འཇར་པན་ཏུང་ཅིང་གློག་ཤུགས་ཀུང་ཟིས་སྐོར་ཐེངས་བཞི་བའི་ཧྥུའུ་ཏའོ་ཉིང་རྡུལ་བཙོག་ཆུ་རྒྱ་མཚོར་གཏོང་བའི་བྱ་བ་མགོ་བརྩམས་པར་དམིགས་ནས། ཀྲུང་གོའི་ཕྱི་འབྲེལ་པུའུ་ཡི་མགྲིན་ཚབ་པ་མའོ་ཉིང་གིས་ཚེས་ཉེར་བརྒྱད་ཉིན་བསྟན་དོན། ཀྲུང་གོ་ཕྱོགས་ཀྱིས་དོན་དེར་མཐའ་གཅིག་ཏུ་ངོ་རྒོལ་བྱེད་པ་དང་། འཇར་པན་ཕྱོགས་ཀྱིས་ནོར་འཆུག་གི་བྱ་སྤྱོད་དེ་མཚམས་འཇོག་དགོས་པའི་རེ་བ་བཏོན་ཡོད་ཟེར།
ཉིན་དེའི་རྒྱུན་ལྡན་གྱི་གསར་འགོད་པའི་སྣེ་ལེན་ཚོགས་འདུའི་སྟེང་གསར་འགོད་པས། བསྒྲགས་པ་ལྟར་ན་ཟླ་གཉིས་པའི་ཚེས་ཉེར་བརྒྱད་ཉིན། འཇར་པན་ཏུང་ཅིང་གློག་ཤུགས་ཀུང་ཟིས་སྐོར་ཐེངས་བཞི་བའི་ཧྥུའུ་ཏའོ་ཉིང་རྡུལ་བཙོག་ཆུ་རྒྱ་མཚོར་གཏོང་བའི་བྱ་བ་མགོ་བརྩམས་པ་དང་། ཚོད་དཔག་བྱས་ན་ཟླ་གསུམ་པའི་ཚེས་བཅུ་བདུན་ཉིན་བར་རྒྱུན་བསྲིང་རྒྱུ་ཡིན་ལ། ཉིང་རྡུལ་བཙོག་ཆུ་ཏུན་སྟོང་བདུན་དང་བརྒྱད་བརྒྱ་ཙམ་ཕྱིར་གཏོང་བའི་འཆར་གཞི་ཡོད་པ་རེད། ཀྲུང་གོའི་ཕྱོགས་ལ་དོན་དེར་དཔྱད་བརྗོད་ག་འདྲ་ཡོད་ཅེས་དྲིས།
མའོ་ཉིང་གིས་བསྟན་དོན། འཇར་པན་གྱིས་རྒྱལ་སྤྱིའི་སྤྱི་ཚོགས་ཀྱིས་སེམས་ཁུར་དང་ངོ་རྒོལ་བྱེད་པ་སྣང་མེད་དུ་བསྐྱུར་ནས་གང་འདོད་ལྟར་རྒྱ་མཚོའི་ནང་ཧྥུའུ་ཏའོ་ཉིང་རྡུལ་བཙོག་ཆུ་ཏུན་ཁྲི་གཉིས་དང་སྟོང་གསུམ་བཏང་བ་དང་། དེ་ལས་བྱུང་བའི་སྦགས་བཙོག་གི་ཉེན་ཁ་དེ་འཛམ་གླིང་ཧྲིལ་བོའི་མགོར་བཞག་ཡོད་པ་དེ་རྒྱལ་སྤྱིའི་བཅའ་ཁྲིམས་དང་མི་མཐུན་ལ། ཧ་ཅང་འགན་མི་ཁུར་བའི་དོན་དག་ཅིག་རེད་ཟེར།
