ཉེ་སྔོན་རྒྱལ་ཁབ་མང་བོའི་མགོ་ཁྲིད་པས་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་ལ་གློག་འཕྲིན་བཏང་བའམ་འཕྲིན་ཡིག་བསྐུར་ནས། ཀྲུང་གོའི་མི་དམངས་ཀྱི་ལུགས་རྙིང་གི་འབྲུག་ལོའི་ལོ་སར་ལ་དགའ་སྟོན་རྟེན་འབྲེལ་ཞུས།
ལའོ་ཝའོ་ཏང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི་ཐུང་ལོན་གྱིས་སྤུན་ཟླ་ལྟ་བུའི་ཀྲུང་གོའི་མི་དམངས་དུས་རྟག་ཏུ་རྒྱལ་བདེ་དམངས་སྐྱིད་དང་དར་རྒྱས་གོང་འཕེལ། བདེ་སྐྱིད་བདེ་ཐང་གི་དཔལ་ལ་རོལ་བའི་སྨོན་འདུན་ཞུས་པ་དང་། སྲོལ་རྒྱུན་གྱི་མཛའ་བརྩེ་དང་བཟང་བཞིའི་དགོངས་པའི་མཛུབ་སྟོན་འོག་གི་ལའོ་ཝའོ་དང་ཀྲུང་གོའི་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བར་རྒྱུན་ཆད་མེད་པར་མེ་ཏོག་བཞད་དེ་འབྲས་བུ་སྨིན་པ་དང་། སྤུས་ཚད་མཐོ་བ་དང་ཚད་གཞི་མཐོ་བ། ཆུ་ཚད་མཐོ་བའི་ལའོ་ཝའོ་དང་ཀྲུང་གོའི་ལས་སྐལ་གཅིག་མཐུན་ཚོགས་པས་རྒྱལ་ཁབ་གཉིས་ཀྱི་མི་དམངས་ལ་སྔར་ལས་མང་བའི་བདེ་སྐྱིད་བསྐྲུན་ཐུབ་པའི་སྨོན་འདུན་ཞུས།
ཁུ་པཱའི་གསར་བརྗེའི་མགོ་ཁྲིད་པ་ལའོ་ཨར་ཁཱ་སི་ཐི་ལོ་དང་ཁུ་པཱའི་ཀྲུང་དབྱང་གི་ཧྲུའུ་ཅི་དང་པོ། ཁུ་པཱ་རྒྱལ་ཁབ་ཀྱི་ཀྲུའུ་ཞི་ཏིས་ཡཱ་སི་ཁཱ་ནེ་ཨར་གྱིས་རླབས་ཆེ་བའི་ཀྲུང་གོའི་མི་དམངས་བདེ་སྐྱིད་བདེ་ཐང་ཡོང་བའི་སྨོན་འདུན་ཞུས་པ་དང་། ཁུ་པཱ་དང་ཀྲུང་གོའི་འབྲེལ་བར་གསོན་ཤུགས་ཀྱིས་ཁེངས་ནས་རྒྱལ་ཁབ་གཉིས་ཀྱི་མི་དམངས་ལ་ཕན་བདེ་བསྐྲུན་ཏེ། སྤྱི་ཚོགས་རིང་ལུགས་རྒྱལ་ཁབ་ཀྱིས་མཐུན་སྒྲིལ་མཉམ་ལས་བྱེད་པའི་མིག་དཔེ་རུ་འགྱུར་ངེས་ཡིན། ཁུ་པཱ་ཕྱོགས་ཀྱིས་བློ་བརྟན་འགྱུར་མེད་ཀྱིས་ཀྲུང་གོའི་བར་གྱི་སྲོལ་རྒྱུན་མཛའ་བརྩེ་རྒྱུན་འཛིན་བྱེད་པ་དང་། ཕན་ཚུན་བར་གྱི་མཐུན་སྒྲིལ་ཇེ་དྲག་ཏུ་གཏོང་རྒྱུ་མ་ཟད། འཐབ་ཇུས་མཉམ་ལས་གཏིང་ཟབ་ཏུ་སྤེལ་རྒྱུ་ཡིན་ཟེར།
