པཱ་ཞི་རྒྱལ་ཕྲན་མཉམ་འབྲེལ་སྲིད་གཞུང་གིས་ཚེས་ཉེར་གཉིས་ཉིན་པཱ་ཞི་ལེ་ཡཱ་ནས་པཱ་ཞིའི་བཟོ་ལས་གསར་བའི་འཆར་གཞི་ལག་བསྟར་བྱས་ཏེ་དངོས་སུ་བཟོ་ལས་གསར་བ་ཅན་གྱི་ལམ་དུ་བགྲོད་རྒྱུ་ཁྱབ་བསྒྲགས་བྱས།
པཱ་ཞིའི་ཙུང་ཐུང་ལུའུ་ལཱ་ཡིས་ཉིན་དེར་འཆར་གཞི་ལག་བསྟར་བྱེད་པའི་མཛད་སྒོའི་སྟེང་བསྟན་དོན། མིག་སྔར་རྒྱལ་སྤྱིའི་ཚོང་རའི་འགྲན་རྩོད་ཛ་དྲག་ཡིན་པ་དང་། རྒྱལ་ཁབ་སྐོར་ཞིག་གི་སྲུང་སྐྱོབ་རིང་ལུགས་མགོ་འབུས་བྱེད་བཞིན་ཡོད། པཱ་ཞིའི་རྒྱལ་སྤྱིའི་འགྲན་རྩོད་ནུས་པ་མཐོར་འདེགས་བྱེད་ཆེད། ངེས་པར་དུ་དངུལ་གཏོང་ཤུགས་ཚད་ཇེ་ཆེར་བཏང་ནས་པཱ་ཞིའི་ཐོན་ལས་ཕྱིར་གཏོང་ལ་སྐུལ་འདེད་གཏོང་དགོས་ཟེར།
རྒྱུས་ལོན་བྱུང་བ་ལྟར་ན། འཆར་གཞི་ནི་པཱ་ཞིའི་རྒྱལ་ཁབ་བཟོ་ལས་འཕེལ་རྒྱས་ཨུ་ཡོན་ལྷན་ཁང་གིས་སྣེ་ཁྲིད་ནས་གཏན་འབེབས་བྱས་པ་ཡིན་ཞིང་། མ་འོངས་པའི་ལོ་ངོ་བཅུའི་འཕེལ་རྒྱས་དམིགས་འབེན་རབ་དང་རིམ་པ་གཏན་འཁེལ་བྱས་ཏེ། ལོ་བཅུ་ཕྲག་འགའི་རིང་པཱ་ཞིར་ཤུགས་རྐྱེན་ཐེབས་པའི་བཟོ་ལས་ཅན་གྱི་འཕེལ་རིམ་ལེགས་བསྒྱུར་བྱས་པ་རེད།
པཱ་ཞིའི་བཟོ་ལས་གསར་བའི་འཆར་གཞིར་ལས་འགན་གཙོ་བོ་སྣ་དྲུག་འདུས་ཡོད་དེ། འབྲུ་རིགས་དང་འཚོ་བཅུད། ནུས་ཁུངས་བདེ་འཇགས་བཅས་ལ་འགན་སྲུང་བྱེད་པའི་རྒྱུན་མཐུད་གཞི་གྲངས་ཅན་གྱི་ཞིང་ལས་ཐོན་སྐྱེད་མུ་འབྲེལ་འཛུགས་སྐྲུན་བྱེད་པ་དང་། བདེ་ཐང་ཐོན་ལས་ཀྱི་དཔལ་འབྱོར་ཕྱོགས་བསྡུས་ཚོགས་པ་འཛུགས་སྐྲུན་བྱེད་པ། རྒྱུན་མཐུད་ཀྱི་རྨང་གཞིའི་སྒྲིག་ཆས་དང་འཕྲོད་བསྟེན་སྒྲིག་ཆས། སྡོད་ཁང་དང་འགྲིམ་འགྲུལ་བཅས་འཛུགས་སྐྲུན་བྱེད་པ། ལས་རིགས་གཞི་གྲངས་ཅན་གྱི་སྤོར་བསྒྱུར་ལ་སྐུལ་འདེད་གཏོང་བ། ལྷད་མེད་འཕེལ་རྒྱས་ལ་སྐུལ་འདེད་གཏོང་བ། རྒྱལ་ཁབ་ཀྱི་བདག་དབང་དང་རྒྱལ་སྲུང་ལ་འབྲེལ་བའི་ལག་རྩལ་འཕེལ་རྒྱས་ལ་སྐུལ་འདེད་གཏོང་བ་བཅས་འདུས།
པཱ་ཞིའི་ཙུང་ཐུང་གཞོན་པའམ་འཕེལ་རྒྱས་དང་བཟོ་ལས། ཉོ་ཚོང་བཅས་ཀྱི་པུའུ་ཀྲང་ཨ་ཨར་ཁི་མེན་གྱིས་ཉིན་དེར་ལུའུ་ལཱ་ལ་པཱ་ཞིའི་ཉིས་སྟོང་ཉེར་བཞི་ལོ་ནས་ཉིས་སྟོང་ཉེར་དྲུག་ལོའི་བར་གྱི་འགུལ་སྐྱོད་འཆར་གཞི་སྤྲད། འཆར་གཞི་ལས་རྒྱལ་ཕྲན་མཉམ་འབྲེལ་སྲིད་གཞུང་གིས་པཱ་ཞིའི་བཟོ་ལས་གསར་བའི་འཆར་གཞིར་པཱ་ཞིའི་སྒོར་མོ་ཁྲག་ཁྲིག་གསུམ་གྱི་དངུལ་གསོག་འདོན་སྤྲོད་བྱེད་རྒྱུ་རེད།
པཱ་ཞིའི་རྒྱལ་ཁབ་བཟོ་ལས་འཕེལ་རྒྱས་ཨུ་ཡོན་ལྷན་ཁང་ནི་པཱ་ཞི་རྒྱལ་ཕྲན་མཉམ་འབྲེལ་སྲིད་གཞུང་གི་པུའུ་ཨུ་ཉི་ཤུ་དང་པཱ་ཞིའི་རྒྱལ་ཁབ་སྤྱི་ཚོགས་དཔལ་འབྱོར་འཕེལ་རྒྱས་དངུལ་ཁང་། དེ་མིན་དམངས་ཁྲོད་སྤྱི་ཚོགས་དང་ཐོན་སྐྱེད་སྡེ་ཁག ངལ་རྩོལ་པ་བཅས་ཀྱི་ཚབ་བྱེད་པའི་ཚོགས་ཁག་ལས་ཁུངས་ཉེར་གཅིག་གིས་གྲུབ་ཡོད་པ་རེད།
བསོད་ནམས་ཚེ་རིང་གིས་བསྒྱུར།
