ཝུའུ་ཁི་ལན་གྱི་ཙུང་ཐུང་གཞུང་སྒྲུབ་ཁང་གི་ཀྲུའུ་རིན་ཡེ་ཨར་མཱ་ཁི་དང་ཧང་ག་རིའི་ཕྱི་འབྲེལ་བློན་ཆེན་ཞི་ཡཱ་ཨར་ཏའོ་གཉིས་ཀྱིས་ཚེས་ཉེར་དགུ་ཉིན་ཝུའུ་ཁི་ལན་ནུབ་ཕྱོགས་ཀྱི་ཝུའུ་རི་ཀི་ལོ་ཏི་གྲོང་ཁྱེར་ནས་གྲོས་མོལ་བྱས། ཝུའུ་ཁི་ལན་དང་ཧང་ག་རི་རྒྱལ་ཁབ་གཉིས་ཀྱི་སྨྱན་བྱད་ཀྱིས་བསྒྲགས་པ་ལྟར་ན། ཕྱོགས་གཉིས་ཀྱི་དམིགས་ཡུལ་ནི་གྲོས་མོལ་ལ་ཤུགས་བསྣན་ཏེ་ཕྱོགས་གཉིས་ཀྱི་འབྲེལ་བ་ལེགས་བཅོས་བྱེད་པར་སྐུལ་འདེད་གཏོང་ཆེད་ཡིན་ཟེར།
བསྒྲགས་པ་ལྟར་ན། ཡེ་ཨར་མཱ་ཁི་ཡིས་གྲོས་མོལ་མཇུག་བསྒྲིལ་རྗེས་བཤད་རྒྱུར། ཕྱོགས་གཉིས་ཀྱིས་གང་མགྱོགས་སྒོས་རྒྱལ་ཁབ་གཉིས་ཀྱི་ཆེས་མཐོའི་མགོ་ཁྲིད་པའི་གྲོས་མོལ་སྤེལ་ནས། དེ་ལས་རྒྱལ་ཁབ་གཉིས་ཀྱི་འབྲེལ་བའི་རྣམ་པ་གསར་བ་ཞིག་གསར་འབྱེད་ཐུབ་པར་རེ་བཞིན་ཡོད་པའི་བསམ་ཚུལ་བསྟན་ཡོད་ཟེར། ཝུའུ་ཁི་ལན་གྱི་ཙུང་ཐུང་དྲ་ཚིགས་སྟེང་བསྒྲགས་པ་ལྟར་ན། ཐེངས་འདིའི་འཚམས་འདྲིའི་དམིགས་ཡུལ་ནི་གྲོས་མོལ་ལ་ཤུགས་བསྣན་ནས་ཐུན་མོང་གིས་སེམས་ཁུར་བྱེད་པའི་གནད་དོན་ཐག་གཅོད་བྱེད་ཆེད་ཡིན་ཟེར།
ཧང་ག་རིའི་སྨྱན་བྱད་ཀྱིས་བསྒྲགས་པ་ལྟར་ན། ཞི་ཡཱ་ཨར་ཏའོ་ཡིས་གྲོས་མོལ་བྱས་རྗེས་སྤེལ་བའི་གསར་འགྱུར་སྒྲོག་སྤེལ་ཚོགས་འདུའི་སྟེང་བསྟན་དོན། ཁོའི་ཐེངས་འདིའི་འཚམས་འདྲིའི་དམིགས་ཡུལ་ནི་རྒྱལ་ཁབ་གཉིས་བར་གྱི་ཡིད་ཆེས་སླར་གསོ་བྱེད་པ་དང་། ཕྱོགས་གཉིས་ཀྱིས་ཁ་ཕྱོགས་དེར་དམིགས་ནས་མི་སེམས་འགུལ་བའི་གྲུབ་འབྲས་བླངས་ཡོད་ཀྱང་། ད་རུང་ལམ་ཐག་ཧ་ཅང་རིང་བོ་ཞིག་བརྒྱུད་དགོས་ཡོད་ཟེར།
ཞི་ཡཱ་ཨར་ཏའོ་ཡིས་བཤད་རྒྱུར། ཉིས་སྟོང་བཅོ་ལྔ་ལོའི་ཚུན་ལ། ཝུའུ་ཁི་ལན་ནུབ་ཕྱོགས་ཀྱི་ཁཱ་ཨར་པཱ་ཅན་ས་ཁུལ་གྱི་ཧང་ག་རིའི་རིགས་ཀྱི་འགྲོ་མིའི་ཐོབ་ཐང་ལ་རྒྱུན་ཆད་མེད་པར་གནོད་པ་ཐེབས་པ་ནི། ཉེ་བའི་ལོ་འགའི་རིང་ཧང་ག་རི་དང་ཝུའུ་ཁི་ལན་གྱི་འབྲེལ་བ་ཛ་དྲག་ཏུ་གྱུར་བའི་རྒྱུ་རྐྱེན་གཙོ་བོ་ཡིན་ཟེར། ཁོས་ནན་གྱིས་བསྟན་དོན། ཧང་ག་རིའི་ཝུའུ་ཁི་ལན་གྱི་ཉམས་ཉེན་ཐད་ཀྱི་ལངས་ཕྱོགས་ནི་ནམ་རྒྱུན་མངོན་གསལ་ཡིན། ང་ཚོས་ཝུའུ་ཁི་ལན་གྱི་མངའ་ཁོངས་དང་བདག་དབང་ཆ་ཚང་ཡོང་བར་རྒྱབ་སྐྱོར་བྱེད་བཞིན་ཡོད་ལ། ང་ཚོས་འཐབ་འཁྲུག་ལ་རྒོལ་གཏམ་གཏོང་བ་དང་། ང་ཚོས་རང་གི་ཁྱིམ་མཚེས་རྒྱལ་ཁབ་དག་ལ་མྱུར་མོར་ཞི་བདེ་མངོན་འགྱུར་འབྱུང་བར་རེ་བཞིན་ཡོད་ཟེར།
ཝུའུ་ཁི་ལན་ནུབ་ཕྱོགས་ཀྱི་ཁཱ་ཨར་པཱ་ཅན་མངའ་སྡེ་དེ་ཧང་ག་རི་དང་ཉེ་བའི་མཐའ་མཚམས་ས་ཁུལ་དུ་གནས་པ་དང་། ཝུའུ་ཁི་ལན་མངའ་ཁོངས་ཀྱི་ཧང་ག་རིའི་རིགས་འདུས་སྡོད་བྱེད་པའི་ས་ཁུལ་གཙོ་བོ་ཞིག་ཡིན་ལ། གནས་དེར་ཧང་ག་རིའི་རིགས་ཀྱི་སྡོད་དམངས་འབུམ་གཅིག་དང་ཁྲི་ལྔ་ཙམ་འཚོ་སྡོད་བྱས་ཡོད་པ་རེད།
བསོད་ནམས་ཚེ་རིང་གིས་བསྒྱུར།