མོང་གོལ་རྒྱལ་ཁབ་ཀྱི་ཙུང་ཐུང་ཧུའུ་རི་ལེ་སུའུ་ཧི་ཡིས་ཀྲུང་གོ་དར་ཞིང་རྒྱས་པ་དང་མི་དམངས་བདེ་སྐྱིད་ལྡན་པའི་སྨོན་འདུན་ཞུས་པ་དང་། ད་ལོ་ནི་མོང་གོལ་དང་ཀྲུང་གོའི་བར་འབྲེལ་བ་བཙུགས་ནས་ལོ་ངོ་དོན་ལྔ་འགོར་བའི་ལོ་དང་། མོང་གོལ་དང་ཀྲུང་གོའི་མཛའ་མཐུན་མཉམ་ལས་འབྲེལ་བའི་ཆིངས་ཡིག་བཀོད་ནས་ལོ་ངོ་སུམ་ཅུ་འགོར་བའི་ལོ། མོང་གོལ་དང་ཀྲུང་གོའི་བར་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་བཙུགས་ནས་ལོ་ངོ་བཅུ་འགོར་བའི་ལོ་བཅས་ཡིན་པས། ཕྱོགས་གཉིས་ཀྱིས་ཁྱབ་ཁོངས་སོ་སོའི་མཉམ་ལས་ལ་ཤུགས་སྣོན་བྱེད་པ་དང་མཛའ་མཐུན་བརྗེ་རེས་གཏིང་ཟབ་ཏུ་སྤེལ་ཏེ། མཉམ་དུ་དར་རྒྱས་དང་འཕེལ་རྒྱས་ལ་སྐུལ་འདེད་གཏོང་ཐུབ་པར་ཡིད་ཆེས་ཡོད་ཟེར།
ནེ་པཱ་ལཱའི་ཙུང་ཐུང་པའོ་ཏི་ཨར་གྱིས་ཀྲུང་གོ་དུས་ཡུན་རིང་བོར་ཞི་བདེ་དང་གོང་འཕེལ། དར་རྒྱས་བཅས་འབྱུང་བའི་སྨོན་འདུན་ཞུས་པ་དང་། ཀྲུའུ་ཞི་ཞི་ཅིན་ཕིང་གི་ཕུལ་དུ་བྱུང་བའི་མགོ་ཁྲིད་འོག རི་ཆུ་གཅིག་ཏུ་འབྲེལ་བའི་ནེ་པཱ་ལཱ་དང་ཀྲུང་གོ་རྒྱལ་ཁབ་གཉིས་ཀྱི་ཁྱབ་ཁོངས་སོ་སོའི་འབྲེལ་བ་སྔར་ལས་འཕེལ་རྒྱས་སུ་འགྲོ་སྲིད་པ་དང་། མི་གཞུང་བརྗེ་རེས་དེ་སྐས་རིམ་གསར་བ་ཞིག་ཏུ་བསླེབ་སྲིད་པར་ཡིད་ཆེས་བརྟན་པོ་ཡོད་ཟེར།
དབྱི་སི་རལ་གྱི་ཙུང་ཐུང་ཧི་ཨར་ཙོ་ཀི་ཡིས་ཀྲུང་གོའི་མི་དམངས་ལོ་གསར་བའི་ནང་ཞི་འཇགས་དང་བདེ་སྐྱིད། དར་རྒྱས་བཅས་འབྱུང་བའི་སྨོན་འདུན་ཞུས་པ་དང་། དབྱི་སི་རལ་དང་ཀྲུང་གོའི་མཛའ་མཐུན་དེ་གནའ་བོའི་རླབས་ཆེ་བའི་དཔལ་ཡོན་ཆེན་མོ་གཉིས་ལ་རྐང་བཙུགས་ཡོད་ཅིང་། རྒྱུན་རིང་བའི་ཐུན་མོང་གི་བློ་གྲོས་ཡོད་ལ། རྒྱུན་ཆད་མེད་པར་རྒྱལ་ཁབ་གཉིས་ཀྱི་སྲོལ་རྒྱུན་མཛའ་བརྩེ་ཇེ་ཟབ་ཏུ་བཏང་ནས། ཁྱབ་ཁོངས་སོ་སོའི་མཉམ་ལས་ལ་སྐུལ་འདེད་གཏོང་བར་རེ་བཞིན་ཡོད་ཟེར།