མའོ་ཉིང་གིས་བཤད་རྒྱུར། ཧྥུའུ་ཏའོ་ཉིང་རྡུལ་ནུས་པའི་གློག་འདོན་ས་ཚིགས་དང་པོར་ཉེ་སྔོན་ལས་བྱེད་མི་སྣར་ཉིང་རྡུལ་བཙོག་ཆུའི་ཞོར་སྐྱོན་ཐེབས་པ་དང་དྭངས་འབྱེད་སྒྲིག་ཆས་ལས་ཉིང་རྡུལ་བཙོག་ཆུ་ཕྱིར་བཞུར་བ་སོགས་ཀྱི་དོན་རྐྱེན་བྱུང་ཡོད་ལ། དེ་ལས་ཏུང་ཅིང་གློག་ཤུགས་ཀུང་ཟིའི་ནང་ཁུལ་གྱི་དོ་དམ་རྙོག་འཛིང་དང་འཇར་པན་སྲིད་གཞུང་གི་ལྟ་རྟོག་དོ་དམ་ཤུགས་ཚད་ཞན་པ་མངོན་པར་མཚོན་ཡོད་པ་དང་། འཇར་པན་ཕྱོགས་ཀྱིས་ཉིང་རྡུལ་བཙོག་ཆུ་རྒྱ་མཚོར་བཏང་བ་བདེ་འཇགས་དང་བློ་གཏད་རུང་བ་ཡིན་པའི་བརྗོད་པའི་བཤད་ཚུལ་དེར་རྒྱལ་སྤྱིའི་སྤྱི་ཚོགས་ཡིད་ཆེས་འབྱུང་ཐབས་མེད་ཟེར།
མའོ་ཉིང་གིས་བསྟན་དོན། ཧྥུའུ་ཏའོ་ཉིང་རྡུལ་བཙོག་ཆུ་རྒྱ་མཚོར་གཏོང་བའི་དོན་དེ་མིའི་རིགས་ཡོངས་ཀྱི་བདེ་ཐང་དང་འཛམ་གླིང་ཡོངས་ཀྱི་རྒྱ་མཚོའི་ཁོར་ཡུག རྒྱལ་སྤྱིའི་སྤྱི་བའི་ཁེ་ཕན་བཅས་ལ་འབྲེལ་བ་ཡོད་ཅིང་། འཇར་པན་ཕྱོགས་ཀྱིས་རྒྱལ་ཁབ་ཕྱི་ནང་གི་སེམས་ཁུར་ལ་གཟབ་ནན་གྱི་རྣམ་འགྱུར་བཟུང་སྟེ། འགན་ཁུར་བ་དང་འཛུགས་སྐྲུན་རང་བཞིན་ལྡན་པའི་རྣམ་འགྱུར་གྱིས་ཐག་གཅོད་བཟང་བོ་བྱེད་དགོས། ཀྲུང་གོ་ཕྱོགས་ཀྱིས་འཇར་པན་ཕྱོགས་ཀྱིས་ཉེ་འཁོར་ཁྱིམ་མཚེས་རྒྱལ་ཁབ་སོགས་ཁེ་ཕན་འབྲེལ་བ་ཡོད་པའི་ཕྱོགས་རྣམས་དངོས་སུ་ཞུགས་པ་དང་སྒེར་ཚུགས་ཅན་དང་ཡུན་ནུས་ཅན་གྱི་དུས་ཡུན་རིང་བོའི་རྒྱལ་སྤྱིའི་ལྟ་ཞིབ་ཚད་འཇལ་བཀོད་སྒྲིག་བྱེད་པར་ཕྱོགས་ཡོངས་ནས་གཞོགས་འདེགས་བྱས་ཏེ། ཉིང་རྡུལ་བཙོག་ཆུ་རྒྱ་མཚོར་བཏང་བ་ལས་མཇུག་འབྲས་མི་ལེགས་པ་འབྱུང་བར་སྔོན་འགོག་བྱེད་དགོས་པའི་སྐུལ་མ་གཏོང་གིན་ཡོད་ཟེར།
བསོད་ནམས་ཚེ་རིང་གིས་བསྒྱུར།
