མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་ཀྱིས་ཚེས་བཅུ་དགུ་ཉིན་སྤེལ་བའི་གསར་འགྱུར་སྤྱི་སྒྲོག་ལས་བཤད་རྒྱུར། ད་ལོར་ཉུང་མཐར་ཡང་གསར་འགོད་པ་དང་སྨྱན་བྱད་བྱ་བ་བྱེད་མཁན་སོ་བརྒྱད་འཁྲུག་རྩོད་ས་ཁུལ་དུ་རྐྱེན་ལམ་ལ་ཤོར་བ་དང་། ཁ་གྲངས་དེ་ལོ་སྔོན་མ་གཉིས་དང་བསྡུར་ན་ལྡབ་འགྱུར་གྱིས་ཇེ་མང་དུ་སོང་ཡོད་ཟེར།

མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་ཀྱིས་ཁྱབ་བསྒྲགས་བྱས་པའི་གཞི་གྲངས་ལྟར་ན། ན་ནིང་འཁྲུག་རྩོད་ས་ཁུལ་ནས་རྐྱེན་ལམ་དུ་ཤོར་བའི་གསར་འགོད་པའི་མི་གྲངས་ཉེར་བརྒྱད་ཡིན་པ་དང་། གཞིས་གནངས་ལོར་མི་ཉི་ཤུ་རེད། ད་ལོར་ཁ་གྲངས་དེ་སོ་བརྒྱད་ལ་འཕར་ཡོད་ཟེར། སྤྱི་སྒྲོག་ལས་བཤད་རྒྱུར། ད་ལོར་འཁྲུག་རྩོད་ས་ཁུལ་ནས་བྱུང་བའི་གསར་འགོད་པ་རྐྱེན་ལམ་དུ་ཤོར་བའི་དོན་རྐྱེན་མང་ཆེ་བ་དབུས་ཤར་ས་ཁུལ་གྱི་འཁྲུག་རྩོད་ལ་འབྲེལ་བ་ཡོད། ད་ལོའི་ཆེས་མཇུག་མཐའི་ཟླ་ངོ་གསུམ་ནང་གསར་འགོད་པ་ཉེར་བདུན་འཁྲུག་རྩོད་ས་ཁུལ་ནས་རྐྱེན་ལམ་དུ་ཤོར་བ་དང་། ཉིས་སྟོང་བདུན་ལོའི་ཚུན་ལ་འཁྲུག་རྩོད་ས་ཁུལ་ནས་རྐྱེན་ལམ་དུ་ཤོར་བའི་གསར་འགོད་པའི་ཁ་གྲངས་ཆེས་མང་བའི་དུས་ཚིགས་ཤིག་རེད།

མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་ཀྱི་སྤྱི་ཁྱབ་ལས་འཛིན་པ་ཨ་ཙུའུ་ལའེ་ཡིས་སྤྱི་སྒྲོག་ནང་ཕྱོགས་སོ་སོས་དགོས་ངེས་ཀྱི་བྱེད་ཐབས་གང་རུང་སྤྱད་ཅིང་། རྒྱལ་སྤྱིའི་བཅའ་ཁྲིམས་ཀྱི་གཏན་འཁེལ་ལྟར། གསར་འགོད་པ་དག་མི་སེར་དཀྱུས་མ་ཡིན་པའི་ཆ་ནས་སྲུང་སྐྱོབ་ཐོབ་པར་འགན་སྲུང་བྱེད་དགོས་ཟེར།

མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་ཀྱིས་ད་རུང་བསྟན་དོན། སྨྱན་བྱད་ཀྱི་རྨང་གཞིའི་སྒྲིག་ཆས་དང་གཞུང་སྒྲུབ་ཁང་ལ་འཁྲུག་རྩོད་ས་ཁུལ་ནས་གཏོར་བརླག་ཆེན་པོ་ཐེབས་ཡོད། གསར་འགོད་པ་མང་བོ་བྲོས་བྱོལ་བྱས་པའམ་ཡང་ན་བྱ་བ་བྱེད་ཐབས་མེད་པས། འཁྲུག་རྩོད་ས་ཁུལ་མང་བོའི་གནས་ཚུལ་གཞན་གྱིས་ཤེས་ཐབས་མེད་པས། ས་དེའི་སྡོད་དམངས་དང་འཛམ་གླིང་ཡོངས་ཀྱི་བརྡ་འཕྲིན་ཤེས་རྟོགས་ལ་ཤུགས་རྐྱེན་ཚབས་ཆེན་ཐེབས་ཡོད་ཟེར།

བསོད་ནམས་ཚེ་རིང་གིས་བསྒྱུར།