མཉམ་འབྲེལ་རྒྱལ་ཚོགས་ཀྱི་རི་ནེ་ཝ་རུ་སྡོད་པའི་ཀྲུང་གོའི་དོན་གཅོད་ཁང་དང་སུའེ་ཙེར་གྱི་རྒྱལ་སྤྱིའི་རྩ་འཛུགས་གཞན་པའི་འཐུས་མི་ཁྲིན་ཞུའུ་ཡིས་ཚེས་བཅུ་གསུམ་ཉིན་མཉམ་འབྲེལ་རྒྱལ་ཚོགས་འགྲོ་མིའི་ཐོབ་ཐང་ལས་འཛིན་ལྷན་ཚོགས་ཀྱི་གྲོས་ཚོགས་སྐབས་ང་བཞི་པའི་གྲོས་དོན་ཐེངས་གཉིས་པའི་སྤྱིར་བཏང་རང་བཞིན་གྱི་རྩོད་གླེང་ཁྲོད་གཏམ་བཤད་དེ། ཕྱོགས་སོ་སོས་ལག་རྡང་སྦྲེལ་ཏེ་འགྲོ་མིའི་ཐོབ་ཐང་ལ་སྲུང་སྐྱོབ་དང་སྐུལ་འདེད་བཏང་ནས་འཛམ་གླིང་གི་འགྲོ་མིའི་ཐོབ་ཐང་ལས་དོན་བདེ་ཐང་ངང་འཕེལ་རྒྱས་འགྲོ་བར་སྒུལ་ཤུགས་སྣོན་དགོས་པའི་འབོད་སྐུལ་བཏང་།
ཁྲིན་ཞུའུ་ཡིས་བསྟན་དོན། ཞི་བདེ་དང་འཕེལ་རྒྱས་ཀྱིས་རྒྱལ་ཁབ་རེ་རེ་དང་མི་རེ་རེར་ཕན་པ་བསྐྲུན་ནས་མི་རེ་རེར་རིགས་སོ་སོའི་འགྲོ་མིའི་ཐོབ་ཐང་ལོངས་སྤྱོད་བྱེད་དུ་འཇུག་རྒྱུ་མངོན་འགྱུར་བྱེད་པ་ནི་ཐུན་མོང་གི་རེ་འདུན་ཡིན་ལ། ཐུན་མོང་གི་འགན་འཁྲིའང་ཡིན། ཕྱོགས་སོ་སོས་འཛམ་གླིང་གི་འགྲོ་མིའི་ཐོབ་ཐང་བསྒྲགས་གཏམ་སྤེལ་ནས་ལོ་དོན་ལྔ་འཁོར་བ་དང་ཝེ་ཡེ་ནའི་བསྒྲགས་གཏམ་དང་འགུལ་སྐྱོད་རྩ་འཛིན་སྤེལ་ནས་ལོ་སུམ་ཅུ་འཁོར་བར་རྗེས་དྲན་བྱེད་པ་གོ་སྐབས་སུ་བྱས་ཏེ་ལག་རྡང་སྦྲེལ་ནས་འགྲོ་མིའི་ཐོབ་ཐང་ལ་སྲུང་སྐྱོབ་དང་སྐུལ་འདེད་གཏོང་དགོས།
ཁྲིན་ཞུའུ་ཡིས་ནན་གྱིས་བསྟན་དོན། ཀྲུང་གོས་རྒྱལ་ཁབ་རང་གི་གནས་ཚུལ་དང་མཐུན་པའི་འགྲོ་མིའི་ཐོབ་ཐང་འཕེལ་རྒྱས་ཀྱི་བགྲོད་ལམ་དུ་བསྐྱོད་རྒྱུ་རྒྱུན་འཁྱོངས་བྱས་ཏེ་ལོ་རྒྱུས་སྟེང་ཐོག་དང་པོར་དབུལ་ཕོངས་མེད་པར་བྱས་པ་དང་འགྲོ་མིའི་ཐོབ་ཐང་ལས་དོན་ཡུན་རིང་འཕེལ་རྒྱས་སོང་ནས་རིགས་སོ་སོའི་མི་དམངས་ཀྱི་ཁེ་དབང་ལ་འགན་སྲུང་གང་ལེགས་ཐོབ། ཀྲུང་གོས་ཆ་འཕྲིན་རྫུན་མ་སྤྱད་དེ་ཀྲུང་གོ་ཕྱོགས་ལ་སྐྱོན་འཛུགས་བྱེད་པ་དང་ལེན་བྱེད་མི་སྲིད་ལ། ཕན་ཚུན་བརྩི་འཇོག་དང་འདྲ་མཉམ་གྱི་ལྟ་སྟངས་འཛིན་པའི་རྨང་གཞིའི་སྟེང་། རྒྱལ་ཁབ་སོ་སོ་དང་མཉམ་དུ་འབད་བརྩོན་བྱས་ཏེ་འཛམ་གླིང་གི་འགྲོ་མིའི་ཐོབ་ཐང་ལས་དོན་གྱི་བདེ་ཐང་འཕེལ་རྒྱས་ལ་སྒུལ་ཤུགས་སྣོན་འདོད་ཡོད།
ལྷ་མོ་ཚེ་རིང་གིས་བསྒྱུར།
