ཏུ་རྟོག་ཞིབ་བྱེད་སྐབས་བཤད་རྒྱུར། ཀྲུང་གོའི་བློ་གྲོས་བརྙན་ཡོལ་གྱིས་སེར་ཝེ་ཡཱ་ཡིས་དེང་རབས་ཅན་གྱི་སློབ་གསོའི་མ་ལག་འཛུགས་པར་རོགས་འདེགས་བྱས་ཡོད་ཟེར།

ཀྲུང་གོའི་ཧྭ་ཝེ་ཀུང་ཟི་དང་སེར་ཝེ་ཡཱའི་གློག་འཕྲིན་ཀུང་ཟིས་ཉིན་དེར་སེར་ཝེ་ཡཱའི་སློབ་ཆུང་མང་བོར་ཧྭ་ཝེའི་བློ་གྲོས་བརྙན་ཡོལ་བརྒྱ་དང་ལྔ་བཅུ་ཞལ་འདེབས་སུ་ཕུལ། ཝུའུ་ཆི་ཆི་ལས་གཞན་སེར་ཝེ་ཡཱ་རུ་སྡོད་པའི་ཀྲུང་གོའི་གཞུང་ཚབ་ཁང་གི་གནས་སྐབས་ཀྱི་གཞུང་ཚབ་ཚབ་མ་ཀྲང་ཀྲི་དང་དེ་མིན་སེར་ཝེ་ཡཱའི་སྲིད་གཞུང་དང་ཀྲུང་གོ་དང་སེར་ཝེ་ཡཱའི་རྒྱལ་ཁབ་གཉིས་ཀྱི་ཁེ་ལས་འཐུས་མི་བཅས་ཞལ་འདེབས་འབུལ་བའི་མཛད་སྒོར་ཞུགས།

ཝུའུ་ཆི་ཆི་ཡིས་ཧྭ་ཝེ་བློ་གྲོས་བརྙན་ཡོལ་གྱིས་བརྙན་རིས་དྲ་འབྲེལ་ལ་བརྟེན་ནས་སེར་ཝེ་ཡཱའི་སློབ་ཆུང་མང་བོའི་སློབ་མར་སློབ་མགོ་བརྩམས་པའི་འཚམས་འདྲི་ཞུས། ཁོས་བཤད་རྒྱུར། སློབ་གསོ་ནི་རྒྱལ་ཁའི་སྤྱི་ཚོགས་འཛུགས་པའི་རྨང་གཞི་ཡིན་ཞིང་། ཐེངས་འདིའི་ཞལ་འདེབས་ཀྱི་དམིགས་ཡུལ་ནི་ན་གཞོན་གྱི་གྲངས་ལྡན་རྩལ་ནུས་མཐོར་འདེགས་བྱེད་པ་དང་། སེར་ཝེ་ཡཱའི་གྲངས་ལྡན་སྤོར་བསྒྱུར་མྱུར་དུ་མངོན་འགྱུར་བྱེད་པའི་ཆེད་ཡིན། བློ་གྲོས་བརྙན་ཡོལ་དེ་དག་གིས་ཞིང་སྡེ་དང་མཐའ་འཁོབ་ས་ཁུལ་གྱི་སློབ་གྲྭའི་བར་གྱི་འབྲེལ་འདྲིས་དང་མཉམ་འབྲེལ་ལ་ལེགས་བཅོས་བྱས་ཏེ། སེར་ཝེ་ཡཱ་ཡིས་དེང་རབས་ཅན་དང་ལག་རྩལ་སྔོན་ཐོན་ཅན་གྱི་སློབ་གསོའི་མ་ལག་འཛུགས་སྐྲུན་བྱེད་པར་རོགས་འདེགས་བྱེད་ཐུབ་ཟེར།

མཚམས་སྦྱོར་བྱས་པ་ལྟར་ན། ཐེངས་འདིར་ཞལ་འདེབས་སུ་ཕུལ་བའི་ཧྭ་ཝེ་བློ་གྲོས་བརྙན་ཡོལ་ནི་འབྲེལ་འདྲིས་རྣམ་པ་ཅན་གྱི་འཆར་ཡོལ་ཡིན་པ་དང་། ལག་བྲིས་མ་ཡིག་དང་སྐྱ་ཐིག གྲངས་རིག་གི་སྤྱི་འགྲོས་བཅས་རང་འགུལ་གྱིས་ངོས་འཛིན་བྱེད་པའི་བྱེད་ནུས་ལྡན་པར་མ་ཟད། གསལ་ཚད་མཐོ་བའི་བརྙན་རིས་ཁ་པར་དང་སྐུད་མེད་ནང་དོན་མཉམ་སྤྱོད་ལ་རྒྱབ་སྐྱོར་བྱེད་ཐུབ་པ་རེད།

བསོད་ནམས་ཚེ་རིང་གིས་བསྒྱུར།