དབྱི་ལིང་གི་ཙུང་ཐུང་ལའེ་ཞི་ཡིས་རླབས་ཆེ་བའི་ཀྲུང་གོ་དང་ཀྲུང་གོའི་མི་དམངས་བདེ་སྐྱིད་བདེ་ཐང་ཡོང་བའི་སྨོན་འདུན་ཞུས་པ་དང་། དབྱི་ལིང་དང་ཀྲུང་གོའི་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་དེ་ཡང་དག་པའི་ལམ་ནས་རྒྱུན་ཆད་མེད་པར་འཕེལ་རྒྱས་སུ་འགྲོ་བཞིན་ཡོད། དབྱི་ལིང་དང་ཀྲུང་གོ་རྒྱལ་ཁབ་གཉིས་ཀྱི་ཕྱོགས་གཉིས་དང་ས་ཁུལ། རྒྱལ་སྤྱི་བཅས་རིམ་པའི་མཉམ་ལས་བསྟུད་མར་ཇེ་ཟབ་ཏུ་འགྲོ་སྲིད་པར་ཡིད་ཆེས་ཡོད་ཟེར།
ཨ་ཧྥེ་རི་ཁ་ལྷོ་མའི་ཙུང་ཐུང་ལཱ་མཱ་ཧྥུའུ་སཱ་ཡིས་བསྟན་དོན། ལུགས་རྙིང་ལོ་སར་གྱིས་མཚོན་པའི་གསོན་ཤུགས་དང་རེ་བ། གོ་སྐབས་བཅས་ཀྲུང་གོའི་ཁོད་ཡངས་པའི་ས་ཁོངས་དང་འཛམ་གླིང་ཡོངས་ཀྱི་ཀྲུང་གོ་བར་ཁྱབ་པའི་སྨོན་འདུན་ཞུས་པ་དང་། ཀྲུང་གོ་དར་རྒྱས་སུ་འགྲོ་བ་དང་རྒྱུན་ཆད་མེད་པར་གསར་གཏོད་བྱས་ཏེ། འཛམ་གླིང་གི་ཞི་བདེ་དང་འཕེལ་རྒྱས་ལ་བསྟུད་མར་སྐུལ་འདེད་གཏོང་ཐུབ་པའི་སྨོན་འདུན་ཞུས།
ཁི་མའོ་ལོ་ཡི་ཙུང་ཐུང་ཨ་ཀྲ་ལེ་ཡིས་རླབས་ཆེ་བའི་ཀྲུང་གོས་ཁྱབ་ཁོངས་སོ་སོ་ནས་གྲུབ་འབྲས་གསར་བ་ལོན་པ་དང་། ཞི་བདེ་དང་གོང་འཕེལ། དར་རྒྱས་བཅས་འཚོལ་བསྙེག་བྱེད་པའི་བླ་མེད་ཀྱི་བགྲོད་ལམ་སྟེང་རྒྱལ་ཁ་ལོན་ནས། ཀྲུང་གོའི་མི་དམངས་དང་མིའི་རིགས་ཡོངས་ལ་བདེ་སྐྱིད་བསྐྲུན་ཐུབ་པའི་སྨོན་འདུན་ཞུས།
སུའུ་ཏན་ལྷོ་མའི་ཙུང་ཐུང་ཅི་ཨར་གྱིས་འབྲུག་ལོའི་ལོ་སར་གྱིས་ཀྲུང་གོར་བདེ་ཐང་དང་སྤྲོ་དགའ། དར་རྒྱས་བཅས་བསྐྲུན་ཐུབ་པའི་སྨོན་འདུན་ཞུས་པ་དང་། ཀྲུང་གོའི་བར་གྱི་མཉམ་ལས་དམ་ཟབ་ཏུ་བཏང་ནས་སུའུ་ཏན་ལྷོ་མ་དང་ཀྲུང་གོའི་མཛའ་བརྩེ་ཇེ་ཟབ་ཏུ་གཏོང་འདོད་ཡོད་ཟེར།
བསོད་ནམས་ཚེ་རིང་གིས་བསྒྱུར།
